Read Runyoro - rutooro 2 Bakam 9 Bible Online

2 Bakam 9 - Runyoro - rutooro bible

2 Bakam 9

¹Hanyuma Erisa omurangi akeeta omu ha baana b'abarangi yamugambira ati: “Weteekanize, okwate ecupa y'amagita, ogende Ramosi-Giryadi.

²Obu oraahikayo oserre Yehu mutabani wa Yehosafaati, Yehosafaati mwijukuru wa Namusi; otaahe omunju omuragire aruge omu bagenzi be, omutwale omu kisiika eky'omunda.

³Okwate ecupa ey'amagita, ogamuseese ha mutwe noogamba oti: ‘MUKAMA naagamba ati, nakuseesaho amagita, obe mukama wa Isirairi.’ Hanyuma, okingule orwigi ogende; oteezigaziga.”

⁴Omusaija omuto omurangi yagenda Ramosi-Giryadi.

⁵Ha yataahiire, engabwa z'ihe zikaba ziri omu rukurato; yagamba ati: “Waitu engabwa, nyina ebigambo ebi mbaleetiire.” Yehu yakaguza ati: “Omuli itwe, obireetiire oha?” Oli yagarukamu ati: “Mbireetiire iwe, waitu.”

⁶Ababiri abo baataaha omunju; omusigazi yaseesa amagita ha mutwe gwa Yehu, naamugambira ati: “MUKAMA Ruhanga owa Isirairi naagamba ati: Nakuseesaho amagita, obe mukama oleme abantu ba MUKAMA, nubo Abaisirairi.

⁷Oite enju y'Ahabbu mukama wawe, nukwo mpoole Yezebeeri enzigu habw'okwita abaheereza bange abarangi, n'abaheereza ba MUKAMA, abandi boona.

⁸Enju y'Ahabbu yoona y'okuhwerekerra; ninyija kumumaraho abasaija boona, abanyagwa rundi abatali banyagwa omu Isirairi.

⁹Enju y'Ahabbu, ninyija kugikora nkooku nakozire eya Yerobbowamu mutabani wa Nebati, kandi nkooku nakozire eya Baasa mutabani w'Ahija.

¹⁰Yezebeeri, embwa niziija kumuliira ha itaka lya Yezereeri, hatalibaho n'omu akumuziika.” Obu yamazire Kugamba ebi, yakingura orwigi yairuka.

¹¹Yehu obu yahikireho abaheereza ba mukama we, baamukaguza bati; “Oku harungi? Omuntu omugu w'iraro onu kiki ekyamuleesire owaawe?” Yabagarukamu ati: “Omuntu ogu, mumumanyire, n'embaza ye nimugyetegereza.”

¹²“Eki ogambire tikiri ky'amazima, Tugambire.” Yagamba ati: “Kinu nikyo yangambiire ati: ‘MUKAMA naagamba ati, nakuseesaho amagita, obe mukama wa Isirairi.’”

¹³Nubwo boona baakwasire ebyokujwara byabo, baabimwalirra ha matembero eruguru arubateho, baateera engwara, baatokera haiguru bati: “Yehu nuwe mukama.”

¹⁴Yehu mutabani wa Yehosafaati, Yehosafaati mwijukuru wa Nimusi, nukwo yayekobere n'abandi ati okwemera Yoramu. (Yoramu n'Abaisirairi boona, bakaba nibalinda omu kiikaro Giryadi, barwanise Hazayeri omukama wa Siriya;

¹⁵baitu omukama Yoramu, akaba agarukire Yezereeri kutambirwa ebihuta, ebi yahutaaziibwe Abasiriya, naarwana na Hazayeri omukama wa Siriya.) Yehu akagamba ati: “Kinu obu oraaba nikyo orukuteekereza, otaikiriza omuntu n'omu kuruga omu rubuga, akagenda kutwara amakuru ago Yezereeri;”

¹⁶Nubwo Yehu yatembere ekigaali kye, yagenda Yezereeri; habwokuba Yoramu nuho akaba ali. Kandi Ahaziya omukama wa Yuda, akaba abungiire Yoramu.

¹⁷Omu kasumi ako, omu munaara ogwa Yezereeri, hakaba heemeriireyo omulinzi, yaleeba Yehu n'abantu be nibaija, yagamba ati: “Nindora ekitebe ky'abantu.” Yoramu yagamba ati: “Kwata omutembi w'embaraasi omu, omutume agende abaitirane, abakaguze ati: ‘Muleesirwe birungi?’”

¹⁸Omusaija omutembi w'embaraasi yagenda, kwitirana Yehu, yamugambira ati: “Omukama naakukaguza ngu oleesirwe birungi?” Yehu yakaguza ati: “Eby'obusinge, iwe obiroho ki? Kubuutuka ongaruke enyuma.”

¹⁹Omukwenda ondi akatumwa owa Yehu, yamukaguza ekikaguzo nkakiri omurundi gundi Yehu yamugarukamu ati: “Eki okifiireho ki? Garuka enyuma yange.”

²⁰Omulinzi yagaruka obwa kabiri naaranga ati: “Omukwenda abahikireho, baitu tali w'okugaruka.” Yayongera yagamba ati: “Omwebembezi w'abantu bali ekigaali kye naakiirukya nk'omugu w'iraro, nka Yehu wonyini.”

²¹Yoramu yagamba ati: “Munteekanirize ekigaali.” Baakimuteekaniriza. Hanyuma Yoramu omukama wa Isirairi, n'Ahaziya omukama wa Yuda, baimukya, buli omu ali omu kigaali kye, baagenda kwitirana Yehu, baamusanga ha musiri gwa Nabosi Omuyezereeri.

²²Yoramu obu yaboine Yehu, yakaguza ati: “Yehu, oleesirwe birungi?” Oli yagarukamu ati: “Obusiihani bwa nyoko Yezebeeri n'oburogo bwe obu biraaba nibikyayeyongera, kandi obusinge buraaruga ha?”

²³Nubwo Yoramu yahindwire embaraasi ye, yairuka yagambira Ahaziya ati: “Ahaziya, ofuuhye obugobya!”

²⁴Yehu yaleega obuta bwe n'amaani ge goona, yarasa Yoramu emitumanyima, omusogi gwakwata n'omutima, yagwa omu kigaali kye.

²⁵Yehu akagambira Bidukaari engabwa ye ati: “Muhimbe omunage omu musiri gwa Nabosi Omuyezereeri; habwokuba oijuke, iwe na nyowe obu tukaba tutembere embaraasi, iwe oli ha rubaju rumu, nyowe ndi ha rundi, tukuraatiire Ahabbu ise, MUKAMA nkooku yamugambireho ebigambo ebi:

²⁶MUKAMA naagamba ati: ‘Mazimakwo, ijo nkooku naboine esagama ya Nabosi n'eya batabani be, na iwe nukwo ndukwija kukukora ekikusemeriire omu musiri gunu gwonyini.’ Habweki hati, mutwale omunage omu musiri gwa Nabosi, MUKAMA nkooku yagambire.”

²⁷Ahaziya omukama wa Yuda obu yaboine eki yasingirwa ha bukiizi bwa Besi-hagani. Yehu yamugwa omu kirale yagamba ati: “Na uwe murase”; baamurasa naavuga ekigaali kye, ha matemba ga Guuli enyakuherraine na Ibulyamu. Yairukira Megido, oku nuho yagwire.

²⁸Abaheereza be baamutwarra omu kigaali, baamuhikya Yerusaalemu, baamuziike omu kituuro hamu na baisenkuru omu rubuga rwa Daudi.

²⁹Omu mwaka ogwa ikumi na gumu ogwa Yoramu mutabani w'Ahabbu, nugwo Ahaziya yateeriiremu engoma ya Yuda.

³⁰Yehu obu yahikireho Yezereeri, Yezebeeri yakimanya; yayekunisa ha maiso yayetiibiibya omutwe, yalinguliririza omu idirisa.

³¹Yehu obwakaba naataaha omu irembo, Yezebeeri yakaguza ati: “Iwe Zimuli kiita mukama wawe, olesirwe birungi?”

³²Yehu yaimukya amaiso, yarorra omu idirisa yakaguza ati: “N'oha ogu anyakuli ha rubaju rwange? N'oha?” Abakonwa babiri rundi basatu baamuhanga amaiso.

³³Yabagambira ati: “Omukazi mumusindike agwe hansi.” Baamusindika yagwa; esagama ye yataraakira ekisiika n'embaraasi, Yehu yatemba embaraasi ze n'ekigaali kye, yamurubaatirra.

³⁴Hanyuma yagenda yalya kandi yanywa; yagamba ati: “Hati, mukoleho omukazi ogu omukyenwa, mumuziike; habwokuba mubiitokati.”

³⁵Baitu obu baagenzire kumuziika, batamusange weena ahikiriire, bakasangaho oruhanga, ebigere n'ebiganja.

³⁶Obu baagarukire baagambira Yehu, akagamba ati: “Eki nikyo MUKAMA yagambire, eki yagambiire omu muheereza we Eriya Omutiisubi ati: ‘Omu kibanja kya Yezereeri, embwa nuho ziririirra omutumbi gwa Yezebeeri;

³⁷Omutumbi gwa Yezebeeri nigwija kuba nk'obusa obunyakunaganagirwe omu musiri omu kibanja kya Yezereeri, nukwo habuleho n'omu ow'aligamba ati: Ogu nuwe ayali Yezebeeri.’ ” “Agobeza munywani we azimba enda.”