Read Runyoro - rutooro 2 Bakam 4 Bible Online

2 Bakam 4 - Runyoro - rutooro bible

2 Bakam 4

¹Omufaakati omu ha bakazi ba batabani b'abarangi, akaamirra Erisa yamugambira ati: “Omuheereza wawe ibanyowe afiire; omanyire omuheereza wawe ogu nkooku yatiinaga MUKAMA, baitu omusaija ou yaliireho ibanja aizire kutwara abaana bange babiri babe bairu be, nukwo basasule ibanja ibanyowe eri yaliire.”

²Erisa yamukaguza ati: “Nkukorre ki? Ngambira, omunju, oinamu ki? Omukazi yagarukamu ati: Tinyina kantu n'akake, okwihaho ensoha y'amagita yonka.”

³Erisa yamugambira ati: “Irooko ogende omu bataahi, oyeyohoze ensoha ezitarumu kantu, zoona ezi oraasobora kutunga.

⁴Hanyuma otaahe omunju, oyekingiremu hamu n'abaana bawe, ensoha ezi zoona eziiturremu amagita; obu orabona emu yaijura, ogite ha rubaju.”

⁵Omukazi yarugaho Erisa, yataaha omunju, yayekingiramu hamu n'abaana be; uwe obu yabaga naiturra, abaana be nibamuleetera ensoha.

⁶Ensoha zoona obu zaamazire kwijura, yagambira omutabani ati: “Ndeetera ensoha endi.” Omutabani yamugarukamu ati: “Tihakyaroho endi.” Amagita gaalekera aho kuruga omu nsoha.

⁷Omukazi nubwo yagenzire yagambira Erisa omuntu wa Ruhanga, Erisa yamuragira ati: “Irooko ogende oguze amagita ago, osasule amabanja gawe goona, sente eziraasigaraho, ozeekonyeze hamu n'abaana bawe.”

⁸Kiro kimu, Erisa akagenda Suneemu, nambere haikaraga omukazi omuguuda, ayamuhambiriize kulya ebyokulya. Buli kasumi Erisa obu yarabaga omuhanda ogu, yakubutukaga mb'omukazi ogu alye ebyokulya.

⁹Omukazi ogu akagambira iba ati: “Weewe, hati nayetegereza, omuntu onu arukwikara naija hanu, muntu arukwera wa Ruhanga.

¹⁰Katumwombekere akasiika kake ha nju eruguru akanyakwina ebisiika, tumuteeremu: ekitabu, emeeza, entebe n'etaara, obu araakatubungiraga nuko araalemuga.”

¹¹Kiro kimu, Erisa akagaruka Suneemu, yatemba eruguru omu kasiika ke ahuumule.

¹²Yagambira Gehazi omuheereza we ati: “Nyetera Omusunamu ogu.” Gehazi obu yamwesire, omukazi yayemerra omumaiso g'Erisa.

¹³Erisa akagambira omuheereza we ati: “Kaguza omukazi ogu oti, Okatutalibanira muno; Tukukorre ki? Nooyenda tukubalize n'omukama rundi n'engabwa y'ihe?” Omukazi yagarukamu ati: “Nyikara omu bantu bange nyabwange.”

¹⁴Erisa yakaguza ati: “Baitu mmukorre ki?” Gehazi yagarukamu ati: “Omukazi onu, taina mwana w'obwojo, kandi iba agurusire.”

¹⁵Erisa yagambira Gehazi ati: “Mwete aije hanu.” Gehazi obu yamazire kumweta, omukazi yayemerra omu mulyango.

¹⁶Erisa yamugambira ati: “Omu mwaka ogurukwija omu kasumi nka kanu, olikiikira omwana w'obwojo.” Omukazi yagarukamu ati: “Awe! Nangwa taata, iwe omuntu wa Ruhanga; leka kumbiiha.”

¹⁷Baitu omukazi ogu omu mwaka ogwakurasireho omu kasumi ako konyini Erisa nkooku akaba amugambiire, akalindwa yatwara enda, yazaara omwana w'obwojo.

¹⁸Kiro Kimu, omwana obu yamazire kukura, akagenda omba ise ow'akaba ali omu musiri hamu n'abagesi.

¹⁹Yamugambira ati: “Omutwe gwanyita, omutwe gwanyita!” Ise nukwo kugambira omuheereza we ati: “Mutwale omba nyina.”

²⁰Omuheereza obu yahimbire omwana yamugarurra nyina, omwana akaikara aikaliire ha bibero bya nyina okuhika omu ihangwe, hanyuma yafa.

²¹Nyina yamutembya eruguru, yamubyamya ha kitabu ky'Erisa omuntu wa Ruhanga, yamukingiramu, yagenda.

²²Nubwo yayesire iba yamugambira ati: “Ontwekere omu ha baheereza, n'embaraasi emu, nukwo ngende bwango mb'omuntu wa Ruhanga, ngaruke.”

²³Iba yamukaguza ati: “Kiki ekirukukutwarayo kiro kya hati? Hati, okwezi tikubonekere kandi teri Sabbato.” Omukazi yagarukamu ati: “Eki otakifaaho.”

²⁴Omukazi yatandiika endogoyi, yagambira omuheereza we ati: “Endogoyi enu ogiirukize kimu, otalengaho kugiirukya mpora, rundi buli nkuragiire.”

²⁵Aho omukazi yaimukya, yahikaho omuntu wa Ruhanga, yamusanga ha rusozi Karumeeri. Omuntu wa Ruhanga obu yaboine omukazi naija, yagambira Gehazi omuheereza we ati: “Omukazi Omusuunamu nguli naija,

²⁶iruka bwango omwitirane, omukaguze obu araaba ali kurungi, iba n'omwana we, nabo obu baraaba bali kurungi!” Omukazi akagarukamu ati: “Busayo kabi.”

²⁷Baitu omukazi obu yahikire ha rusozi nambere omuntu wa Ruhanga akaba ali, yamuzambira ebigere, Gehazi yaija kumusindika arugeho, baitu omuntu wa Ruhanga yagamba ati: “Muleke, habwokuba ali omu bujune obutagambwa; MUKAMA abunserekere tiyabungambira.”

²⁸Hanyuma omukazi yakaguza Erisa ati: “Mukama wange nkakusaba omwana?” Ntakugambire nti: “Oleke kumbiihabiiha?”

²⁹Erisa yagambira Gehazi ati: “Weeteege, okwate omwigo gwange ogende. Obu oraitirana omuntu, otamuramukya; kandi omuntu obu araakuramukya, otamugarukamu; omwigo gwange ogu, ogwegeke ha maiso g'omwana anyakufiire.”

³⁰Nubwo nyina omwana yagambire ati: “Ndahiire MUKAMA omwomeezi, kandi na iwe wenka ninkurahira. Nyowe tindukwija kukurugaho.” Habweki boombi, Erisa na nyina omwana baagenda hamu.

³¹Gehazi yabasigirra, yata omwigo ha maiso g'omwana, baitu hatahulirwe iraka kandi hatazooke karorwaho akarukwoleka obwomeezi. Nukwo kugaruka kwitirana Erisa yamugambira ati: “Omwana taimukire.”

³²Erisa obu yairiire haihi n'enju, yarora omwana abyamire ha kitabu kye afiire.

³³Nukwo kutaaha omunju, yayekingiramu hamu na nyina omwana, yayesengereza MUKAMA.

³⁴Hanyuma yaimuka, yainama ha mwana, akanwa ke yakata ha k'omwana, amaiso yagata ha g'omwana, n'emikono ye yagita ha y'omwana; obu yabaga namwegororraho, omubiri gw'omwana nigwijwamu obutagasi.

³⁵Nubwo Erisa yaimukire, yatandika kurubatarubata omu nju naagenda kunu n'oku, yagenda nambere hali omwana; yamwegororraho. Omwana nukwo kweseemura emirundi musanju yaziburra amaiso.

³⁶Erisa yayeta Gehazi yamugambira ati: “Yeta nyina omwana onu.” Gehazi yamweta, nyina omwana obu yataahire omunju, Erisa yamugambira ati: “Omwana wawe ngugwo,”

³⁷omukazi yagwa ha bigere by'Erisa, yajuumara ha itaka; hanyuma yakwata omwana we, yagenda.

³⁸Kiihe obu yagwire omunsi, Erisa akagaruka Girugaali. Abaana b'abarangi obu bakaba baikaliire omumaiso ge akagambira omuheereza we ati: “Teekaho ebbinika enkooto, ocumbire abaana b'abarangi ekiguude.”

³⁹Omu hali bo, akagenda omu musiri okunoga emikubi, yasanga ekisunsa ekyayemereze, yakinogaho emyongo yaijuza orugoye rwe, yaija yagisarasarra omu kinaga eky'ekiguude, atamanyire nkooku eri myongo.

⁴⁰Baihurra abaana balye. Baitu obu baarolezeeho, baayamirra Erisa bati: “Mawe, iwe omusaija wa Ruhanga, omu kinaga kinu, harumu orufu!” Ekikobeko kyabalema kukirya.

⁴¹Erisa yagamba ati: “Muleete ensaano.” Yagiseesa omu kinaga, yagamba ati: “Hati, mwihurre abaana balye.” Omu kinaga hatabemu kabi.

⁴²Omusaija akaruga Baali-saliisa, yaleetera Erisa emigaati amakumi abiri eya sairi, n'entwe z'engano ey'akanogwa ebi yabimuleetera omu nsaho ye. Erisa yagamba ati: “Ebi nabyo, mubihe abaana babirye, habwokuba MUKAMA naagamba ati, Balirya balemwe.”

⁴³Omwiru yamukaguza ati: “Bina biraamara abantu kikumi?”

⁴⁴Yabibasembereza. Baalya baalemwa, MUKAMA nkooku yagambire.