Read Runyoro - rutooro 2 Bakam 6 Bible Online

2 Bakam 6 - Runyoro - rutooro bible

2 Bakam 6

¹Kiro kimu, batabani b'abarangi bakagambira Erisa bati: “Ekiikaro eki turumu eki orukuturolerramu, kitoito muno tikirukutumara,

²otwikirize tugende Yorudaani, tutemeyo emiti, tweyombekere amaju ag'okwikaramu.” Yabagarukamu ati: “Irooko mugende.”

³Omu hali bo yagamba ati: “Itwe abairu bawe, tukwesengeriize, oikirize tugende hamu na iwe.” Yagamba ati: “Ego ndaagenda.”

⁴Erisa yagenda nabo. Obu baahikire Yorudaani, baatema emiti.

⁵Baitu omu hali bo obwakaba naatema omuti, endemu ye yagwa omu maizi; nukwo kutokera haiguru ati: “Mawe, mukama wange! Endemu teri yange, ntiizibwa.”

⁶Nubwo Erisa yakagwize ati: “Egwire nkaha?” Obu yamwolekere ekiikaro, Erisa yatema ekiti, yakinaga nambere endemu yaragaire, yagiragira yaseereera.

⁷Yagambira omusaija mukama w'endemu ati; “Giiheyo,” omusaija yagorra omukono, yagiihayo.

⁸Ira omukama wa Siriya obwakaba naarwanisa Isirairi, akahanuura n'abaheereza be ati: “Orukande rwange, ninyija kuruteera omu kiikaro bunanka.”

⁹Baitu omuntu wa Ruhanga akatumaho omukama wa Isirairi ati: “Otakisura, okaraba omu kiikaro kinu, habwokuba Abasiriya nuho barukugenda.”

¹⁰Omukama wa Isirairi nukwo kutumaho ab'omu kiikaro, omuntu wa Ruhanga eki yamugambiire. Erisa nukwo yaikaire naahabura omukama ati, omukama na uwe yayejunirayo wenka emirundi nyingi.

¹¹Ekintu eki, kikasaaliza muno omukama wa Siriya; nukwo kweta abaheereza be yabakaguza ati: “Timusobora kundagirra omuli itwe, omuntu anyakuli ha rubaju rw'omukama wa Isirairi?”

¹²Omu ha baheereza be yagarukamu ati: “Busaho n'omu, waitu, Agutamba; okwihaho Erisa omurangi ow'omu Isirairi, nuwe agambira omukama wa Isirairi n'eki ohwehwetererra omu kisiika kyawe eki oraaramu.”

¹³Omukama yagamba ati: “Genda orole nambere ali, nukwo nsobole kutwekayo abantu bamukwate.” Baamugambira ngu: ali Dosani.

¹⁴Yatwekayo embaraasi, n'ebigaali, n'iihe ery'abantu baingi muno; baija ekiro, baagota orubuga.

¹⁵Nyenkyakara, abaheereza ab'omuntu wa Ruhanga obu baimukire baaturuka aheeru, baabona ihe, embaraasi, ebigaali, lyehinguliriize orubuga. Omuheereza yagamba ati: “Mawe, mukama wange! Tukole ki?”

¹⁶Erisa yamugambira ati: “Otatiina, habwokuba abanyakuli na itwe baingi kukira abanyakuli nabo.”

¹⁷Nubwo yasabire nagaamba ati: “Ai MUKAMA, ninkwesengereza, igura amaiso ge nukwo ahweze.” Nubwo MUKAMA yaigura amaiso g'omusigazi yatandika kuhweza; nukwo omusigazi kurora orusozi rwijwire embaraasi n'ebigali by'omurro byehinguliriize Erisa.

¹⁸Kandi Abanyasiriya obu baizire kumurumba, Erisa yasaba MUKAMA nagaamba ati: “Nkwesengeriize, abantu banu baitu baite amaiso.” MUKAMA yabaita amaiso nkooku Erisa yasabire.

¹⁹Nubwo Erisa yabagambiire ati: “Gunu tiguli nugwo omuhanda kandi runu tiruli nurwo orubuga, mumpoondere, ninyija kubaragirra omuntu ou murukuserra.” Nubwo yabatomya Samaliya.

²⁰Obu bakaba nibakyataaha Samaliya, Erisa yagamba ati: “MUKAMA, igura amaiso g'abasaija banu nukwo bahweze.” Nubwo MUKAMA yaigura amaiso gabu, aho, bayesanga bali hagati ya Samaliya.

²¹Omukama wa Isirairi obu yaboine abasaija banu nukwo kugambira Erisa ati: “Taata, mbaite? Mbaite?”

²²Yamugarukamu ati: “Otabaita. Nosobora kwita abo abafoirwe banyagwa habw'empirima n'omusogi gwawe. Batekanirize emigaati n'amaizi, balye kandi banywe, bagaruke hali mukama wabu.”

²³Nubwo yabatekaniriza obugenyi bukooto; obu baamazire kulya n'okunywa, yabalekera baagenda owa mukama wabu. Abanyasiriya kuruga obu batagarukire kurumba ensi ya Isirairi.

²⁴Obu haahingwireho akasumi, Benihadadi omukama wa Siriya akazinisa ihe rye ery'amaani, yagenda yagota Samaliya.

²⁵Samaliya, rukaba rugwirwemu kiihe etagambwa, ekyarugire omu kugota orubuga, ebyokulya nukwo kukeehera kimu, ekyarugiremu, omutwe gw'enkaina nukwo kugura ebicweka by'efeeza kinaana, kandi eky'ebisoodo by'eriiba ebirukuhikya ekicweka kya kilo, byagura ebicweka by'efeeza bitaano.

²⁶Omukama wa Isirairi obwakaba naaraba haihi n'ekisiika, omukazi yamweta naagamba ati: “Waitu Agutamba, onkonyere!” Omukama yagarukamu ati:

²⁷“MUKAMA wenka obu ataakukonyere, nyowe nsobora nta kukukonyera, nyina engano nandiki amaarwa?”

²⁸Omukama yakaguza omukazi ati: “Bulemeezi ki obu oinabwo?” Omukazi yagarukamu ati: “Omukazi onu akangamba ati: ‘Leeta omwana wawe ogu tumulye kiro kinu, ijo nubwo tulirya owange.’

²⁹Omwana wange twamucumba, twamulya. Ha kiro ekyakurasireho, namugamba nti: ‘Kandi abaragaine, beetana? Omwana wawe muleete, nuwe tulye’; baitu omwana we akaba amuserekere.” “Aga babaza nibajunga, tinugo babaza nibataha.”

³⁰Omukama obu yahuliire omukazi ebi yamugambiire, yatemura ebyokujwara bye, obwakaba naaraba haihi n'ekisiika, abantu baamuhanga amaiso, baarora nkooku yabandize kujwara eguniya, niyo yagerekaho engoye ze.

³¹Yagamba ati: “MUKAMA naakanyite, obwire kwira Erisa atakatemerweho omutwe!”

³²Omu kasumi ako Erisa akaba aikaliire omunju ye, n'abakuru baikaliire na uwe. Omukama akaba atumire omuntu hali abo abakaba bali na uwe; baitu omukwenda ogu obwakaba atakahikire Erisa yakaguza abakuru ati: “Muboine omwisi onu nkooku atumire omuntu ow'okuncwaho omutwe? Obu muraabona omukwenda naija, mukinge orwigi, murugumize kimu abule h'okuraba. Omukama wonyini naija kuba amukurasire amuli haihi.”

³³Obwakaba naakyabagambira ebi, omukama yamuhikaho yagamba ati: “MUKAMA nuwe aleesire akabi kanu! Nkyasemeriire nta kwongera kumwesiga?”