Read Runyoro - rutooro 1 Byok 11 Bible Online

1 Byok 11 - Runyoro - rutooro bible

1 Byok 11

¹Abaisirairi boona, nubwo baayesoroize hamu bagendera Daudi Hebburooni, baamugambira bati, “Niitwe igufa lyawe, kandi nitwe nyama yawe.

²Omu busumi obwahingwire, Saulo noobwakaba akyali ha ngoma, niiwe waturukyaga, kandi niiwe watahyaga Isirairi; kandi MUKAMA Ruhanga wawe akakugambira ati, niiwe oliba muliisa w'abantu bange Abaisirairi, kandi niiwe oliba mulemi wabu.”

³Abakuru ba Isirairi boona, nukwo kuhikaho Omukama Daudi Hebburooni; yakora nabo endagaano Hebburooni, omumaiso ga MUKAMA, baamuseesaho amagita, abe MUKAMA wa Isirairi, MUKAMA nkooku yagambire, naaraba omu Samwiri.

⁴Hanyuma, Daudi n'Abaisirairi boona, nubo bagenzire Yerusaalemu, niyo Yebbusi, Abayebbusi abasi b'ensi, egi nambere bakaba bali.

⁵Abasi ba Yebbusi baagambira Daudi bati; “Hanu, tolirubataho.” Baitu Daudi yakwata ekigo kya Siyooni, nukwo kwetwa “Orubuga rwa Daudi.”

⁶Daudi yagamba ati: “Weena araabanza kwita Omuyebbusi, nuwe araaba munyoro; kandi nuwe araaba ngabwa.” Yowabbu mutabani wa Zerwiya nuwe yabandize kubaseesira, nukwo kufooka munyoro.

⁷Daudi yaikara omu kigo eki, nikyo kyayetiirwe Orubuga rwa Daudi.

⁸Yaruzitirra okuruga Milo okwehinguliriza; kandi Yowabbu yasemeza ekicweka ky'orubuga ekyasigaireho.

⁹Daudi akagenda naayeyongera ekitiinisa, habwokuba, MUKAMA ow'amahe yaikaraga na uwe.

¹⁰Banu nubo baserikali ba Daudi; endangaanwa; hamu n'Abaisirairi boona, abaamukonyiire muno omubukama bwe n'okumuta ha ngoma MUKAMA nkooku yagambireho Isirairi.

¹¹Binu nibyo ebirukugambwaho abasaija ba Daudi endangaanwa: Yasobbeyamu Omuhakimooni, ha basatu abo, nuwe akaba ali mukuru; akakwata icumu lye, yarwanisa abantu ebikumi bisatu, yabaita omukasumi kamu.

¹²Owa kabiri hali ogu ha basaija abasatu abo endangaanwa, nuwe Eryeza mutabani wa Dodo Omuhoohi.

¹³Abafirisiti obu baayesorooliize Pasidamimu kurwana, akaba ali hamu na Daudi. Omukiikaro eki, hakaba haroho omusiri ogwijwire sairi, omu musiri ogu, abantu abairukaga Abafirisiti, nuho bairukiire.

¹⁴Eryeza akeemerra hagati y'omusiri ogu, yagurwanirra, yaita Abafirisiti; MUKAMA yabajuna, naabaha obusinguzi obw'amaani.

¹⁵Ihe ly'Abafirisiti obu likaba litiire orukande omu kihanga kya Rrefaimu, abasatu ha basaija amakumi asatu abo ab'obusobozi, bakagenda ha mwandara ha bwingira bw'Aduraamu baahikaho Daudi.

¹⁶Omu kasumi ako, Daudi akaba ali omu kigo; kandi ihe ly'Abafirisiti, likaba liri Beterehemu.

¹⁷Daudi akagamba n'okwegomba ati, “Haa boojo, mburwa omuntu akampa amaizi ag'iziba erya Beterehemu erinyakuli haihi n'irembo!”

¹⁸Abasaija ab'obusobozi nukwo kuhagura orukande rw'Abafirisiti, baataha amaizi omu iziba lya Beterehemu erikaba liri haihi n'irembo, baagatwarra Daudi. Baitu Daudi tiyagonza kuganywaho; baitu yagaseesa kibe kihongwa kya MUKAMA eky'ekyokunywa.

¹⁹Yagamba ati, “Ruhanga ondinde, ndeke kukora ekintu nka kinu! Kimpikiriire kunywa esagama y'abasaija banu? Habwokuba, kuleeta amaizi ganu, bahweriiremu kimu obwomeezi bwabu.” Eki nikyo kyamutangire kuganywa. Abasaija abasatu emanzi, ebi nibyo baakozire:

²⁰Abisayi owanyina Yowabbu, nuwe akaba ali mukuru w'amakumi asatu abo.

²¹Uwe akaba ali muranganwa kukirra kimu amakumi asatu boona, kandi yafooka ngabwa yabo; baitu ataingane n'abasatu.

²²Kandi Bbenaaya mutabani wa Yehoyaada owa Kabuziiri, akaba ali musaija manzi, omukozi w'ebintu ebikuru; akaita emanzi ibiri eza Mowabbu. Kandi ha kiro ebirika ekibikaba bigweriireho, akagenda yaitira entale omu buhya.

²³Kandi akaita Omunyamisiri, omusaija mukooto muno, ow'akaba araihire mita ibiri n'okukiraho. Omunyamisiri ogu, akaba akwasire icumu, erirukusisa nk'omugamba ogw'omuruki w'engoye; baitu Bbenaaya akamuseesira akwasire omwigo, yamujakuraho icumu eri akaba akwasire, icumu lye lyonka, niryo yamwisize.

²⁴Ebintu ebi, Bbenaaya mutabani wa Yehoyaada nibyo yakozire, yatunga ekitiinisa nk'abasaija abasatu bali ab'obusobozi.

²⁵Akaranganwa omuli bali amakumi asatu, baitu ataingane abasatu banu, Daudi akamuha kurolerra abaserikale be abalinzi.

²⁶Abasaija ab'obusobozi abakaba bali b'amahe, amabara gaabo nugo ganu: Asaheeri owanyina Yowabbu, Erihanani mutabani wa Dodo owa Beterehemu,

²⁷Samosi owa Harodi, Herezi Omuperoni,

²⁸Ira mutabani wa Ikesi Tekowa, Abyezeri ow'Anatoosi,

²⁹Sibbekai omu Husati, Ilai omuhoohi,

³⁰Maharai owa Netofa, Heredi mutabani wa Bbaana owa Netofa,

³¹Itai mutabani wa Ribai owa Gibbeya ey'Ababbenyamiini, Bbenaaya owa Pirasooni,

³²Hurai owa ha busaaru bwa Gaasi, Abyeri Omurubasi,

³³Azimaveesi owa Bbaharumu, Eliahabba owa Salibboni,

³⁴Hasemi Omugizooni, Yonasaani mutabani wa Sage Omuharari,

³⁵Ahyamu mutabani wa Sakara Omuharali, Erifaali mutabani wa Uru,

³⁶Heferi omu Mekeraasi, Ahija Omuperoni,

³⁷Hezero omu Karumeeri, Narai mutabani w'Ezubbai,

³⁸Yoweri owanyina Nasani, Mibbuhaara mutabani wa Haguli,

³⁹Zereki Omwamooni, Naharai owa Bbeeroosi, ow'akaba ali mukwasi w'ebyokurwanisa bya Yowabbu mutabani wa Zerwiya,

⁴⁰Ira Omwisiri, Galebbu Omwisiri,

⁴¹Uliya Omuhiiti, Zabbadi mutabani w'Ahirayi,

⁴²Adina mutabani wa Siza Omurubeni, omwebembezi w'Abarubbeni, ow'akaba aina abantu makumi asatu,

⁴³Hanani mutabani wa Maaka, Yosafati Omumisini,

⁴⁴Uziya Omusitaroosi, Sama na Yeyeri batabani ba Hosamu Omuroyeri,

⁴⁵Yediyayeri mutabani wa Simuli, na Yoha owanyina Omutiizi,

⁴⁶Eliyeri Omumahavi, Yeribbai, na Yosaviya batabani b'Erinaamu, Isima Omumowabbu,

⁴⁷Elyeri, Obbedi, na Yasiyeri Omumezobba.