Read Runyoro - rutooro 2 Bakam 15 Bible Online

2 Bakam 15 - Runyoro - rutooro bible

2 Bakam 15

¹Omu mwaka ogwa abiri na musanju ogw'engoma ya Yerobbowamu omukama wa Isirairi, Azariya mutabani w'Amaziya, nubwo yatiire engoma.

²Ha yateeriire engoma, akaba ahikize emyaka ikumi na mukaaga, akalema emyaka ataano n'ebiri ali omu rubuga Yerusaalemu.

³Akakora MUKAMA ebi agonza, nk'Amaziya ise oku yakozire.

⁴Baitu ebiikaro ebikuru eby'okuramizaamu atabiseese; abantu bakongera kubitambirraho ebyonzira n'okucumikirirraho obubaani.

⁵MUKAMA nukwo kumuteera, yagenga okuhika ha kiro eki yafeeriireho, yaraaraga omunju enyakwesunguswire. Yosaamu mutabani we, nuwe yarolerraaga enju yoona, nuwe yalemaga abantu ab'omunsi egi.

⁶Ebintu ebindi Azariya ebi yakozire bikahandiikwa omu kitabu eky'obusinge bw'abakama ba Yuda.

⁷Azariya akafa nka baisenkuru oku baafiire, baamuziika hamu nabo omu rubuga rwa Daudi, Yosaamu mutabani we yateera engoma.

⁸Omu mwaka ogw'asatu na munaana ogw'engoma y'Azariya omukama wa Yuda, Zakaliya mutabani wa Yerobbowamu nubwo yalemere Isirairi omu rubuga Samaliya okumara ameezi mukaaga.

⁹Akakora ebinyakubiihiza MUKAMA nka baisenkuru oku baakozire ataleke ebibi Yerobbowamu mutabani wa Nebati ebi yanagiremu Isirairi.

¹⁰Sarumu mutabani wa Yabesi akamuliirana, yamuterra omumaiso g'abantu yamwita, yateera engoma omu kiikaro kye.

¹¹Ebintu ebindi Zakaliya ebi yakozire bikahandiikwa omu kitabu eky'obusinge obw'abakama ba Isirairi.

¹²(Eki nikyo MUKAMA yanihiize Yehu naagamba ati: “Abaijukuru bawe baliikarra ha kitebe eky'obukama bwa Isirairi okuhika ha bwijukuru obw'enyakana”, Nukwo kyaahikiriire kwo).

¹³Omu mwaka ogw'amakumi asatu na mwenda ogw'engoma ya Uziya omukama wa Yuda, Sarumu mutabani wa Yabesi nubwo yatandikire kulema, akalema okwezi kumu kwonka omu rubuga Samaliya.

¹⁴Nubwo Menahemu mutabani wa Gadi yarugire Tiruza yaija Samaliya, yamwita yamunaga Samaliya yateera engoma omu kiikaro kye.

¹⁵Ebintu ebindi ebya Sarumu, n'okwema kwe, bikahandiikwa omu kitabu eky'obusinge bw'abakama aba Isirairi.

¹⁶Omu kasumi ako, Menahemu nubwo yahwerekeriize Tifusa na boona abakaba bagirumu n'ebyaro byayo okuruga Tiruza n'okweyongerayo; habwokuba etamwikirize, na uwe nukwo kugihwerekereza, abakazi abaina enda abakaba barumu, yabakambura yabaita.

¹⁷Omu mwaka ogw'amakumi asatu na mwenda ogw'engoma ey'omukama Uziya owa Yuda, Menahemu mutabani wa Gadi, nubwo yatandikire kulema Isirairi, akalemera emyaka ikumi omu rubuga Samaliya.

¹⁸Akakora MUKAMA ebi atasiima; obwomeezi bwe bwona, ebibi byona Yerobbowamu mutabani wa Nebati ebi yanagiremu Isirairi atabireke.

¹⁹Puuli omukama wa Siriya, akaramagira ensi egi; Menahemu akamuha talenta z'efeeza rukumi, nukwo amukonyere okugumya obusobozi bwe obw'obukama.

²⁰Menahemu akaihaho abasaija abaguuda sente, buli muntu akamwihaho sekeeri makumi ataano ez'okuha omukama wa Siriya, omukama wa Siriya nukwo kuruga omunsi egi, akagaruka enyuma.

²¹Ebintu ebindi Menahemu ebi yakozire, bikahandiikwa omu kitabu eky'okuhonderana kw'abakama ba Isirairi.

²²Akafa nka baisenkuru oku baafiire, Pekahia mutabani we yateera engoma.

²³Omu mwaka ogw'amakumi ataano ogw'engoma ey'Azariya omukama wa Yuda, Pekahia mutabani wa Yenahemu nubwo yatandikire kulema Isirairi omu rubuga Samaliya, akalemera emyaka ebiri.

²⁴Akakora MUKAMA ebi atasiima; ebibi Yerobbowamu mutabani wa Nebati ebi yanagiremu Isirairi atabireke.

²⁵Peeka mutabani wa Remalia engabwa ye, akamuliirana, yayekoba hamu n'abasaija amakumi ataano Abagiryadi, yamwitira omu rubuga Samaliya, omu kikaali ky'omukama, yateera engoma.

²⁶Ebintu ebindi Pekahia ebi yakozire, bikahadiikwa omu kitabu eky'obusinge obw'abakama ba Isirairi.

²⁷Omu mwaka ogw'ataano n'ebiri ogw'engoma y'Azariya omukama wa Yuda, Peeka mutabani wa Remalia nubwo yatandikire kulema Isirairi omu rubuga Samaliya, akalemera emyaka amakumi abiri.

²⁸Akakora MUKAMA ebi atasiima; ebibi Yerobbowamu mutabani wa Nebati ebi yanagiremu Isirairi atabireke.

²⁹Omu businge bwa Peeka omukama wa Isirairi, Tigulaasi-Pileseeri omukama wa Siriya, nubwo yaizire yahamba Lyooni, Abeeribesi-maaka, Yanoha, Kedesi, Hazora, Giryadi na Galilaaya, ensi eya Nafutaali yoona, abantu aba yahambire yabatwara Asiriya.

³⁰Hanyuma Hoseya mutabani w'Ela, akaliirana Peeka mutabani wa Remalia, yamutema yamwita, yateera engoma omu mwaka ogw'amakumi abiri ogw'engoma ya Yosaamu mutabani wa Uzia.

³¹Ebintu ebindi Peeka ebi yakozire, bikahandiikwa omu kitabu eky'obusinge obw'abakama aba Isirairi.

³²Omu mwaka ogwa kabiri ogw'engoma ya Peeka mutabani wa Remalia omukama wa Isirairi, Yosamu mutabani wa Uzia omukama wa Yuda, nubwo yatandikire kulema.

³³Ha yatandikiire kulema, akaba ahikize emyaka amakumi abiri n'etaano, akalemera emyaka ikumi na mukaaga omu rubuga Yerusaalemu. Ibara lya nyina, nuwe Yerusa muhara wa Zadoki.

³⁴Akakora ebirukusemereza MUKAMA nka ise Uzia ebi yakozire.

³⁵Baitu ebiikaro ebikuru eby'okuramizaaho, atabiseese; abantu bakongera kubitambirraho ebyonzira n'okubicumiikirirraho obubbani. Nuwe yayombekere irembo ery'eruguru ery'enju ya MUKAMA.

³⁶Ebintu abindi Yosamu ebi yakozire, bikahandiikwa omu kitabu eky'obusinge obw'abakama ba Yuda.

³⁷Omu biro ebi, MUKAMA nubwo yatandikire kutweka Rezini omukama wa Siriya na Peeka mutabani wa Remalia baramagire Yuda.

³⁸Yosamu akafa nka baisenkuru oku baafiire, yaziikwa hamu nabo omu rubuga rwa Daudi ise; Ahazi omutabani yateera engoma.