Read Runyoro - rutooro 2 Bakam 5 Bible Online

2 Bakam 5 - Runyoro - rutooro bible

2 Bakam 5

¹OMUKAMA wa Siriya, yatamuga Namaani engabwa y'ihe rye ekitiinisa kandi yamugonzaaga muno, habwokuba omuli uwe, MUKAMA nuho akaba aheeriire Samaliya obusinguzi. Namaani ogu, akaba ali musaija w'amaani kandi manzi, baitu akabe ali mugenge.

²Abasiriya, omu rumu ha ndamago zaabo, bakanyaga omwisiki omuto omunsi ya Isirairi, omwisiki ogu nuwe yaheerezaga muka Namaani.

³Kiro kimu, akagambira mugole we ati: “Kakuba mukama wange abaire ali hamu n'omurangi anyakuli Samaliya! Yaakumutambiire ebigenge bye ebi.”

⁴Namaani obu yahuliire ekigambo eki, akagenda mb'omukama, yamugambira omwisiki ogu eki yagambire.

⁵Omukama wa Siriya yamugamba ati: “Irooko ogende, mb'omukama wa Isirairi, omutwarre ebbaruha enu.” Aho Namaani yagenda, yatwara talenta z'efeeza ikumi, seekeeri kakaaga, n'ebyokujwara ebirungi ikumi.

⁶Yaleetera omukama wa Isirairi ebbaruha erukugamba ebigambo binu: “Ebbaruha enu obu eraakuhika, omanye nkooku nkutwekiire Namaani omuheereza wange, omutambire endwara ye”

⁷Omukama wa Isirairi obu yasomere ebbaruha, yatemura ebyokujwara bye, yagamba ati: “Ninyowe Ruhanga anyakwina obusobozi obw'okwita n'obw'okwomeeza, omusaija onu nikyo antumiireho n'ansaba ntambire omuntu we ebigenge? Muteekereze kandi murole nkooku arukunseruza enkungani.”

⁸Baitu Erisa omuntu wa Ruhanga obu yahuliire omukama wa Isirairi nkooku atemwire ebyokujwara bye, yamutumaho naagamba ati: “Kiki ekikutemwize ebyokujwara byawe? Omusaija muleke ampikeho, nukwo amanye omu Isirairi nkooku harumu omurangi.”

⁹Namaani nukwo kwija n'embaraasi ze, n'ebigaali bye, yayemerra ha mulyango ogw'enju y'Erisa.

¹⁰Erisa yamutumaho omukwenda naamuragira ati: “Genda omu kisaaru Yorudaani oyoge emirundi musanju, omubiri gwawe nigwija kukira, osemere.”

¹¹Baitu Namaani yabiihirwa, yaruga aho naagamba ati: “Mbaire ningira nti, Araaturuka aije ampikeho, ayemerre, asabe MUKAMA Ruhanga we, aimukye omukono gwe agwolekeze nambere hali oburwaire, nukwo antambire!

¹²Abaana na Fapa ebisaaru ebya Damasiko, tibirukukira oburungi ebisaaru byona eby'omu Isirairi? Tinaakubyogiiremu nkakira?” Nukwo kukubuutuka akagenda abiihiirwe.

¹³Baitu abaheereza ba Namaani baamwirra haihi baamukaguza bati: “Waitu, omurangi kakuba abaire akuragiire ekintu ekikooto, tiwaakukikozire? Lero kaaswa hati, obu akuragiire ati: ‘Yoga nukwo okire’?”

¹⁴Namaani nukwo kugenda akeeyibika emirundi musanju omu kisaaru Yorudaani, omuntu wa Ruhanga nkooku yamuragiire; omubiri gwe gwamugarulirwa, nigusisana nk'ogw'omwana omuto, yakira.

¹⁵Yagaruka mb'omuntu wa Ruhanga, n'abantu be boona aba yaizire nabo, yayemerra omumaiso ge yagamba ati: “Hati namanya, omunsi yoona nkooku hatarumu Ruhanga, okwihaho omu Isirairi. Habweki, ikiriza ekisembo, nyowe omwiru wawe eki nkuleetiire.”

¹⁶Baitu Erisa yagamba ati: “Ndahiire MUKAMA omwomeezi ou mpeereza, tindukwija kwikiriza ekisembo na kimu.” Namaani yamuhambiriza akiikirize, baitu Erisa yayanga.

¹⁷Nubwo Namaani yagambire ati: “Obu oraaba oyangire ekisembo kyange, nkwesengeriize ompe itaka erirukuhimbwa enyumbu ibiri, nditwale owange, habwokuba okuruga hati, nyowe omwiru wawe, tindihongera ruhanga ondi ekihongwa eky'okwokya rundi ekyonzira, okwihaho MUKAMA.

¹⁸MUKAMA asigikire ha kintu eki, aganyire omwiru wawe mukama wange obu araagendaga kuramiza omunju eya Rimoni anyigamiire ha mukono, na nyowe ndainamaga omunju egi, kandi obu ndainamaga, MUKAMA nyowe omwiru wawe, anganyirege ekintu eki.”

¹⁹Erisa yagambira Namaani ati: “Ogende n'obusinge.” Baitu Namaani obwakaba naakyarugaho Erisa ati,

²⁰Gehazi omuheereza w'Erisa omuntu wa Ruhanga yagamba ati: “MUKAMA wange aganyiire Namaani Omusiriya onu, yayanga kwikiriza eki abaire aleesire. Ndahiire MUKAMA omwomeezi, ka mmuhondere ngire eki ndaamwihaho.”

²¹Gehazi nukwo kuhondera Namaani, Namaani obu yaboine omuntu arukumwirukirra, yaruga ha kigaali kye, batangatangane; yamukaguza ati: “Waleetwa birungi?”

²²Gehazi yagarukamu ati: “Ndeesirwe ebirungi, mukama wange antumire nkugambire, abasigazi babiri aba batabani b'abarangi, bampikaho bunubunu, nibaruga omunsi ey'ensozi ey'Efuraimu; naakusaba obahe etalenta y'efeeza, n'ebyokujwara ebirungi bibiri.”

²³Namaani yagamba ati: “Nkwesengeriize, twara talenta ez'efeeza ibiri.” Yamuhambiriza muno, yaboha talenta ibiri ez'efeeza omu nsaho ibiri, hamu n'ebyokujwara ebirungi bibiri, ebi yabitweka babiri ha baheereza be baabyetweka baayebembera Gehazi.

²⁴Obu baahikire ha rusozi Erisa nambere yaraaraga, Gehazi yatuura abairu ba Namaani ensaho ibiri, yaitaahya omunju, yabaraga baagenda.

²⁵Obu yataahire omunju, yayemerra omumaiso ga mukama we, Erisa yamukaguza ati: “Gehazi, oikaire nkaha?” Gehazi yagarukamu ati: “Kanyikaireho hanu, tinyina nambere ngiire.”

²⁶Erisa yamukaguza ati: “Omusaija oli obu arugirege omu kigaali kye akwitirane, mbairege ntaroho? Ako nuko kaabaire kasumi ak'okutungiramu: efeeza, ebyokujwara, emisiri ey'emizaituuni, n'ey'emizaabbibbu, entaama, ente, abairu n'abazaana?

²⁷Habweki nu, ebigenge bya Namaani bigaruke hali iwe bikwikaleho, kandi biikale na ha baijukuru bawe, obusinge bwona.” Gehazi yaruga omumaiso ga mukama we Erisa, ali mugenge nyakabara naayera hwe nk'iju. “Omururu gwita, omunya gugwa ha nswa.”