Read Runyoro - rutooro 2 Bakam 21 Bible Online

2 Bakam 21 - Runyoro - rutooro bible

2 Bakam 21

¹Manaase ha yateeriire engoma akaba ahikize emyaka ikumi n'ebiri, akalemera emyaka amukumi ataano n'etaano omu rubuga Yerusaalemu. Ibara lya nyina, nuwe Refuba.

²Manaase akakora MUKAMA ebi akaba atarukusiima, naakora ebintu ebibi amahanga MUKAMA aga yabingire ebi gaakoraga, Abaisirairi batakahikire omunsi egi.

³Ebiikaro eby'ekitiinisa eby'okuramizaamu, Hezekiya isenkuru ebi akaba aseesire, akabyombeka buhyaka; yayombekera omucwezi Baali amatambiro, yakora ekisisani ky'omucwezi Asera, Ahabbu Omukama wa Isirairi nkooku akaba akozire; akaramya ebintu byona eby'omwiguru, yataho n'okubikorra.

⁴Omunju ya MUKAMA, MUKAMA ei yabalizeeho naagamba ati: “Yerusaalemu nuho ndaaramizibwaga,” akombekamu amatambiro,

⁵Kandi ebintu byona eby'omwiguru nabyo akabyombekera amatambiro, omu zigati ibiri ez'enju ya MUKAMA.

⁶Akookya omwana we abe kihongwa eky'okwokya, yaraguraga kandi yababandwaga, yayetahoga abaandwaga emizimu n'abarogo. Akakora bingi MUKAMA ebi akaba atarukusiima, yamukwasa ekiniga.

⁷Ekisisani ky'omucwezi Asera eki akaba akozire, akakita omu nju MUKAMA ei yagambiireho Daudi na Solomooni omwana we ati: “Omunju enu, n'omu Yerusaalemu omu rubuga runu oru nayegomboize omu nganda zoona eza Isirairi, nuho ndaaramizibwaga obusinge n'obusinge.

⁸Abaisirairi obu balikwata ebiragiro byange byona, bakahikiriza n'ebiragiro byona omwiru wange Musa ebi yabaragiire, ensi ei nahaire baisenkurubo, tindibaikiriza kugibingwamu.”

⁹Baitu batahurre, kandi Manaase akaboohya, yabakoza ebibi bingi muno okukira amahanga MUKAMA aga yahwerekeriize batakahikire.

¹⁰MUKAMA akagambira omu baheereza be abarangi ati:

¹¹“Manaase Omukama wa Yuda nkooku akozire ebintu ebibi ebirukwingana aho, ebibi okukira Abamooli boona abaamwebembiire ebi baakozire, yanaga Yuda omu kibi naayekonyeza abacwezi be;

¹²habweki MUKAMA Ruhanga wa Isirairi naagamba ati: Ninyija kuleetera Yerusaalemu na Yuda akabi akatagambwa, akalitiinisa weena ow'alikahuurra.

¹³Yerusaalemu ndigifubira nkooku nafubiire Samaliya, nkooku nakozire Omukama Ahabbu owa Isirairi n'abaijukuru be. Ninyija kugimaramu abantu baayo, omuntu nkooku aragaza esahaani omunda n'aheeru.

¹⁴Abantu bange abaasigaireho ninyija kubaihamu ebyaara, mbalekere abanyanzigwa baabu, babasaalize kandi babanyage,

¹⁵habwokuba okuruga ha kiro baisenkurubo eki baarugiireho omu nsi Misiri n'okuhika hati, bakakora eki ntarukwenda, bambiihiza.”

¹⁶Kandi ekindi, Manaase akaita abantu baingi muno abataina musango, okuhika obu yaijwize Yerusaalemu yoona okuruga ha mutaano ogumu okuhika ha mutaano ogundi, eki kyayongerwa ha kibi kye eki yanagiremu Yuda, naamukoza ebirukubiihiza MUKAMA.

¹⁷Ebintu ebindi Manaase ebi yakozire, n'ekibi eki yakozire bikahandiikwa omu kitabu ekinyakwetwa eky'obusinge bw'abakama ba Yuda.

¹⁸Manaase akafa nka baisenkuru oku baafiire, yaziikwa omu musiri ogw'omu kikaali kye, omutabani Amoni yateera engoma omu kiikaro kye.

¹⁹Amoni ha yateeriire engoma, akaba ahikize emyaka amakumi abiri, akalemera emyaka ebiri omunsi Yerusaalemu. Ibara lya nyina muhara wa Haruzi owa Yotiba, nuwe Mesulemesai.

²⁰Akakora ebinyakubiihiza MUKAMA nka Manaase ise oku yakozire.

²¹Akaheereza abacwezi ise aba yaheeriize, yabaramya n'okubaramya;

²²akafuruka MUKAMA Ruhanga owa baisenkuru, tiyakora eki arukwenda.

²³Abaheereza be nukwo kumuliirana baamwitira omunju ye.

²⁴Baitu abantu enzaarwa z'ensi egi, boona abaaliiraine Omukama Amoni bakabaita. Mutabani we Yoja nuwe baata ha ngoma ya ise.

²⁵Ebintu ebindi Amoni ebi yakozire, bikahandiikwa omu kitabu eky'obusinge obw'abakama ba Yuda.

²⁶Akazikwa omu kituuro ekinyakuli omu musiri ogwa Uzza; Yosiya omutabani yateera engoma ya ise.