Read Runyoro - rutooro 2 Bakam 16 Bible Online

2 Bakam 16 - Runyoro - rutooro bible

2 Bakam 16

¹Omu mwaka ogwa ikumi na musanju ogw'engoma ya Peeka mutabani wa Remalia, Ahazi mutabani wa Yosamu omukama wa Yuda nubwo yatandikire kulema.

²Ahazi ha yatandikiire kulema, akaba ahikize emyaka amakumi abiri, akalemera emyaka ikumi na mukaaga omu rubuga Yerusaalemu. Atakole MUKAMA Ruhanga we ebi asiima nka ise Daudi oku yakozire,

³baitu akakwata ekirale abakama aba Isirairi eki baarabiremu. Akookya n'omwana we, abe kihongwa eky'okwokya, naakuraatira engeso embi emahanga MUKAMA aga yabingiremu Isirairi atakaizire ezi gakaba gainazo.

⁴Yatambaga ebyonzira, yacumikiirraga obubbani omu biikaro ebikuru eby'okuramizaamu hansozi, na hansi y'emiti emibisi yoona.

⁵Rezini omukama wa Siriya na Peeka mutabani wa Remalia omukama wa Isirairi, nubwo baizire kuramagira Yerusaalemu, baagota Ahazi, baitu batasobole kumusingura.

⁶Omu kasumi ako, omukama w'Edomu, nubwo yagarwire Erasi hali Edomu, yagiihamu abantu ba Yuda abaagiikaramuga; Aba Edomu nukwo kugenda Elasi, nuho hali okuhika na hati.

⁷Ahazi akatuma abakwenda omba Tigulaasi-pile-seeri omukama w'Asiriya naagamba ati: “Ninyowe omuheereza wawe kandi omwana wawe, otabandaara, oije onjune omukama wa Siriya n'owa Isirairi abanyakunseesiire.”

⁸Ahazi, kandi akakwata efeeza na zaabbu eyasangirwe omunju ya MUKAMA n'omu maahuurro ag'akaruziika y'omukama, yabitwekera omukama wa Asiriya.

⁹OMUKAMA ow'Asiriya, akahurra Ahazi; nukwo kuseesira Damasiko, yagihamba, abantu b'omunsi egi yabatwara Kiiri, Rezini yamwita.

¹⁰Omukama Ahazi obu yagenzire Damasiko okwitirana Tigulaasi-pile-seeri omukama w'Asiriya, akabona itambiro erikaba liri Damasiko, nukwo kutwekera Uliya nyakatagara ensisana yalyo, enkora yalyo eyabuli kacweka kaalyo koona.

¹¹Uliya nyakatagara nukwo kukora itambiro erirukusisanira kimu liri, eryaarugire Damasiko, yalimara Ahazi atakarugire Damasiko.

¹²Ahazi obu yarugire Damasiko, yarora itambiro, yalirra haihi yalitemba,

¹³yalyokezaaho ekihongwa kye eky'ekyokunywa, n'esagama ey'ekihongwa eky'okusaba obusinge.

¹⁴Itambiro ery'omulinga eryaikaraga omumaiso ga MUKAMA, yaliiha omumaiso g'enju, hagati y'itambiro lye, n'enju ya MUKAMA, yalita ha bukiizi obw'emoso obw'itambiro lye.

¹⁵Omukama Ahazi akaragira Uliya nyakatagara naagamba ati: “Ha itambiro erikooto, nuho oyokezeege ekihongwa eky'okwokya ekya nyenkya, ekihongwa eky'ebyokulya ekya rwebagyo, ekihongwa eky'omukama eky'okwokya eky'abantu boona ab'omunsi enu, ekihongwa kyabo eky'ebyokulya n'ekihongwa kyabo eky'ekyokunywa; niryo oseeseehoga esagama yoona ey'ekihongwa eky'okwokya, n'esagama yoona ey'ekyonzira; baitu itambiro ery'omulinga, eri liraaba lyange ly'okwekagulizaaho.”

¹⁶Uliya nyakatagara ebi byona nukwo yabikozire, omukama Ahazi nkooku yamuragiire.

¹⁷Omukama Ahazi yalitamu ebikoba by'entebe, yateekuramu ebbeseni, yaiha amaizi omu nimi ez'omulinga ezikaba ziri hansi yalyo, yalita ha kyombeko eky'amabaale.

¹⁸Omuhanda ogukaba gulimirwe omu kikaali omunda, guswekeriirwe, nukwo gurabwemu ha Sabbato, n'omulyango ogw'aheeru omukama ogu arabamu, yabiiha omunju ya MUKAMA, habw'omukama w'Asiriya.

¹⁹Ebintu ebindi Ahazi ebi yakozire bikahandiikwa omu kitabu eky'obusinge obw'abakama ba Yuda.

²⁰Ahazi akafa nka baisenkuru oku baafiire, yaziikwa hamu nabo omu rubuga rwa Daudi; Hezekiya omutabani yateera engoma.