Read Runyoro - rutooro 1 Byok 10 Bible Online

1 Byok 10 - Runyoro - rutooro bible

1 Byok 10

¹Abafirisiti, bakacwera Abaisirairi obulemu ha rusozi Giriboha. Abaisirairi baingi, oku nuho baagwire, kandi abaasigaireho, omuli abo otairemu Saulo n'abatabani, bairuka.

²Abafirisiti baabakwata, baita Yonasaani, Abinadabu, na Malikisuha batabani ba Saulo.

³Saulo, obulemu bwamusaalirra; yahikwaho abarasi b'obuta, baamuhutaaza.

⁴Nukwo kugamba omukwasi w'ebyokurwanisa bye, ati, “Somora empirima yawe ogintimbe onyite, abatasazirwe banu, bataikara kwija kunsekeereza.” Baitu omukwasi w'ebyokurwanisa bye, yatiina, eki tiyakikora. Saulo nukwo kukwata empirima ye yonyini, yagyeteeraho.

⁵Omukwasi w'ebyokurwanisa bye obu yaboine Saulo nkooku afiire, na uwe yayeteera ha mpirima ye, yafa.

⁶Saulo, nukwo yafiire ati; uwe, batabani be basatu, n'eka ye yoona, baafera hamu.

⁷Abasaija aba Isirairi boona abakaba bali omu kihanga, obu baaboine ihe nkooku liirukire, kandi Saulo na batabani be nkooku bafiire, baaruga omu mbuga zaabo bairuka; Abafirisiti baija baazitaahira.

⁸Ha kiro ekyakurasireho, Abafirisiti obu baizire kujuura emitumbi, bakasanga Saulo na batabani be, bagwire ha rusozi Giriboha.

⁹Baamujuura, bamucwaho omutwe, baagutwara hamu n'eby'okurwanisa bye, baatweka abakwenda barabemu ensi ey'Abafirisiti yoona, barangirre amakuru amarungi omumaju aganyakurumu ebisisani by'embandwa zaabo, n'abantu boona.

¹⁰Ebyokurwanisa bye, baabita omunju y'embandwa zaabo omutwe gwe baaguhanika omunju ya Dagoni.

¹¹Yabbesi-Giryadi yoona obu yahuliire byona Abafirisiti ebi baakozire Saulo,

¹²haimuka abasaija boona emanzi, omutumbi gwa Saulo n'eya batabani be baagiihayo, baagitwara Yabbesi nuho baagiziikire, ha nsi y'omuti omuhomozi, baamara ebiro musanju nibasiiba.

¹³Saulo habw'okutaba mwesigwa, nukwo yafiire ati; atabe mwesigwa hali MUKAMA, nukwo kutakwata biragiro bye, kandi yayekaguzaahoga omuntu arukubandwa emizimu, naaserra ow'okumwebembera,

¹⁴tiyaserra MUKAMA nuwe amwebembere. MUKAMA nukwo kumwita, obukama yabuha Daudi mutabani wa Yese.