Read Runyoro - rutooro 2 Bakam 18 Bible Online

2 Bakam 18 - Runyoro - rutooro bible

2 Bakam 18

¹Omu mwaka ogwa kasatu ogw'engoma ya Hoseya mutabani w'omukama wa Isirairi, Hezekiya mutabani w'Ahazi omukama wa Yuda, nubwo yatiire engoma.

²Nambere yatandikiire kulema, akaba ahikize emyaka amakumi abiri n'etaano, akalemera emyaka amakumi abiri na mwenda omu rubuga Yerusaalemu. Ibara lya nyina nuwe Abi muhara wa Zekariya.

³Akakora ebirukusemeza MUKAMA nka isenkuru Daudi oku yakozire.

⁴Ebiikaro eby'ekitiinisa eby'okuramizaamu akabihwerekereza, yacwacwana enyomyo, yatematema ekisisani ky'omucwezi Asera. Enjoka ey'omulinga eyakozirwe Musa yagicebaceba, habwokuba okuhika omu businge obu, Abaisirairi bakaba nibakyagyoterra obubbaani; ibara lyayo yayetwaga Nehusitaane.

⁵Hezekiya ogu, yayesigaga MUKAMA Ruhanga owa Isirairi, habweki omu bakama ba Yuda boona abaamukurasire, rundi abaamwebembiire, hatabeho n'omu arukumwingana.

⁶Habwokuba akagumira hali MUKAMA; atamurugeho, kandi yakwataga ebiragiro ebi yaragiire Musa.

⁷Hoona hoona Hezekiya ha yakagendaga, yaikaraga na MUKAMA, kyona eki yakakoraga, kyamugenderaga kurungi. Akeemera omukama w'Asiriya, yayanga kumuheereza.

⁸Akasingura Abafirisiti, okuruga ha munaara ogw'abalinzi okuhika ha rubuga oruzitiriirwe, okuhikira kimu Gaza naha mutaano gwayo.

⁹Omu mwaka ogwa kana ogw'engoma ya Hezekiya, ogukaba guli gwa musanju ogw'engoma ya Hoseya mutabani w'Ela omukama wa Isirairi, Salumaneseeri omukama w'Asiriya nubwo yaramagiire Samaliya yagigota,

¹⁰emyaka esatu obu yahoireho, yagihamba. Omu mwaka ogwa mukaaga ogw'engoma ya Hezekiya, ogukaba guli mwaka gwa mwenda ogw'engoma ya Hoseya omukama wa Isirairi, Samaliya nubwo yahambirwe.

¹¹Omukama w'Asiriya, Abaisirairi akabatwara Asiriya, bali banyankomo, abamu yabata omu rubuga Haala, abamu yabata haihi n'ekisaaru Habora ekinyakuli omu isaza erya Gozani, abandi yabata omu mbuga eza Media.

¹²Habwokuba batahurre MUKAMA Ruhanga wabo, bakacwa endagaano ye, n'ebiragiro byona Musa omwiru wa MUKAMA ebi yaragiire; batateho mutima kubihuliriza n'okubihikiriza.

¹³Omu mwaka ogwa ikumi n'ena ogw'engoma ya Hezekiya, Senakeribu omukama w'Asiriya, nubwo yaramagiire embuga ezikaba zizitiriirwe zaaguma, yazihamba.

¹⁴Hezekiya omukama wa Yuda, nukwo kutumaho omukama w'Asiriya ow'akaba ali omu rubuga Lakisi naagamba ati: “Nkasobya lekera aho kunseesira; kyona eki oraasaba, ndakikuha.” Omukama w'Asiriya yasaba Hezekiya Omukama wa Yuda, efeeza talenta ebikumi bisatu, na talenta makumi asatu eza zaabbu.

¹⁵Hezekiya, efeeza yoona eyasangirwe omunju ya MUKAMA, n'eyasangirwe omu maahurro ag'enju y'Omukama yagiha Omukama w'Asiriya.

¹⁶Omu kasumi ako, Hezekiya Omukama wa Yuda nubwo yahomoire zaabbu ei akaba asiigire ha nyigi ez'enju ya MUKAMA na ha mikumirro, nayo yagiha Omukama w'Asiriya.

¹⁷Omukama w'Asiriya, akatuma Tarutaahi, Rabusaari, na Rrabusaake, baaruga Lakisi baina ihe erikooto, baramagire Hezekiya ow'akaba ali Yerusaalemu. Baagenda baahika Yerusaalemu. Obu baataahire baija baayemerra ha mukura ogw'ekiyanja eky'eruguru, ekinyakuli ha muhanda ogwatwaraga ha musiri gw'omwogi w'engoye.

¹⁸Obu baayeesire nibenda kurora Omukama, Eliakimu mutabani wa Hilkia ayarolerraga ekikaali, Sebuna omuhandiiki ow'eby'ensita, na Yoha mutabani w'Asafu omukwasi w'amakuru, nubo baabahikireho.

¹⁹Rrabusaake yabagambira ati; Irooko mugende omba Hezekiya mumugambire muti: “Ow'ekitiinisa Omukama w'Asiriya naagamba ati: ‘Ngu, kiki ekiraakwesa mwesigwa?’

²⁰Nooteekereza oti ebigambo bugambo niyo entegeka n'amaani ebyetaagwa omu bulemu? N'oha ogu ou wayesigire, ayakuleeteriize kunnyemera?

²¹Misiri, orumuli oru orunyakucwekere, oruliteera omukono ogwa buli muntu ow'alirwigamira niyo orukwesiga. Faraaho Omukama wa Misiri, nukwo ali ati ha bantu boona abanyakumwesiga.

²²Baitu kakuba nimmungambira muti: Nitwesiga MUKAMA Ruhanga waitu,” ogu, tinuwe MUKAMA w'ebiikaro eby'ekitiinisa n'amatambiro Hezekiya aga yaseesire naagambira Abayuda n'aba Yerusaalemu ati: “Muliramiza Yerusaalemu, omumaiso g'itambiro linu?”

²³Hati nu, mukama wange Omukama w'Asiriya, mwije mumuteereho omusimbo, obu muraasobora okweserurra abantu ab'okutemba embaraasi, ninyija kubaha embaraasi enkumi ibiri.

²⁴Obu muraaba nimwesiga Misiri, niyo kubaha ebigaali n'embaraasi musobora muta kubinga omuserikale omu baheereza ba mukama wange arukukirra kimu obuto?

²⁵Kandi ekindi, nimuteekereza, nkaseesira ekiikaro kinu nkihwerekereze, MUKAMA atandagiire? Nuwe yangambiire ati: “Irooko ogende oramagire ensi egi, ogihwerekereza.”

²⁶Eliakimu mutabani wa Hilukia, Sebuna na Yoha, nubwo baagambiire Rrabusaake bati: “Nitukusaba otubalize n'abaheereza bawe omu ngambo ey'Abaramu. Habwokuba nitugikenga otatubaliza engambo ey'Abayuda ey'erukuhulirwa abantu abanyakuli ha rugo.”

²⁷Rrabusaake akabakaguza ati: “mukama wange akantuma ebigambo binu kubigambira MUKAMA wange, inywe ndeke kubigambira abantu abanyakuli ha rugo, abarukwija kulya hamu nainywe iswa ly'abu lyonyini n'okunywa hamu na inywe enkali yabo yonyini.”

²⁸Hanyuma Rrabusaake nubwo yayemeriire yayamirra omu ngambo ey'Abayuda naagamba ati: “Muhurre ebigambo Ow'ekitiinisa, Omukama ow'Asiriya!

²⁹Omukama ogu, binu nibyo arukugamba: ‘Hezekiya muleke kumwikiriza tarukwija kusobora kubajuna akabaanyihaho.

³⁰Muleke kwikiriza Hezekiya kubahambiriza kwesiga MUKAMA, naabagambira ati: Mazimakwo, MUKAMA naija kutujuna, orubuga runu tirurukwija kuheebwa Omukama w'Asiriya.’

³¹Hezekiya ebi arukugamba mutabiikiriza; habwokuba Omukama w'Asiriya naagamba ati: ‘Mugarukanganemu na nyowe, kandi mwije nambere ndi; buli omu omuli inywe, nubwo alirya ha muzaabbibu gwe nyabwe, nubwo alirya ha mutini gwe nyabwe, nubwo alinywa ha maizi ag'omu iziba lye nyabwe,

³²okuhika obu ndikaija nkabatwara omunsi eyerukusisana nk'ensi yanyu, ensi enyakurumu engano n'eviini, enyakurumu emigaati, engonjo ez'emizaabbibbu, enyakurumu emiti ey'emizaabbibbu n'obwoki bw'enjoki, nubwo mulyomeera, orufu tirulibahikaho. Hezekiya obu araabahabisa naagamba ngu; MUKAMA naija kutujuna mutamwikiriza.

³³Harabaireho omu ha baaruhanga ab'amahanga ayajunire ensi ye, akagiihaho Omukama w'Asiriya?

³⁴Abakama aba Hamasi n'ab'Arupaadi baraha? Kandi aba Sefavaimu, Hena n'aba Liva, baraha? Barajunire Samaliya bakaginyihaho?

³⁵Omu baaruhanga boona ab'ensi, abaajunire ensi zaabo bakazinyhaho nibaha, nukwo mugambe ngu na MUKAMA nukwo araajuna Yerusaalemu aginyiheho?’ ”

³⁶Abantu bakaculeera, tibaamugarukamu kigambo, habwokuba Omukama akabaragira naagamba ati: “Mutamugarukamu.”

³⁷Eliakimu ayaroleerraga ekikaali mutabani wa Hilukia, Sebuna omuhandiiki w'eby'ensita, na Yoha mutabani w'Asafu omukwasi w'amakuru, nubwo baagenzire omba Hezekiya, bajwaire engoye zaabo ezitaagukire, baamugambira Rrabusaake ebi yagambire.