Read Runyoro - rutooro 1 Byok 13 Bible Online

1 Byok 13 - Runyoro - rutooro bible

1 Byok 13

¹Daudi akeehanuuzaaho engabwa ezaalemaga enkumi n'ezaalemaga ebikumi, hamu n'abeebembezi boona.

²Yagambira ekitebe ky'Abaisirairi boona ati, “Obu muraaba nimukisiima, kandi MUKAMA Ruhanga waitu obu araaba naakigonza, tutumeho bagenzi baitu aba hara abali omunsi ya Isirairi yoona, banyakatagara n'Abaleevi abanyakuli omumbuga ezinyakwina amaliisizo, beesorooze batuhikeho.

³Nubwo tugarre Esanduuko ey'Endagaano eya Ruhanga waitu; habwokuba, omu businge bwa Saulo, tutagiteho mutima.”

⁴Ekitebe kyona, eki kyakiikiriza, habwokuba abantu boona bakarora nkooku kihikire.

⁵Daudi nubwo yasoroize Isirairi yoona okuruga Sihoora akasaaru ka Misiri, okugarukira ha ntaaho ya Hamasi, baihe Kiryasi-Yeyalimu esanduuko ya Ruhanga.

⁶Daudi na Isirairi yoona, nukwo kugenda Baala, niyo Kiryasi-yeyalimu eya Yuda, baiheyo esanduuko ya Ruhanga, enyakwetwa ibara lya MUKAMA Anyakusingire ha kitebe ky'obukama, haiguru ya bakerubbi.

⁷Esanduuko ya Ruhanga, bakagireetera ha kigaali ekihyaka, ekigaali eki, kikaruga omunju y'Abinadabu, Uza n'Ahiyo, nubo baabingaga ekigaali eki,

⁸Daudi n'Abaisirairi boona, bakaba nibaguruka nibeebanda omumaiso ga MUKAMA, n'amaani gaabo goona, nibazina, nibateera enanga, endongo, esurumbeete, ebitaasa, n'amakondere.

⁹Obu baahikire ha rubuga oruhuulirwaho orwa Kidoni, Uza yagorra omukono akwate esanduuko, habwokuba, ente zikeesiitara.

¹⁰MUKAMA yamubiihirirwa muno, nukwo kumwita, habwokuba akakwataho esanduuko; omumaiso ga Ruhanga aho, nuho yagwire.

¹¹MUKAMA habwokufubira Uza, Daudi yabiihirwa muno; ekiikaro eki, nukwo kwetwa Pereezi-Uza[5], okuhika na hati.

¹²Kiro eki, Daudi akatiina Ruhanga; nukwo kwekaguza ati, “Esanduuko ye enu, nsobora nta kugitaahya owange?”

¹³Esanduuko, Daudi nukwo kugitaahya omurubuga rwe, baitu yagitwara ha rubaju, omunju y'Obbededomu Omugiiti.

¹⁴Yaikara omu ruganda rw'Obbededomu, omunju ye okumara ameezi asatu; MUKAMA, oruganda rw'Obbededomu n'ebintu byona ebi akaba ainabyo yabiha omugisa.