Read Runyoro - rutooro 2 Bakam 2 Bible Online

2 Bakam 2 - Runyoro - rutooro bible

2 Bakam 2

¹MUKAMA obwakaba ali haihi kutwara Eriya omu igura naamurabya omu kairiringwa, Eriya n'Erisa bakaba nibaruga Girugaali.

²Eriya yagambira Erisa ati: “Nkwesengeriize, omale hanu akasumi, habwokuba MUKAMA antumire Beeseeri.” Baitu Erisa yagamba ati: “Ndahiire Ruhanga omwomeezi kandi na iwe ninkurahira, tindukwija kukurugaho.” Nubwo baagenda Beeseeri.

³Abaana b'abarangi abakaba bali Beeseeri, bakahikaho Erisa baamukaguza bati: “Omanyire kiro kya hati MUKAMA nkooku arukwija kukwihaho mukama wawe?” Erisa yagarukamu ati: “Ego, eki nkimanyire;” Eriya yagamba ati: “Oculeere tutakibazaaho.”

⁴Eriya yagambira Erisa ati: “Nkwesengeriize, omale hanu akasumi: habwokuba MUKAMA antumire Yeriko.” Erisa yagamba ati: “Ndahiire Ruhanga omwomeezi, kandi na iwe wenka ninkurahira, tindukwija kukurugaho.”

⁵Abaana b'abarangi abakaba bali Yeriko, bairra haihi Erisa baamukaguza bati: “Omanyire kiro kya hati, MUKAMA nkooku arukwija kukwihaho mukama wawe?” Erisa yagarukamu ati: “Ego, eki nkimanyire; Eriya yagamba ati oculeere, otakigamba.”

⁶Nubwo Eriya yamugambire ati: “Nkwesengeriize, omale hanu akasumi: habwokuba MUKAMA antumire Yorudaani.” Baitu Erisa yarahira ati: “Ndahiire Ruhanga omwomeezi kandi na iwe wenka ninkurahira, tindukwija kukurugaho.” Aho ababiri abo, baagenda hamu.

⁷Abantu amakumi ataano ab'abaana b'abarangi nabo baagenda, baayesungusura banu bombi nkooku bakaba beemeriire Yorudaani.

⁸Nubwo Eriya yakwasire omwenagiro gwe, yagukuba, yateera amaizi, gaayebaganizaamu habiri, ababiri abo baayambuka, nibarubata ha itaka eryoomere.

⁹Obu baamazire kwambuka, Eriya yagambira Erisa ati: “Saba eki orukwenda nkukorre ntakakurugireho.” Erisa yagamba ati: “Nkwesengeriize, ongwetere kabiri omwoyo gwawe.”

¹⁰Eriya yagarukamu ati: “Osabire ekintu ekirukuguma; baitu obu orandora nkooku ndukukwihwaho, nubwo oraatunga omwoyo gwange.”

¹¹Obu bakaba nibakyagenda kandi nibabaza, ahonaaho, ekigaali eky'omurro ekikaba nikicundwa embaraasi ez'omurro kyabaija hagati, Eriya akairiringwa kaamuhwangura kaamutwara omwiguru.

¹²Erisa yarora akairiringwa yayamirra ati: “Isenyowe Isenyowe!” Ebigaali bya Isirairi n'abatembi b'embaraasi ze! Baitu atongere kumurora. Nubwo yakwasire ebyokujwara bye, yabitemuramu habiri.

¹³Hanyuma yakoma omwenagiro gw'Eriya ogwamuragaire, yagarukayo, yayemerra ha musa gw'ekisaaru Yorudaani,

¹⁴yagukwata, yateera amaizi naagamba ati: “MUKAMA Ruhanga w'Eriya araha?” Obu yatiire amaizi, gaayebaganizaamu ha biri; yayambuka.

¹⁵Batabani b'abarangi abakaba bali Yeriko obu bamuboine nkooku ayambukire kubarwanisa, baayekaguza bati: “Omwoyo gw'Eriya gutembere Erisa?” Baija kumutangirra, baajuumara hansi omumaiso ge.

¹⁶Baamugambira bati: “Itwe abairu bawe tuli n'abasaija ab'amaani amakumi ataano; tukwesengeriize, ka tugende n'abo tuserre mukama wawe; rundi Mwoyo wa MUKAMA amutwaire yamunaga ha rusozi, rundi omu kihanga.” Uwe yagarukamu ati: “Nangwa mutagenda.”

¹⁷Baitu baamuhambiriza, okuhika obu yayorobere yabaikiriza. Abantu amakumi ataano hali bo, baagenda, baaserra Eriya hansi na haiguru okumara ebiro bisatu, baitu batamuzoole.

¹⁸Baagaruka hali Erisa baamusanga akyali Yeriko, yabakaguza ati: “Ntabatange nti mutagenda?”

¹⁹Abantu ab'omu rubuga bakagambira Erisa bati: “Orubuga runu rurungi, na iwe wenka nkooku orukurora; baitu amaizi nugo mabi kandi itaka tiriina rwezo.”

²⁰Erisa yagamba ati: “Mundeetere ebbakuli empyaka, mugitemu ekisura.” Baagimuleetera.

²¹Nubwo yagenzire ha nsoro y'amaizi, yaseesamu ekisura, yagamba ati: “MUKAMA naagamba ati, Amaizi ganu nagasemeza; okuruga hati, tigaligaruka kwita abantu rundi kwihamu abakazi enda.”

²²Okuruga abu n'okuhika hati, amaizi nukwo kuba marungi Erisa nkooku yagambire.

²³Obu yarugire oku, yagenda Beseeri; obwakaba akyali omu muhanda naagenda, haija aboojo abato baaruga omu rubuga, baamusekeereza nibagamba bati: “Ruga hanu ogende iwe ow'oruhara.”

²⁴Erisa yakubuutuka, obu yababoine, yabakyena omu ibara lya MUKAMA. Edubu ebuguma ibiri, nukwo kujumbuutuka omu kibira, zaataagataagura aboojo amakumi ana na babiri abo.

²⁵Obu yarugire oku, akagenda ha rusozi Karumeeri, obu yarugire Karumeeri, yagaruka Samaliya.