Read Runyoro - rutooro 2 Bakam 20 Bible Online

2 Bakam 20 - Runyoro - rutooro bible

2 Bakam 20

¹Omu biro ebi, Hezekiya akakwatwa endwara yahitwa. Isaaya omurangi mutabani w'Amozi akamuhikaho yamugambira ati: “Binu nibyo MUKAMA arukugamba: ‘Ogwete, habwokuba noija kufa toli w'okukikira.’”

²Nubwo Hezekiya yakubuutukire yarolerra ekisiika, yayesengereza MUKAMA naagamba ati:

³“Ai MUKAMA nkwesengeriize, oijuke nkooku nakoraga ebi orukwenda, n'obwesige kandi n'omutima gwange gwona, nakoraga eki orukusiima.” Nubwo yatandikire kurra.

⁴Isaaya obwakaba atakarugire omu zigati eya hagati, MUKAMA yamugambira ati:

⁵“Kubuutuka ogende ogambire Hezekiya omulemi w'abantu bange oti: Binu MUKAMA Ruhanga wa Sso nibyo arukugamba: Esaara yawe ngihuliire, n'amaizi ag'omumaiso gawe ngaboine, habweki ninyija kukukiza; ha kiro ekya kasatu, oligenda omunju ya MUKAMA.

⁶Habwomeezi bwawe, ninyija kwongeraho emyaka ikumi n'etaano, ndikujuna hamu n'orubuga runu, mbaiheho Omukama w'Asiriya, orubuga runu ndirurwanirra habwange na habw'omuheereza wange Daudi.”

⁷Isaaya yagamba ati: “Muleete ekitonge ky'ensaano y'emitini, mukite nambere arwaire ekizimba, nukwo akire.”

⁸Hezekiya yakaguza Isaaya ati: “Ndamanyira nkaha MUKAMA nkooku arankiza, kandi nkooku ndigenda omunju ye ha kiro ekya kasatu?”

⁹Isaaya yamugarukamu ati: “Kanu nuko akarorwaho ka MUKAMA, akolimanyiraho eki yaraganiize nkooku alikikorakwo: Nooyenda ekiituuru kyeyongere omumaiso amatembero ikumi, rundi kigaruke enyuma amatembero ikumi?”

¹⁰Hezekiya yagarukamu ati: “Tikirukulemeera ekiituuru kugenda omumaiso amatembero ikumi, eky'obulemeezi nukwo kugaruka enyuma amatembero ikumi; haakiri kigarre enyuma.”

¹¹Isaaya omurangi akaterra MUKAMA enduuru; MUKAMA yagarra ekiituuru enyuma amatembero ikumi, izooba aga likaba lisirimukireho, okurorra ha rulengo rw'Ahazi.

¹²Omu kasumi ako, Merodaakibaladaani mutabani wa Baladaani Omukama wa Babbulooni akatuma abakwenda, abahaire ebbaruha n'ekisembo, bakitwarre Hezekiya; habwokuba akaba ahuliire ngu Hezekiya akaba arwaire.

¹³Hezekiya akabajwahukirra, yabarambuza enju ey'ekaba erumu obuguuda bwe bwona: efeeza, zaabbu, ebintu ebirukuboya, amagita ag'omuhendo, eby'okurwanisa bye, byona ebikaba biri omu mahurro, hatabeho kintu na kimu ekikaba kiri omunju rundi omunsi ye eki ataraboolekere.

¹⁴Hanyuma Isaaya omurangi akagenda mb'Omukama Hezekiya yamukaguza ati: “Abantu banu nibaruga ha, kandi bakugambiire ki?” Hezekiya yagarukamu ati: “Barugire omunsi eya hara, niyo Babbulooni.”

¹⁵Yakaguza ati: “Omunju yawe baboinemu ki?” Hezekiya yagarukamu ati: “Baboine byona ebi nyakurumu. Busaho na kimu ekinyakuli omu maahuurro gange eki ntaboolekere.”

¹⁶Nubwo Isaaya yagambiire Hezekiya ati: “Ohurre MUKAMA eki arukugamba;

¹⁷Akasumi kalihika, ebi byona ebinyakuli omunju yawe, na biri baswenkuru ebi baayahwire okuhika omu kasumi kanu, nibiija kutwarwa Babbulooni; tihalisigaraho kintu na kimu, MUKAMA nukwo arukugamba.

¹⁸Abamu batabani bawe aba wazaire, nabo balitwarwa; baliba bakonwa omu kikaali ky'Omukama wa Babbulooni.”

¹⁹Hezekiya nubwo yagambiire Isaaya ati: “Ekigambo kya MUKAMA eki ogambire kirungi.” Habwokuba akateekereza ati: “Eki obu kiraaba kiri ky'okundugiramu obusinge n'okugwagwana obwomeezi bwange bwona, bulyo ki oburukutanga kubatwara?”

²⁰Ebintu ebindi Hezekiya ebi yakozire, amaani ge nkooku yalimire ekiyanja n'omukura yataahya amaizi omu rubuga, ebi byona bikahandiikwa omu kitabu eky'obusinge obw'abakama ba Yuda.

²¹Hezekiya akafa nka baisenkuru oku baafiire; mutabani we Manaase yateera engoma.