Read Runyoro - rutooro 2 Bakam 17 Bible Online

2 Bakam 17 - Runyoro - rutooro bible

2 Bakam 17

¹Omu mwaka ogwa ikumi n'ebiri ogw'engoma y'Ahazi omukama wa Yuda, Hoseya mutabani w'Ela, nubwo yatandikire kulema Isirairi omu rubuga Samaliya.

²Akakora MUKAMA ebi atasiima, baitu atasisane abakama aba Isirairi abaamwebembiire.

³Hoseya omukama w'Asiriya akaramagira Ahazi; Hoseya yafooka mwiru we, yaikara naamuha omusoro.

⁴Baitu omukama w'Asiriya akarora Hoseya nkooku akaba ali ncwangya; habwokuba akaba atumire abakwenda hali Sso, omukama wa Misiri, yayanga kuha omukama w'Asiriya omusoro, nkooku yakoraga buli mwaka; habweki omukama w'Asiriya nukwo kumukwata yamuta omu nkomo.

⁵Hanyuma omukama ow'Asiriya, akaramagira ensi yoona, yahika na Samaliya, yagigota okumara emyaka esatu.

⁶Omu mwaka ogwa mwenda ogw'engoma ya Hoseya, omukama w'Asiriya nubwo yakwasire Samaliya, Abaisirairi yabatwara Asiriya, yabata omu rubuga Haala, banu yabata haihi n'ekisaaru Habora, ekinyakuli omu isaza lya Gozani, abandi yabata omu mbuga eza Media.

⁷Eki kikabaho, habwokuba abantu ba Isirairi bakabiihiza MUKAMA Ruhanga wabo ayabaihire omunsi Misiri, ayabajunire Faraaho omukama wa Misiri, baaramya baaruhanga abandi.

⁸Baakwata engeso ez'amahanga MUKAMA aga yabingire abantu be Abaisirairi batakaizire, n'engeso abakama ba Isirairi ezi baaleesire.

⁹Abaisirairi baakoraga omu nsita ebintu MUKAMA Ruhanga wabo ebi akaba atarukusiima. Omu mbuga zaabo zoona, okurugirra ha munaara ogw'abalinzi okuhika ha rubuga oruzitiriirwe, bakeeyombekeramu ebiikaro eby'ekitiinisa eby'okuramizaamu.

¹⁰Bakeekorra ebisisani eby'amabaale, hansozi zoona eziraihire na hansi y'emiti yoona emibisi, baatayo ekisisani ky'omucwezi Asera;

¹¹Omu biikaro eby'ekitiinisa ebi byona nuho baacumiikirirraga obubbaani, nk'amahanga MUKAMA aga yabingire bbo batakaizire oku gaakoraga. Bakakora ebintu ebibi ebirukubiihiza MUKAMA,

¹²bakaramya abacwezi MUKAMA aba yabatangire naagamba ati: “Eki mutalikikora.”

¹³Baitu MUKAMA akeekonyeza abarangi boona n'abahabuzi naagamba ati: “Mucwe engeso zanyu embi, mukwatege Ebiragiro byange n'ebigambo byange, ebiragiro byona ebi naragiire baisenkurwinywe, n'ebi nabatwekiire nimbirabya omu baheereza bange abarangi.”

¹⁴Baitu bakanga kuhurra, baaba ngumangani nka baisenkurubo abataraikiriize MUKAMA Ruhanga wabo oku baabaire.

¹⁵Bakagaya ebiragiro bye n'endagaano ye ei yakozire na baisenkurubo, n'ebigambo ebi yabahabwire. Bakaramya abacwezi ab'ebisuba, nabo nukwo kufooka banyabisuba. “Embuzi erwaire obunyamunwa togisibika n'eyawe;” bakakwata engeso ez'amahanga agakaba gabeehinguliriize, MUKAMA aga akaba abantangire naagamba ati: “Mutalikora nk'abo.”

¹⁶Ebiragiro bya MUKAMA Ruhanga wabo byona, bakabyanga baayekorra enyana ibiri ezi baayagize omu bintu eby'omu itaka; baakora n'ekisisani eky'omucwezi Asera, baaramya ebintu byona eby'omu mwanya, kandi baahereza Baali.

¹⁷Bakookya batabani baabu na bahara baabu babe bihongwa, baabandwaga kandi baarogaga, bakeemarra ha kukora ebintu ebibi MUKAMA ebi atagonza, nukwo kumubiihiza.

¹⁸Habweki, MUKAMA akabiihirirwa muno Abaisirairi, nukwo kubahwerekereza hatasigale n'omu, okwihaho oruganda rwa Yuda rwonka.

¹⁹Oruganda rwa Yuda narwo rutakwate Ebiragiro bya MUKAMA Ruhanga wabo, baitu bakakwata engeso Abaisirairi ezi bakaba baleesire.

²⁰MUKAMA nukwo kutonda abaijukuru ba Isirairi yababonabonesa, yabalekera abanyagi babanyaga, okuhika obu yabahwerekeriize yabamaraho.

²¹MUKAMA obu yamazire kwiha Isirairi omunju ya Daudi, Yerobbowamu mutabani wa Nebati nuwe baafoora MUKAMA. Yerobbowamu akabatanga kukuraatira MUKAMA, yabakoza ebibi ebitagambwa.

²²Abaisirairi ebibi byona Yerobbowamu ebi yakozire batabireke,

²³okuhika MUKAMA obu yabahwerekeriize yabamaraho nkooku akaba agambire naaraba omu baheereza be boona abarangi. Abaisirairi nukwo kusuuhurwa baaruga omunsi yabo yonyini baatwarwa Asiriya nambere bali okuhika na hati.

²⁴OMUKAMA w'Asiriya, akaiha abantu; Babbulooni, Kuusa, Ava, Hamasi, na Sefavaimu, yabata omu mbuga za Samaliya, omu kiikaro ky'abantu ba Isirairi; Baalya ensi Samaliya, baikara omu mbuga zaayo.

²⁵Obu bakaba nibakyatandika kwikara oku, batatiine MUKAMA; na uwe nukwo kubanagamu entale, ezaisire abamu omuli bo.

²⁶Abantu bakagambira omukama w'Asiriya ngu; “abantu aba watwaire wata omu mbuga za Samaliya, tibamanyire biragiro bya ruhanga ow'ensi egi”.

²⁷Nubwo omukama w'Asiriya yaragiire ati: “Mutwekeyo omu ha banyakatagara aba mwaihireyo, agende aikaleyo, nuwe araabeegesa ebiragiro ebya ruhanga ow'ensi egi.”

²⁸Aho omu ha banyakatagara aba bakaba baihire Samaliya akagenda yaikara Beseeri, yayegesa abantu nkooku basemeriire kutiina MUKAMA.

²⁹Baitu nabwo, buli ihanga likoongera kwekorra baaruhanga baalyo, baabata omu maju ag'ebiikaro eby'ekitiinisa Abasamaliya ebi bakaba bombekere, buli ihanga erikaba liri omu mbuga ezi lyaikaramuga;

³⁰abantu aba Babbulooni bakakora Sukoosi-be-nosi; aba Kuusi bakakora Neregaali; aba Hamasi bakakora Asima,

³¹kandi ab'Ava bakakora Nibuhaazi na Tarutaaki; aba Savaimu baikara nibokya abaana baabu nibabahongera baaruhanga baabu. Aduramaleki n'Anameleki baaruhanga aba Sefavaimu.

³²Abantu abo nabo, baatiinaga MUKAMA, bakeekomamu abantu aba buli mulingo, baabafoora banyakatagara aba ha biikaro ebi eby'ekitiinisa, nubo baabatambiraga ebyonzira omu biikaro ebi eby'ekitiinisa.

³³Nukwo, baatiinaga MUKAMA, baitu kandi baaheerezaaga baaruhanga baabu, nibahondera engeso ez'amahanga aga bakaba baihirwemu. “Haa, obunura bubiri bwata amatama, abinga ibiri imusiga.”

³⁴Nahati hoona, engeso yabo egi eya ira bakyagirumu. Tibaatiina MUKAMA, tibakuratira biragiro, tibakwata bigambo MUKAMA ebi yaragiire abaana ba Yakobbo ou yarukire ibara Isirairi.

³⁵MUKAMA akakora nabo endagaano yabateererra ati mutalikisura mukaramya baaruhanga abandi, mutalibainamira, mutalibaheereza kandi mutalibatambira ebyonzira.

³⁶Mutiinege nyowe MUKAMA ayabaihire omunsi Misiri, ninyoleka obusobozi n'amaani; ninyowe mwinamirege kandi ninyowe mutambirege ebyonzira.

³⁷Mutehoga omutima okuhikiriza ebiragiro n'okukwata ebigambo ebi nabahandikiire, mutaliramya baaruhanga abandi,

³⁸mutalyebwa endagaano ei nakozire nainywe, mutalitiina baaruhanga abandi,

³⁹baitu mutiinege nyowe MUKAMA Ruhanga wanyu, ninyowe ndibajuna abanyanzigwa banyu.

⁴⁰Baitu nabwo bakalema kuhurra, baakakora byona nibakuraatira engeso zaabo ezaira.

⁴¹Abantu abo nukwo baatiinaga MUKAMA bati, kandi nukwo baaheerezaaga baaruhanga baabo ababaizirwe omu miti rundi omu mabaale; abaana baabo n'abaijukuru baabo nka baisenkurubo oku baakozire, nabo nukwo barukukora na ha kiro kinu. Mazimakwo “Embeba enkuru, niyo eyegesa ento kupekenya.”