Read Runyoro - rutooro 1 Byok 12 Bible Online

1 Byok 12 - Runyoro - rutooro bible

1 Byok 12

¹Daudi obwakaba ali Zikuraagi, atarukusobora kuhika hanu na hali nkooku arukwenda, habwa Saulo mutabani wa Kiisi, banu nubo abasaija abaamuhikireho; kandi abasaija abo, bakaba bali omu basaija ab'obusobozi abaamukonyiire omu bulemu.

²Bakaba bali barasi b'obuta, kandi baasoboraga kurasa n'emisogi, n'okuhungura amabaale n'omwesuuso n'omukono ogw'obulyo, rundi ogw'obumoso; bakaba bali Babbenyamiini, b'oruganda rwa Saulo.

³Ahyezeri, nuwe akaba ali mukuru, naakuratwa Yowaasi, bombi batabani ba Semaaya owa Gibbeya; oteho Yezyeri na Pereti batabani b'Azimaveesi; Bberaka, Yehu ow'Anatoosi,

⁴Isumaaya owa Gibbyoni omusaija ow'obusobozi, omu ha makumi asatu bali, kandi omwebembezi wabu; Yeremiya, Yahazyeri, Yohanaani, Yozabbadi owa Gedera,

⁵Eluzai, Yerimoosi, Beyaliya, Semariya, Sefatiya Omuharufi,

⁶Erikaana, Isiya, Azaleeri, Yowezeeri, Yasobbeyamu ow'Abakoora;

⁷Yoweri na Zebbadiya batabani ba Yerohaamu Omugedoli.

⁸Daudi obwakaba ali omukigo eky'omwirungu, omu Baagaadi hakarugamu abaserikale abarwani ab'amaani kandi abamanyiire kurungi omulimo gwabu, abafundi omukurwanisa engabu n'amacumu, abakaba baine amaiso agarukusisana ag'entale, kandi hansozi abakaba baina enziriga nk'enjaza baagenda nambere ali.

⁹Ganu nugo amabara gaabo: Omukuru nuwe Ezeeri, owa kabiri Obbadiya, owa kasatu Eryabbu

¹⁰owa kana Misimana, owa kataano Yeremiya,

¹¹owa mukaaga Atai, owa musanju Elyeri,

¹²owa munaana Yohanaana, owa mwenda Elizabbadi,

¹³owa ikumi Yeremiya, owa ikumi n'omu Makibbanai.

¹⁴Abaagaadi abo bakaba bali ngabwa z'amahe, ayakiraga obuto, yalemaga abantu kikumi, kandi ayakiraga obukuru yalemaga rukumi.

¹⁵Omu kwezi okw'okubanza, ekisaaru Yorudaani obu kikaba kisandaire, kimizire emisa yakyo yoona, abo nubo abantu abakyambukire baabinga boona abakaba bali omu bihanga, baabahikya Burugaizooba na Bugwaizooba.

¹⁶Kandi abamu ha bantu ba Bbenyamiini n'Abayuda, bakagenda omu kigo, Daudi nambere akaba ali.

¹⁷Daudi yagenda kubaitirana yabagambira ati, “Obu muraaba mwizire nk'abanywani kunkonyera, nyeteekaniize kweteeraniza na inywe, baitu obu muraaba muleesirwe kundiirana munkwase abanyanzigwa bange, kandi kunu ntaina kibi eki nkozire, eki Ruhanga owa baisenkuruitwe akyetegereze, kandi nuwe acwe omusango.”

¹⁸Mwoyo, nubwo yatembere Amasai, omukuru ha makumi asatu bali; yagamba ati: “Ego, tuli bawe Daudi; kandi tuli hamu na iwe mutabani wa Yese, otunge obusinge, otunge obusinge, kandi butungwe n'abakonyezi bawe! Habwokuba, Ruhanga wawe nuwe akukonyera.” Daudi nukwo kubaikiriza, yabafoora ngabwa z'amahe ge.

¹⁹Daudi obu yagenzire hamu n'Abafirisiti kurwanisa Saulo, abamu ha basaija ba Manaase, bakeeteeraniza na uwe. Baitu atabakonyere, habwokuba abalemi Ab'Abafirisiti bakahanuura baamubinga, nibateekereza bati, “obu aligarukira mukama we Saulo, buli itwe, twagwa omukabi.”

²⁰Obwakaba naagenda Zikuraagi, banu nubo abasaija Abamanaase abaayeteeraniize na uwe. Aduna, Yozabbadi; Yediyayeri, Mikairi, Yozabbadi, Elihu, na Zilesayi; engabwa ez'abantu enkumi omu Bamanaase.

²¹Nubo baamukonyire kurwanisa ihe ery'abaseesi; habwokuba, boona bakaba bali basaija b'amaani, emanzi, kandi bakaba bali ngabwa z'ihe.

²²Okuhika obuhakabaireho ihe erikooto erirukusisana ihe lya Ruhanga, buli kiro abasaija baikaraga nibahikaho Daudi kumukoonyera.

²³Gunu, nugwo omuhendo ogw'ebihanda eby'amahe ebikaba biina eby'okurwanisa ebyahikireho Daudi Hebburooni kumuta ha ngoma ya Saulo, MUKAMA nkooku akaba agambire.

²⁴Abasaija aba Yuda, abakaba nibarwanisa engabu n'amacumu, bajwaire ebyokurwanisa, bakaba bali kakaaga mu runaana.

²⁵Abasimyoni, abasaija ab'amaani emanzi karwana obulemu, bakaba bali kasanju n'ekikumi.

²⁶Abaleevi, enkumi ina mu rukaaga.

²⁷Omunyoro Yehoyaada, ow'enju y'Arooni, akaba aina enkumi isatu n'orusanju.

²⁸Zadooki omusigazi ow'amaani emanzi, akaba aina engabwa abiri na ibiri, ezaarugire omunju ya ise yonyini.

²⁹Ababbenyamiini ab'oruganda rwa Saulo, enkumi isatu, okuhika omukasumi ako, abakira obwingi omuli bo, bakaba bali beesigwa ha nju ya Saulo.

³⁰Abefuraimu, obukumi bubiri n'orunaana, abasaija ab'amaani emanzi, abantu abaranganwa omumaju ga baisenkurubo.

³¹Ekicweka ky'oruganda orwa Manaase, omutwaro gumu n'akanaana, nubo baakomerwe kugenda kuta Daudi ha ngoma.

³²Abaisakaara, abantu abakaba nibeetegereza eby'obwire obu, abaasoboraga kumanya, Isirairi ebi esemeriire kukora, bakaba bali banyoro ebikumi bibiri, kandi n'ab'oruganda rwabu boona, baahurraga ebiragiro byabo.

³³Abazabbulooni, ebihanda by'amahe ebikaba bitendekerwe ebikaba biina ebintu eby'okurwana, biina ebintu byona eby'obulemu, bakonyere Daudi nibagenderra ekintu kimu kyonka, bakahika obukumi butaano.

³⁴Abanafutaali, engabwa rukumi, abakaba baina abasaija emitwaro esatu mu kasanju abakwasire engabu n'amacumu.

³⁵Abaadaani, emitwaro ebiri, omu kanaana n'orukaaga abasaija abaina ebyokurwanisa eby'obulemu.

³⁶Abaaseri, ebihanda by'amahe emitwaro ena, abasaija abatendekerwe kurungi, abakaba beeteekaniize kurwana.

³⁷Abarubbeeni, Gaadi n'ekicweka eky'oruganda rwa Manaase, okuruga obuseeri bwa Yorudaani, emitwaro ikumi n'ebiri abakaba baina ebyokurwanisa by'obulemu byona.

³⁸Abasaija abo boona, bajwaire ab'obulemu nkooku bajwara, bakagenda Hebburooni, baina ekiteekerezo kimu kyonka, nikyo eky'okuta Daudi ha ngoma ya Isirairi yoona; Abaisirairi abandi boona abaasigaireho, nabo, bakaba nibagonza ekintu kimu, nukwo kuta Daudi ha ngoma.

³⁹Kandi bakamara Hebburooni ebiro bisatu, bali hamu na Daudi, nibalya, nibanywa, habwokuba ab'oruganda rwabu, nubo bakaba babateekaniriize.

⁴⁰Kandi n'abataahi baabo, okurugira kimu omu ba Isakaara, Zabbulooni, na Nafutaali, bakaija baaleeta ebyokulya ha nkaina, ha ngamiya, ha nyumbu, na ha nte enimi, ebiihuro by'ebyokulya ebitarukubarwa, ebitonge by'ebijuma by'emitini, enko z'ebijuma by'emizabbibbu, eviini, amagita, ente n'entaama, habwokuba, Isirairi ekaijura omuhimbo.