Read Runyoro - rutooro 2 Bakam 23 Bible Online

2 Bakam 23 - Runyoro - rutooro bible

2 Bakam 23

¹Hanyuma Omukama nubwo yayesire abakuru ab'Abayuda boona n'aba Yerusaalemu baije nambere ali.

²Yagenda omunju ya MUKAMA, hamu n'abantu ba Yuda n'enzaarwa zoona eza Yerusaalemu, banyakatagara boona n'abarangi, abantu boona ab'ekitiinisa n'abatali b'ekitiinisa; yabasomera bategere amatu ebigambo byona eby'ekitabu eky'endagaano ekikaba kisangirwe omunju ya MUKAMA.

³Akeemerra haihi n'enyomyo, yaraganiza MUKAMA okumukuraatiraga, okukwataga Ebiragiro bye, ebigambo bye, n'ebi yamanyisize n'omutima gwe gwona n'omwoyo gwe gwona, okuhikiriza ebigambo eby'endagaano egi ebyahandiikirwe omu kitabu eki; abantu boona baateerana na uwe okukora endagaano egi.

⁴Omukama akaragira Hirikiya nyakatagara omukuru, abanyakatagara abaamukonyeraga, n'abalinzi abaalindaga omulyango baturukye ebikwato byona ebyakoliirwe Baali, Asera, n'ebintu ebindi byona ebinyakuli omu mwanya; ebikwato ebi yabyokeza aheeru ya Yerusaalemu haihi n'ekihanga kya Kederoni, iju eryabirugiremu yalitwara Beseeri.

⁵Baanyakatagara abaaramyaga ebisisani, abaatairweho abakama ba Yuda okucumikirra obubbani omu birorro ebikaba biri omu mbuga za Yuda n'okwehinguliriza Yerusaalemu, n'abo abaacumiikirraga Baali, izooba, okwezi, enyunyuuzi, n'ebintu byona eby'omu mwanya, yababinga.

⁶Ekisisani ky'Asera, akakiiha omunju ya MUKAMA, yakiturukya orubuga Yerusaalemu, yakitwara ha kisaaru Kederoni, nuho yakyokeza. Yakihondahonda kyona kyafooka cuucu, ecuucu egi yagimiisa ha bituuro eby'abantu abatali b'ekitiinisa.

⁷Ebiikaro ebikaba biri omunju ya MUKAMA ebyaraarwamuga baamalaaya, yabiseesa; (oku, ebyokujwara ebyajwarwaga abantu obu baabaga nibaramya Asera, abakazi nuho baabirukiraga).

⁸Baanyakatagara boona abakaba bali omu mbuga za Yuda akabaihamu, ebirorro banyakatagara ebi baacumiikirirrahoga obubbaani, okuruga Geeba okuhika Beeriseba yabisiisa, ebirorro eby'amalembo ebikaba biri ha ntaaho ey'irembo lya Yoswa omulemi w'orubuga, ebikaba biri ha mukono gw'obumoso ha irembo ly'orubuga yabiseesa.

⁹Baitu banyakatagara ab'ebiikaro ebi bakaba batarukwikirizibwa kuheereza omunju ya MUKAMA, kyonka baikirizibwaga kulya omugaati ogutatumbisiibwe ogwaleeterwaga banyakatagara bagenzi baabo.

¹⁰Akahagaza ekiikaro Tofesi ekikaba kiri omu kihanga ekya batabani ba Hinoomu, nukwo haleke kubaho omuntu n'omu ow'arukusobora kwokya mutabani we rundi muhara we, kuba kihongwa eky'okwokya eky'okuhongera Moleki.

¹¹Embaraasi ezaikaraga ha mulyango ogwatwaraga omunju ya MUKAMA, haihi n'ekisiika kya Nasani-Meleki omukonwa, abakama ba Yuda ezi bakaba bahongiire izooba, akaziita, ekigaali yakyokya.

¹²Amatambiro agakaba gali ha rusu orw'ekisiika eky'eruguru eky'Ahazi, abakama ba Yuda aga bakaba bakozire, amatambiro Manaase aga akaba akozire omu bikaali bibiri eby'enju ya MUKAMA, ebi byona akabiseesa yabisasangura, ecuucu yabyo yagiseesa omu kisaaru Kederoni.

¹³Ebiikaro ebikuru ebikaba biri ha bukiizi obw'emoso obwa Yerusaalemu, nootoma omuhanda ogurukutwara ha bukiizi obw'obulyo obw'orusozi orw'obubi, Solomooni Omukama wa Isirairi ebi akaba ayombekiire Asitarosi ayahugisaaga Abasidoni, Kemosi ayanugisaaga Abamowabbu, na Mirikomu ayanugisaaga Abamooni, Omukama akabihagaza.

¹⁴Enyomyo yagicwacwana, ebisisani by'Asera yabitematema, omu biikaro byabyo yaijuzaamu amagufa g'abantu.

¹⁵Kandi itambiro erikaba Beseeri, ekiikaro eky'ekitiinisa ekikaba kyombekerwe Yerobbowamu mutabani wa Nebati ayanagire Isirairi omu kibi, ebi akabiseesa, amabaale gabyo yagamurungura yagafoora cuucu; ekisisani eky'Asera yakyokya.

¹⁶Yosiya obu yakubukire yarora ebituuro ha rusozi; yatuma abantu baziikule amagufa omu bituuro ebi, baagookeza ha itambiro baalihagaza, ekigambo kya MUKAMA, omuntu wa Ruhanga ayarangire ebintu ebi eki yarangire kyahikirra.

¹⁷Hanyuma yakaguza ati: “Ekituuro kiri eki ndukuleeba nseeri, ky'oha?” Abantu ab'omu rubuga baamugarukamu bati: “Ky'omuntu wa Ruhanga ayarugire Yuda, yaranga ebintu binu ebi okozireho itambiro erya Beseeri.”

¹⁸Yaragira ati: “Ogu mutamukwataho, hatabaho n'omu aihurra amagufa ge” Amagufa nukwo kugaleka aho, hamu n'ag'omurangi ayarugire Samaliya.

¹⁹Kandi amaju goona n'ebiikaro eby'ekitiinisa ebikaba biri omu mbuga za Samaliya, ebikaba byombekerwe abakama ba Isirairi baabiihiza MUKAMA, ago goona Yosiya akagaseesa; akagakora nkooku yakozire agandi goona aga Beseeri.

²⁰Baanyakatagara ab'ebiikaro ebikuru abakaba bali oku akabaita yabanaga ha matambiro aga baaheererezaahoga, aga yayokezaahoga amagufa g'abantu. Hanyuma yagaruka Yerusaalemu.

²¹Omukama akaragira abantu boona ati: “Musemezeege ekiro kikuru ekya MUKAMA Ruhanga wanyu eky'okwijuka obugenyi obw'okuhingurwaho, nkooku kyahandiikirwe omu kitabu eky'endagaano” kiti:

²²Obugenyi obw'okwijuka ekiro eky'okuhingurwaho, okuruga omu businge obw'abacwi b'emisango abaacweraga Abaisirairi emisango, rundi omu businge bwona obw'abakama ba Isirairi, rundi obw'abakama ba Yuda; bukaba butakabahoga,

²³baitu omu mwaka ogwa ikumi na munaana ogw'engoma ya Yosiya, ekiro kinu eky'okwijuka obugenyi obw'okuhingurwaho, nubwo kyasemeziibwe omu rubuga Yerusaalemu.

²⁴Ekindi Omukama Yosiya, akadibya okubandwa emizimu, oburogo, abaseeraafi, n'ebisisani by'abacwezi, n'ebintu byona ebibi ebyazookaga omunsi ya Yuda n'omu Yerusaalemu, nukwo agumye ebigambo eby'Ebiragiro ebyahandiikirwe omu kitabu Hirikia nyakatagara eki yasangire omunju ya MUKAMA.

²⁵Ira lyona, ebiragiro bya Musa nkooku birukugamba hakaba hatakabahoga Omukama arukumusisana, ayaheeriize MUKAMA n'omutima gwe gwona, n'omwoyo gwe gwona, n'amaani ge goona, kandi okuruga obu, hatagaruke kubaho Omukama arukumusisana.

²⁶Baitu nabwo, MUKAMA ekiniga kye eky'amaani eki yakwatiirwe Yuda, habwa byona Manaase ebi yakozire ebyamubiihiize kitamurugeho.

²⁷MUKAMA akagamba ati: “Yuda na uwe ninyija kumubinga anduge omumaiso, nkooku nkozire Isirairi, kandi orubuga runu Yerusaalemu oru nakomere, n'enju ei nagambireho nti: Aho nuho ndaaramizibwaga, ninyija kubyanga.”

²⁸Ebintu ebindi byona Yosiya ebi yakozire, bikahandiikwa omu kitabu eky'obusinge bw'abakama ba Yuda.

²⁹Omu businge bwe, Faraaho Neeko Omukama wa Misiri nubwo yaramagiire Omukama w'Asiriya ha kisaaru Furaati, Omukama Yosiya yarumba Faraaho, Faraaho obu yaboine Omukama Yosiya, atamwikaze yamwita, akamunaga Megido.

³⁰Abaheereza be, omutumbi gwe baagwiha Megido, baagutwara Yerusaalemu, baaguziika omu kituuro kye wenka. Abantu abasi b'ensi egi, baakwata Yehoyahazi omutabani, baamusiiga amagita, nuwe baata ha ngoma ya ise.

³¹Yehoyahaazi ha yateeriire engoma akaba ahikize emyaka amakumi abiri n'esatu, akalemera ameezi asatu omu rubuga Yerusaalemu. Ibara lya nyina muhara wa Yeremiya owa Libuna nuwe Hamutaali.

³²Akakora ebinyakubiihiza MUKAMA byona, nka baisenkuru oku baakozire.

³³Faraaho Neeko, akamuta omu nkomo omu rubuga Ribula omunsi ya Hamasi, aleke kulema omu rubuga Yerusaalemu, ensi egi yagicwera okuha omusoro ogwa talenta ez'efeeza kikumi, na talenta emu eya zaabbu.

³⁴Faraaho Neeko, akakwata Eliakimu mutabani wa Yosiya, nuwe yata ha ngoma ya Yosiya ise ibara lye Eliakimu yalihindura, yamuruka Yehoyakimu. Baitu Yehoyahazi yamwihaho; yamutwara omu nsi Misiri, oku nuho yagwire.

³⁵Yehoyakimu akaha Faraaho efeeza na zaabbu, baitu akaragira abantu bahe omusoro Faraaho ogu yabacweriire. Abantu boona ab'omunsi egi, akabaihaho efeeza na zaabbu ey'okuha Faraaho Neeko, buli omu nkooku akaba acweriirwe.

³⁶Yehoyakimu ha yateeriire engoma akaba ahikize emyaka amakumi abiri n'etaano, akalemera emyaka ikumi na gumu omu rubuga Yerusaalemu. Ibara lya nyina muhara wa Pedaaya owa Ruma nuwe Zebida,

³⁷akakora byona ebyabiihiize MUKAMA, nka baisenkuru oku baakozire.