Read Runyoro - rutooro 2 Bakam 19 Bible Online

2 Bakam 19 - Runyoro - rutooro bible

2 Bakam 19

¹Omukama Hezekiya obu yahuliire ebigambo ebi, yatemura eby'okujwara bye, yajwara eguniya, yataaha omunju ya MUKAMA.

²Akatuma Eliakimu ayaroleerraga ekikaali, Sebuna omuhandiiki w'eby'ensita, n'abanyakatagara abakuru bajwaire eguniya, baagenda mb'omurangi Isaaya mutabani w'Amozi.

³Baamugambira bati: “Hezekiya naagamba ati: Ekiro kinu, kiro ky'obujune, ky'okuhana, kandi ky'okuswazibwa; abaana bahikire kuzaarwa, baitu ow'okubazaara, taina maani ag'okubazaara.

⁴Ebigambo byona, Rrabusaake ayatumirwe mukama we Omukama w'Asiriya kugaraniiza MUKAMA omwomeezi, ebi agambire MUKAMA abihurre, kandi abo abaabigambire abafubire; habweki abantu abo abanyakusigaireho obasabire.”

⁵Abaheereza b'Omukama Hezekiya obu baahikireho Isaaya,

⁶Isaaya yabagambira ati: “Mugende mugambire mukama wanyu muti: ‘MUKAMA naagamba ati: Ebigambo ebi muhuliire abaheereza b'Omukama wa Asiriya ebi baagambire nibanjuma, bireke kubatiinisa.

⁷Ninyija kumutamu omwoyo, nukwo ahurre orugambo agaruke omu nsi ye; omu nsi ye oku, nuho ndimwisiza ekitara.’”

⁸Rrabusaake yagaruka, yasanga Omukama w'Asiriya naarwana na Libuna; habwokuba akahurra ngu; Omukama Lakisi arugireyo.

⁹Omukama obu yahuliire Tiruhaaka Omukama w'Esopiya nkooku aimukize kwija kumurwanisa, yatuma abakwenda obwakabiri hali Hezekiya naagamba ati:

¹⁰“Hezekiya Omukama wa Yuda omugambire oti: ‘Ruhanga wawe ou oyesiga, otamwikiriza kukubiiha ngu: Yerusaalemu teriheebwa Omukama w'Asiriya.

¹¹Okahurra Omukama w'Asiriya ensi zoona eki yazikozire, nkooku yazihwerekeriize. Kandi iwe, niiwe oraatabuka?

¹²Amahanga baisenkurunyowe aga baahwerekeriize: Gosani, Harani, Rezefu, n'abantu ab'Edeni abakaba bali Telasaari, baaruhanga baago bakakoraho ki?

¹³Omukama owa Hamasi, ow'Arapadi, owa Sefavaimu, owa Hena n'owa Liva, baraha?’”

¹⁴Hezekiya yaihaho abakwenda ebbaruha, yagisoma; yagenda omu nju ya MUKAMA, yagimwanjururra omumaiso.

¹⁵Yayesengereza MUKAMA naagamba ati: “Ai MUKAMA Ruhanga owa Isirairi anyakusingire ha kitebe ky'obukama eruguru ya Bakerubbi, iwe wenka niiwe Ruhanga, anyakulema abakama boona ab'ensi; niiwe ayahangire iguru n'ensi.

¹⁶Ai MUKAMA, otege okutu ohurre: ziburra amaiso gawe orole; ohurre ebigambo Senakeribu ebi yagambire, ebi yatumire kujaalimya Ruhanga omwomeezi.

¹⁷Ai MUKAMA, kyamazima, abakama b'Asiriya bahwerekeriize amahanga n'ensi zaago,

¹⁸baaruhanga baago bakabanaga omu murro; habwokuba bakaba batali baaruhangakwo, baitu bakakorwa emikono y'abantu, baaruhanga abaakozirwe omu miti n'omu mabaale; nikyo baabahwerekereriize.

¹⁹Hati nu, Ai MUKAMA Ruhanga waitu, nkwesengeriize, omutujune, abakama boona ab'ensi, nukwo bamanye iwe wenka MUKAMA, nkooku niiwe oli Ruhanga wenka.”

²⁰Isaaya mutabani w'Amozi nubwo yatumireho Hezekiya naagamba ati: “MUKAMA Ruhanga owa Isirairi maagamba ati: esaara yawe onsomiire erukubaza hali Senakeribu Omukama w'Asiriya, ngihuliire.

²¹Kinu nikyo ekigambo MUKAMA eki amugambireho: Muhara wa Siyoni empikirre, naakugaya, naakunuga; abantu ba Yerusaalemu nibakuhungiza omutwe,

²²N'oha ou ohiganiize kandi ou ojumire? N'oha ou okayukiire kandi ou ohimbisize amaiso? N'ogu Arukwera owa Isirairi!

²³Okagaaniiza MUKAMA nooraba omu bakwenda bawe, kandi okagamba oti: ‘nkeekonyeza ebigaali byange ebingi, natemba ensozi eziraihire, ha butwetwe oburaihire muno obwa Lebanoni; nkatemba emikogoto erukukirra kimu okuraiha, emisambya erukukirra kimu oburungi; nkarutaahira kimu nahika ha mutaano gwarwo ogurukukirra kimu kuba hara. N'omu kibira kyarwo ekirukukirra kimu kubamu emiti.

²⁴Nkalima amaziba nanywa amaizi ag'abanyamahanga, kandi akarubaatirra obwambu bwona obwa Misiri nabwomya.’

²⁵Tokahurraga eki nkooku nakitegekere ira muno? Eki ndukuhikiriza hati, nkakiteekaniza omu biro ebya ira, embuga ezi zitiriirwe ozifoole bikambuuro,

²⁶Abantu abakaba bali oku, bakaba bataina maani; bakaba bali batiini kandi balemesiibwe. Baasisanaga obunyansi obw'omu musiri rundi ebinyansi ebya ha rusa rw'enju, obu biteerwa omuyaga ogw'amaani ogw'obukiizi obw'emoso.

²⁷Nkumanyire kurungi muno, mmanyire kyona eki okora, na hoona mambere okagenda, Obu oturuka aheeru rundi obu otaaha omu nju, nabwo mmanya, mmanya noobu ombiihirirwa.

²⁸Habwokuba okambiihirirwa kandi nkahurra nkooku orukwehemba, ninyija kukudubura enyindo n'irobo lyange, nkwigale akanwa n'ekyoma kyange eki nta omu kanwa k'embaraasi; nkurabye omuhanda ogwakuleesire, nkugarreyo!

²⁹Kinu nikyo olimanyiraho: Mwaka gunu, noija kulya ebyokulya ebyayemereze, n'omu mwaka ogwa kabiri; hanyuma omu mwaka ogwakasatu, musige kandi mugese mubyale engonjo ez'emizaabbibbu, nizo mulyemu ebijuma.

³⁰Abaliba basigaireho ha Baayuda, baliimuka buhyaaka, basisane nk'ebibyarwa ebinyakumera bikaana ebijuma;

³¹habwokuba omu Yerusaalemu halirugayo abaliba basigaireho, ha rusozi Siyoni naho halirugayo omuganda ogw'abasigaireho. Engonzi za MUKAMA nizo zirikora eki.

³²Habweki, binu nibyo MUKAMA yagambireho Omukama w'Asiriya ati: Orubuga runu talirutaaha, rundi kururasamu omusogi, rundi kurwija omumaiso akwasire engabu, rundi kurutuumaho entuumo y'itaka. MUKAMA naagamba ati:

³³Omuhanda ogwamuleesire, nugwo gulimugarrayo, kandi orubuga runu talirurubatamu,

³⁴Habwokuba habwange na ha bw'omwiru wange Daudi, ndirwanirra orubuga runu ndujune.”

³⁵Kiro eki, malaika wa MUKAMA akagenda omu rukande rw'Abasiriya, yaita abantu akasiiriira kamu n'emitwaro munaana; abantu obu baimukire nyenkya, bakasanga emitumbi ekarangataine.

³⁶Nubwo Senakeribu Omukama yarugire aho yataaha omuka, yaikara omu rubuga Nineeve.

³⁷Kiro kimu obwakaba naaramya omunju ya Nisirooki ruhanga we, Aduramaleki na Sarezeeri batabani be, baamwisa ekitara, baayeirukira, baatoma ogw'omunsi y'Ararati. Mutabani we Esari-hodooni yateera engoma omu kiikaro kye.