Read Runyoro - rutooro 2 Bakam 8 Bible Online

2 Bakam 8 - Runyoro - rutooro bible

2 Bakam 8

¹Erisa akaba agambiire omukazi ou yahumbuliire omwana ati: “Imuka ogende n'eka yawe yoona, oikale nambere oraazoora; habwokuba MUKAMA naija kunaga enjara, niija kugwa omunsi okumara emyaka musanju.”

²Omukazi akaimuka, yakora omuntu wa Ruhanga eki yamugambiire; akagenda hamu n'eka ye yoona, yaikara omunsi y'Abafirisiti okumara emyaka musanju.

³Emyaka musanju obu yahoireho, omukazi ogu yagaruka omu Isirairi, yagenda mb'omukama, kusaba enju ye n'itaka lye bimugarulirwe.

⁴Omu kasumi ako, omukama akaba naabaza na Gehazi omuheereza w'omuntu wa Ruhanga naagamba ati: “Ongambire ebintu ebikuru Erisa ebi yakozire.”

⁵Gehazi obwakaba naakyagambira omukama, Erisa nkooku akaba ahuumbwire omufu, dara omukazi kihuumbulirwa mwana, ajuliire hali omukama, naatongana enju ye n'itaka lye. Gehazi akagamba ati: “MUKAMA wange omukama, omukazi dara we, omwana we Erisa ou yahumbwire, na uwe ngunu!”

⁶Omukama obu yakagwize omukazi, omukazi yamugambira, omukama nukwo kumukomera omunyoro yamuragira ati: “Omugarurre ebintu bye byona, hamu n'omuhendoi ogw'ebyokulya ebyalimirwe ha itaka lye omu myaka musanju enu ei amazire ataroho.”

⁷Erisa akagenda Damasiko. Benihadadi omukama wa Siriya akaba ali murwaire; obu baamugambiire ngu:

⁸Erisa aizire hanu, yagambira Hazaleeri ati: “Genda oitirane omuntu wa Ruhanga, omutwarre ekisembo kinu, okaguze MUKAMA nooraba omuli uwe, obu ndaaba ndi w'okukira endwara enu.”

⁹Hazaleeri yagenda kwitirana Erisa, yamutwarra ekisembo, yamutwarra ebintu ebitali bimu ebya Damasiko, ebyayetwekerwe engamiya amakumi ana. Obu yamuhikireho yamwemerra omumaiso, yagamba ati: “Mutabani wawe Benihadadi omukama wa Siriya, akuntumireho naakaguza ati: Endwara enu, ndaagitabuka?”

¹⁰Erisa yamugarukamu ati: “Ogende omugambire oti: ‘Mazimakwo, noija kukira’; MUKAMA noobu araaba amanyisize ngu tali w'okukira baitu ogende omugambire, naija kukira.”

¹¹Yaikara amuhangire amaiso, okuhika obu yakwasirwe ensoni. Omuntu wa Ruhanga yarra.

¹²Hazaleeri yamukaguza ati: “Mukama wange, noolizibwa ki?” Yamugarukamu ati: “Habwokuba mmanyire akabi ak'orukwija kukora abantu ba Isirairi; ebigo byabo noija kubyokya, abantu baabo abato, noija kubaisa empirima, abaana baabu obatemateme, bakazi baabu abanyakwina enda, ozibaihemu.”

¹³Hazaleeri yagamba ati: “Omwiru wawe, nuwe oha arukusobora kukora ekintu nk'eki? Nuwe oha? Ngira, mbwa nyabubwa.” Erisa yagarukamu ati: “MUKAMA ammanyisize nkooku orukwija kuba mukama wa Siriya.”

¹⁴Nubwo yarugireho Erisa yagenda, yagaruka omba mukama we, mukama we yamukaguza ati: “Erisa akugambiire ki?” Yamugarukamu ati: “Angambiire ngu mazimakwo torukwija kufa”

¹⁵Ha kiro ekyakurasireho, Hazaaleeri akakwata eky'okwesweka, yakiibika omu maizi, yakimuta ha maiso, okuhika obu yakakabire. Hazaleeri yateera engoma omu kiikaro kye.

¹⁶Omu mwaka ogwa kataano ogw'engoma ya Yoramu mutabani w'Ahabbu omukama wa Isirairi, Yehoramu mutabani wa Yehosafaati omukama wa Yuda, nubwo yatandikire kulema.

¹⁷Nambere yateeriire engoma, akaba ahikize emyaka amakumi asatu n'ebiri, akalemera emyaka munaana ali omu Yerusaalemu.

¹⁸Akakora nk'abakama ba Isirairi, nk'ab'enju ey'Ahabbu oku baakozire, habwokuba muhara w'Ahabbu nuwe yaswire, akakora ebirukubiihiza MUKAMA.

¹⁹Baitu MUKAMA habw'omwiru we Daudi atagonze kuhwerekereza Yuda, habwokuba akaba amunihiize ngu abaijukuru be balirema obusinge bwona.

²⁰Omu businge bwa Yerobbowamu, Edomu nubwo yayemiire Yuda, bwaba bukama obwetongoire, baayeteeraho omukama owabu nyabwabu.

²¹Hanyuma Yoramu akagenda Zairi n'ebigaali bye byona. Akaimuka ekiro hamu n'engabwa ez'ebigaali bye, baateera Abeedomu abakaba babeehinguliriize; baitu ihe lye lyasingwa nirigaruka omu ka.

²²Edomu nukwo yajeemiire Yuda ati okuhika na ha kiro kinu.

²³Ebindi byona Yoramu ebi yakozire, bikahandiikwa omu kitabu eky'obusinge bwa Yuda.

²⁴Yoramu akafa nka baisenkuru oku baafiire, yaziikwa nkooku baaziikirwe omu rubuga rwa Daudi; Ahaziya mutabani we yateera engoma omu kiikaro kye.

²⁵Omu mwaka ogw'amakumi abiri ogw'engoma ya Yoramu mutabani w'Ahabbu omukama wa Isirairi, Ahaziya mutabani wa Yehoramu omukama wa Yuda, nubwo yatiire engoma.

²⁶Ha yateeriire engoma, akaba ahikize emyaka abiri n'ebiri, akalemera omwaka gumu omu rubuga Yerusaalemu. Ibara lya nyina nuwe Ataliya; akaba ali mwijukuru w'Omuli omukama wa Isirairi.

²⁷Nawe akakora nk'ab'omunju y'Ahabbu oku baakozire, yakora ebirukubiihiza MUKAMA, habwokuba akaba ali muko w'Ahabbu.

²⁸Akagenda hamu na Yoramu mutabani w'Ahabbu, kurwanisa Hazaleeri omukama owa Siriya omu kiikaro Ramosi-Giryadi.

²⁹OMUKAMA Yoramu, akagaruka omu rubuga Yezereeri kutambirwa ebihuta, Abaisirairi ebi bakaba bamuhutaaliize Ramosi, naarwana na Hazeeri omukama wa Siriya. Ahaziya mutabani wa Yehoramu omukama wa Yuda, akagenda kumurora, habwokuba akaba ali murwaire.