Read Runyoro - rutooro 2 Bakam 14 Bible Online

2 Bakam 14 - Runyoro - rutooro bible

2 Bakam 14

¹Omu mwaka ogwa kabiri ogw'engoma ya Yowaasi mutabani wa Yowahazi omukama wa Isirairi, Amaziya mutabani wa Yowaasi omukama wa Yuda nubwo yatandikire kulema.

²Ha yatandikiire kulema, akaba ahikize emyaka amakumi abiri n'etaano, akalemera emyaka amakumi abiri na mwenda omu rubuga Yerusaalemu. Nyina yayetwaaga Yehoyadini yali nzaarwa ya Yerusaalemu.

³Akakora Ruhanga ebi agonza, baitu atasisane nka Daudi isenkuru; akakora nka Yowaasi ise ebi yakozire.

⁴Ebiikaro ebikuru eby'abakafiiri eby'okuramizaaho, atabiseese; abantu bakongera kubitambirraho ebyonzira n'okubicumikirirraho obubbani.

⁵Obwakaba maamara ati okugumibwa nkooku ali mukama abaheereza be abaisire omukama ise yabaita.

⁶Baitu abaana b'abaisi atabaite; ekyahandiikirwe omu kitabu eky'ebiragiro bya Musa nkooku kirukugamba, nambere MUKAMA yagambire ati: “Baisebaana tibaliturwa baana baabu, n'abaana tibaliturwa baisebo; Buli muntu aliturwa ekibi kye yakozire. Akabwa kaiba kahoolerwa omugongo gwako.”

⁷Akaita aba Edomu omutwaro gumu yabanaga omu kihanga ky'ekisura, kandi yahamba orubuga Sela, yaruruka ibara Yokiseeri nahati hoona nukwo rukyayetwa.

⁸Hanyuma Amaziya yatuma abakwenda hali Yowaasi mutabani wa Yehowahazi omuwana wa Yehu omukama wa Isirairi naagamba ati: “Oije tulengangane amaani.”

⁹Yowaasi omukama wa Isirairi yagarukamu Amaziya omukama wa Yuda ati: “Ira, itojo erya hansozi eza Labanoni, likatumaho omukogoto ogwa Lebanoni nirigamba liti; ‘Ohe omutabani wange muhara wawe amuswere;’ nubwo haizire enyamaiswa ey'omu kisaka yaraba aho, yarubaatirra itojo eri.

¹⁰Ego okasingura Aba Edomu, hati nooyenyumiza. Wenyumize, baitu ikara omuka; kiki ekirukukuseruza akasarre akaraakuhwerekereza, iwe na Yuda?”

¹¹Baitu Amaziya, ebi atabihulizeemu. Habweki Yowaasi omukama wa Isirairi yagenda, baakwatanganira Besi-semasi eya Yuda.

¹²Abaisirairi bakabinga Abayuda, buli omu yairuka naagaruka omuka ye.

¹³Yowaasi omukama wa Isirairi, yahamba Amaziya omukama wa Yuda, mutabani wa Yowaasi, mwijukuru w'Ahaziya, yamuhambira Besi-mesi, yagenda Yerusaalemu, yaseesa ekisiika kya Yerusaalemu, okuruga ha irembo ly'Efuraimu, okuhika ha keekubo, omwanya mita bikumi bbina.

¹⁴Yanyaga zaabbu n'efeeza yoona, n'ebikwato byona ebyasangirwe omunju ya MUKAMA, n'omu maahurro ag'omunju y'omukama, n'abantu abakaba basimbirwe nk'omukwato yagaruka Samaliya.

¹⁵Ebintu ebindi Yowaasi ebi yakozire, amaani ge, nkooku yarwaine n'Amaziya omukama wa Yuda, byona bikahandiikwa omu kitabu eky'obusinge obw'abakama aba Isirairi.

¹⁶Yowaasi akafa nka baisenkuru oku baafiire, yaziikwa Samaliya n'abakama abandi aba Isirairi; omutabani Yerobbowamu yateera engoma.

¹⁷Amaziya mutabani wa Yowaasi omukama wa Yuda, akoomeera emyaka ikumi n'etaano, hanyuma y'okufa kwa Yowaasi mutabani wa Yehowahazi, omukama wa Isirairi.

¹⁸Ebintu ebindi Amaziya ebi yakozire, bikahandiikwa omu kitabu eky'obusinge bw'abakama aba Isirairi.

¹⁹Aba Yerusaalemu, obu baayekobere kumwita, yairukira Lakisi. Baitu bakatumayo abantu baamuhondereza, baamunagayo, oku nuho baamunagire.

²⁰Omutumbi gwe bakaguleetera ha mbaraasi, baagugarra Yerusaalemu, yaziikwa hamu na baisenkuru omu rubuga rwa Daudi.

²¹Abantu boona aba Yuda, baakwata Azariya, omu kasumi ako ow'akaba yahikya emyaka ikumi na mukaaga, nuwe baata ha ngoma omu kiikaro ky'Amaziya ise.

²²Ise obu yamazire kufa, nka baisenkuru, nuwe yayombekere orubuga Erasi, yarugarurra Yuda.

²³Omu mwaka ogwa ikumi n'etaano ogw'engoma y'Amaziya mutabani wa Yowaasi omukama wa Yuda, Yerobbowamu mutabani wa Yowaasi omukama wa Isirairi, nubwo yatandikire kulema ali omu rubuga Samaliya, akalemera emyaka amakumi ana na gumu.

²⁴Akakora MUKAMA ebi atagonza; ebibi byona Yerobbowamu mutabani wa Nebati ebi yanagiremu Isirairi atabireke.

²⁵Nuwe yagarwire omutaano gwa Isirairi, okurugirra ha ntaaho ya Hamasi, okuhika ha Nyanja y'Araba, MUKAMA Ruhanga wa Isirairi nkooku yagambire, n'abaliza omu muheereza we Yona mutabani w'Amitai omurangi, ow'akaba arugire Gaasi-heferi.

²⁶Habwokuba MUKAMA akarora omuhito gwa Isirairi nkooku guhinguraine, hakaba hataroho n'omu ayasigaireho, omunyagwa rundi atali munyagwa, kandi hakaba hataroho muntu n'omu ow'okukonyera Isirairi.

²⁷Baitu MUKAMA atagambe ngu alihwerekereza Isirairi amumale omunsi, nukwo kubajuna naayekonyeza Yerobbowamu mutabani wa Yowaasi.

²⁸Ebintu ebindi bingi Yerobbowamu ebi yakozire, amaani ge, nkooku yarwaine kandi nkooku yagaruliire Isirairi Damasiko na Hamasi ezikaba ziri za Yuda, bikahandiikwa omu kitabu eky'obusinge obw'abakama ba Isirairi.

²⁹Yerobbowamu akafa nka baisenkuru abakama ba Isirairi oku baafiire, omutabani Zakaliya yateera engoma.