Read Runyoro - rutooro 2 Bakam 3 Bible Online

2 Bakam 3 - Runyoro - rutooro bible

2 Bakam 3

¹Omu mwaka ogwa ikumi na munaana ogw'engoma ya Yehosafaati omukama wa Yuda, Yehoramu mutabani w'Ahabbu nubwo yatiire engoma ya Isirairi omu rubuga Samaliya akalemera emyaka ikumi n'ebiri.

²Noobwakubaire atainganire kimu ise na nyina, baitu akakora ebibiihiza MUKAMA, akacwacwana ekisisani kya Baali ise eki akaba akozire abantu bakiramye.

³Na uwe akanaga Isirairi omu kibi, nk'omukama Yerobbowamu mutabani wa Nebati ayamwebembiire, ekibi eki atakireke.

⁴Mesa omukama wa Mowabbu, akaba ali mworoozi w'entaama, buli mwaka, yahaga omukama wa Mowabbu ebyana by'entaama akasiiriira kamu, n'ebyoya eby'entaama empaya akasiiriira kamu.

⁵Baitu Ahabbu obu yamazire kufa, omukama wa Mowabbu akeemera omukama wa Isirairi.

⁶Ahonaaho Yehoramu omukama yaruga Samaliya, yazinisa amahe ge.

⁷Yagenda yatumaho Yehosafaati Omukama wa Yuda naagamba ati: “Omukama wa Mowabbu anyemiire; oije oyeteerane na nyowe turwanise Mowabbu.” Oli yagarukamu ati: “Ego; habwokuba ekyange nikyo ekyawe, abantu bange nubo bawe, n'embaraasi zange nizo zawe.”

⁸Hanyuma yakaguza ati: “Turaatwarwa muhanda ki?” Yehoramu yagarukamu ati: “Tutwarwe omuhanda ogw'irungu ery'Edomu.”

⁹Aho omukama wa Isirairi, yagenda hamu n'omukama wa Yuda hamu n'omukama w'Edomu. Obu baarubatiire ebiro musanju, amaizi ag'abantu kunywa, n'ag'okunywisa ebisoro ebi bakaba nibagenda nabyo, gaabahwaho.

¹⁰Nubwo omukama wa Isirairi yagambire ati: “Mahano! MUKAMA ayesire itwe abakama abasatu, atunagire omukama wa Mowabbu.”

¹¹Yehosafaati yakaguza ati: “Hanu, tiharoho murangi wa MUKAMA n'omu ou tusobora kusaba akatukaguliza MUKAMA?” Nubwo omu ha bairu b'omukama wa Isirairi yagarukiremu ati: “Erisa mutabani wa Safati ayakonyeraga Eriya, ngunu hanu.”

¹²Yehosafaati yagamba ati: “Ogu amanyire ekigambo kya MUKAMA.”

¹³Erisa akakaguza omukama wa Isirairi ati: “Nkukorre ki? Genda oyekaguze hali abarangi bali Sso na nyoko aba baayekaguzaahoga.” Baitu omukama wa Isirairi yamugamba ati: “Nangwa: MUKAMA nuwe ayesire itwe abakama abasatu, atunagire omukama wa Mowabbu.”

¹⁴Erisa yagamba ati: “Ndahiire MUKAMA ow'amahe ou mpeereza, kakuba ntarukutamu Yehosafaati omukama wa Yuda ekitiinisa, tinaakukufiireho kandi tinaakwimukize n'amaiso kukurora.

¹⁵Kyonka hati, mundeetere omuzini.” Omuzini obu yazaanaga, obusobozi bwa MUKAMA buhikaho Erisa.

¹⁶Agamba ati: “MUKAMA naagamba ati: ‘Ekihanga kinu kyona, mukirimemu emikura.’

¹⁷Habwokuba MUKAMA naagamba ati: ‘Enjura noobu etaligwa, rundi omuyaga noobu gutaliteera, baitu ekihanga kinu kiriikara kiijwire amaizi.’

¹⁸Erisa akongera yagamba ati, Kinu hali MUKAMA, kintu ekirukurahuka; Abamowabbu nabo, naija kubabaha mubasingule.

¹⁹Embuga ezigumire zoona kandi enungi, nimwija kuzisingura, nimwija kutema emiti emirungi yoona, mwigale amaziba ag'amaizi goona, musiisasiise buli kicweka ky'ensi ekirungi nimukitamu amabaale.”

²⁰Ha kiro ekyakurasireho, omu kasumi ak'okuhonga ekyonzira, hakaija amaizi gaaruga ha bukiizi bwa Edomu, gaijuliza kimu ensi yoona.

²¹Abamowabbu obu baahuliire ngu abakama basatu baizire kubarwanisa, boona abakaba nibasobora kujwara ebyokurwanisa, okuurugirra ha barukumalirrayo obuto okuhika ha barukukirra kimu obukuru, boona bakeetwa baayemerezibwa ha mutaano.

²²Obu baimukire nyenkyakara, omusana gwajwa, Abamowabbu baarora amaizi agakaba gabali omumaiso nigatukura nk'esagama.

²³Baagamba bati: “Enu sagama, mazimakwo abakama barwaine bonka na bonka baitangana. Hati nu, Abamowabbu murahuke tugende kunyaga!”

²⁴Baitu obu baahakire ha rukande orw'Abaisirairi, Abaisirairi baimuka baabarumba, Abamowabbu bairuka, Abaisirairi baabahondera, baagenda nibabaita.

²⁵Baahwerekereza embuga, kandi ha buli kicweka ky'itaka ekirungi, omuntu yahungurayoga ibaale okuhika obu kyakaijuraga; baigara amaziba g'amaizi goona, baatema emiti emirungi yoona, okuhika obu haakasigairemu amabaale gakyo gonka.

²⁶Omukama wa Mowabbu obu yaboine obulemu nkooku atarukusobora kubusingura, yatwara abakwasi b'empirima rusanju, nukwo ahagule arabeho omukama wa Edomu ow'akaba amuli omumaiso; baitu batasobole.

²⁷Hanyuma yatwara mutabani we arukukira obukuru ow'akaba ali w'okuteera engoma omu kiikaro kye, yamuhayo abe kihongwa eky'okwokeza ha kisiika. Abaisirairi baabiihirwa muno, nukwo kumurugaho baagaruka omunsi y'owabu.