Read Runyoro - rutooro 2 Bakam 25 Bible Online

2 Bakam 25 - Runyoro - rutooro bible

2 Bakam 25

¹Omu mwaka ogwa mwenda ogw'engoma ya Zedekia, ha kiro ekya ikumi eky'okwezi kwa ikumi, Nebukadeneeza Omukama wa Babbulooni akazinisa ihe rye, yaseesira Yerusaalemu, yarugota; baateera orukande aheeru y'orubuga, baarwombekaho ebisiika okurwehinguliriza.

²Okuhika omu mwaka ogwa ikumi na gumu ogw'engoma ya Zedekiya orubuga rukaikara rugosirwe.

³Ha kiro ekya mwenda eky'okwezi okwa kana, hakagwa kiihe etagambwa, abantu ab'omunsi egi baaburwa ak'okuta ha rulimi.

⁴Nubwo orubuga baarutairemu omuhabo; noobwakubaire Abakalidaaya bakaba bagosire orubuga, Omukama n'abasaija boona abarwani bakairuka ekiro, baatwarwa omuhanda ogw'irembo, hagati y'ebisiika ebibiri, haihi n'omusiri gw'omukama. Baatoma obukiizi obw'Araba.

⁵Baitu ihe ery'Abakalidaaya likakurata omukama, baamukwatira omu byeya bya Yeriko; ihe lye ryona lyararanga lyamurugaho.

⁶Nubwo baakwasire omukama, baamutwara mb'omukama wa Babbulooni ow'akaba ali Ribula, yamucwera omusango.

⁷Abaana be bakabamwitira omumaiso, uwe wenka baamwihamu amaiso, baamutamu empinga, baamutwara Babbulooni.

⁸Ha kiro ekya musanju eky'okwezi okwa kataano, omukama Nabukadaneeza omukama wa Babbulooni eki yahikiizeeho emyaka ikumi na mwenda, Nebuzaradaani engabwa y'abalinzi, omuheereza w'omukama wa Babbulooni akahika Yerusaalemu.

⁹Yayokya Enju ya MUKAMA, yayokya ey'omukama, n'amaju agandi goona aga Yerusaalemu; amaju ag'ekitiinisa goona akagookya.

¹⁰Ihe ryona ery'Abakalidaaya abakaba bali hamu n'engabwa y'abalinzi, bakaseesa ebisiika bya Yerusaalemu.

¹¹Abantu abandi abaasigaireho abakaba basigaire omu rubuga, n'abasingwa abakaba basingiirwe mb'omukama wa Babbulooni, n'abandi abaasigaireho ha mpura y'abantu abarukwingana aho, Nebuzaradaani engabwa y'abalinzi yabazahya.

¹²Baitu ha bantu abaakirraga kimu obunaku ha bantu boona ab'omunsi egi, akasigaho abamu banogorrege emizaabbibbu kandi balimege.

¹³Enyomyo ez'omulinga ezikaba ziri omunju ya MUKAMA, entebe n'etanka ey'omulinga ebikaba biri omunju ya MUKAMA, Abakalidaaya bakabicwacwana, omulinga baagutwara Babbulooni.

¹⁴Baatwara enyungu, ebitiyo, makaasi, ediisi ez'okutaho obubbaani, n'ebikwato byona eby'omulinga ebinyakukonyezibwa ha mulimo ogw'omunju ya MUKAMA,

¹⁵esahaani ez'okuguhiraho omurro n'ebbakuli. Ebintu byona ebyakozirwe omu zaabbu n'omu feeza, akabitwara, oteho ebbakuli entoitotoito n'esafuliya ezeekonyezibwa okutwarraho amanda.

¹⁶Ebintu eby'omulinga omukama Solomooni ebi akaba akozire. Enyomyo ziri ibiri, etanka n'entebe ez'okuta omunju ya MUKAMA, omulinga ogwakozire ebikwato ebi byona, gukahingurana obwingi, gukaba gutarukusobora kulengwa.

¹⁷Obura obw'enyomyo emu bukaba nibuhika emikono ikumi na munaana, kandi ekaba eroho omutwe gw'omulinga; obura bwagwo emikono esatu; akatimba n'ebisisani eby'enkomamahanga, byona by'omulinga, bikaba biri ha mutwe ogu okugwehinguliriza. Enyomyo eya kabiri, nayo ekaba eroho ebintu nk'ebi, hamu n'akatimba.

¹⁸Engabwa y'abalinzi, ekakwata Seraaya nyakatagara, Zefaania katiikiro we n'abalinzi basatu abaalindaga omulyango.

¹⁹Omu rubuga, akaihamu omunyoro ow'akaba ali ngabwa y'abasaija abarwani, n'abasaija abandi bataano abakaba bali bahabuzi b'omukama abaasangirwe omu rubuga; omuhandiiki ow'eby'ensita ow'engabwa y'ihe ayasoroozaaga abantu ab'ensi egi; n'abantu nkaaga ha bantu ab'omunsi egi abaasangirwe omu rubuga.

²⁰Nebuzaradaani engabwa, akabakwata yabatwara mb'omukama wa Babbulooni ow'akaba ali Ribula.

²¹Omunsi Hamasi oku, omukama wa Babbulooni nuho yabateeriire yabaita. Abantu ba Yuda nukwo baihirwe omunsi yabo bati, baazaahisibwa.

²²Nebuzaradaani, akakoma Gedalia mutabani w'Ahikamu mwijukuru wa Sefaani, aleme abantu ab'omunsi ya Yuda abaasigaireho, Nebukadaneeza omukama wa Babbulooni aba akaba asigireho.

²³Engabwa zoona ezamahe hamu n'amahe gaabo, obu baahuliire ngu: omukama wa Babbulooni akomere Gedalia nuwe abe mulemi omukuru, baagenda omba Gadalia, nuwe Isameri mutabani wa Nesania ow'akaba ali Miziba omba Seraaya mutabani wa Tenahumesi omutofasiiti, n'omba Yazaania mutabani wa Maacasite.

²⁴Gedalia yabarahira hamu n'abantu baabo naagamba ati: “Abanyoro Abakalidaaya baleke kubatiinisa; mwikale omunsi egi, muheereze omukama wa Babbulooni, nimwija kutunga obusinge.”

²⁵Baitu omu kwezi okwa musanju, Isameri mutabani wa Nesania mwijukuru w'Erisaama ow'oruzaaro rw'omukama, akaija n'abasaija ikumi, yaita Gedalia, Abayudaaya, n'Abakalidaaya aba akaba ainabo Mizipa.

²⁶Abantu boona, abaguuda n'abanaku, engabwa z'amahe, nubwo baimukire baagenda Misiri; habwokuba bakaba nibatiina Abakalidaaya.

²⁷Omu mwaka ogw'amakumi asatu na musanju, Yehoyakiini omukama wa Yuda amazire kuzaahisibwa, ha kiro eky'amakumi abiri na musanju eky'okwezi okwa ikumi n'abiri, Eviri-merodaaki omukama wa Babbulooni, omu mwaka ogu yateeriiremu engoma, nubwo yagiriire embabazi Yehoyakiini omukama wa Yuda, yamwiha omu nkomo;

²⁸akabaza na uwe n'embabazi, yamuha ekiikaro ekirukukira eki yahaire abakama abandi abaazaahisibwe hamu na uwe Babbulooni.

²⁹Yehoyakiini nukwo kujuura ebijwaro bye eby'enkomo. Buli kiro obwomeezi bwe bwona yalyaga n'omukama.

³⁰Kandi buli kiro obwomeezi bwe bwona, Omukama yamuhaga sente ez'okumukonyera.