Read Runyoro - rutooro 1 Byok 15 Bible Online

1 Byok 15 - Runyoro - rutooro bible

1 Byok 15

¹Daudi akeeyombekera amaju omurubuga rwe; yateekaniriza esanduuko ya Ruhanga ekiikaro, kandi yagiterra eheema.

²Hanyuma yagamba ati, “Busaho muntu n'omu arukwikirizibwa kwetweka esanduuko ya Ruhanga, okwihaho Abaleevi, habwokuba, MUKAMA akabakoma kwetweka esanduuko ye, n'okumuheereza obusinge bwona.”

³Yasorooza Abaisirairi boona, boona baagenda Yerusaalemu baiheyo esanduuko ya MUKAMA bagireete omukiikaro kyayo eki akaba agiteekaniriize.

⁴Yasorooza batabani b'Arooni n'Abaleevi:

⁵Omubatabani ba Kohasi, Uliyeri nuwe akaba ali mukuru, aina ab'oruganda rwe kikumi mu abiri;

⁶omubatabani ba Merali, Asaaya nuwe akaba ali mukuru, aina ab'oruganda rwe ebikumi bibiri mu abiri;

⁷omubatabani ba Geresoomu, Yoweri nuwe akaba ali mukuru, aina ab'oruganda rwe kikumi mu asatu;

⁸omubatabani b'Elizafaani, Semaaya nuwe akaba ali mukuru, aina ab'oruganda rwe ebikumi bibiri;

⁹ha batabani ba Hebburooni, Elyeri nuwe akaba ali mukuru, aina ab'oruganda rwe kinaana;

¹⁰Omubatabani ba Uziyeli, Aminadabbu nuwe akaba ali mukuru, aina ab'oruganda rwe kikumi omu ikumi na babiri.

¹¹Hanyuma Daudi nubwo yayesire banyakatagara, Zadooki n'Abyasara, n'Abaleevi, Uliyeri, Asaaya, Yoweri, Semaaya, Elyeri, n'Aminadabbu,

¹²yabagambira ati: “Ninywe bakuru b'amaju g'Abaleevi; mweyeze inywe hamu na bagenzi banyu, nukwo muleete esanduuko ya MUKAMA Ruhanga wa Isirairi, omukiikaro eki ngiteekaniriize.

¹³Ha murundi gw'okubanza, habwokuba mutagyeyo kugyetweka, MUKAMA Ruhanga waitu nikyo yatufubiriire, habwokuba tutagiteho mutima nkooku ekaba esemeriire.”

¹⁴Baanyakatagara n'Abaleevi baayeyeza, nukwo baleete esanduuko ya MUKAMA Ruhanga wa Isirairi.

¹⁵Abaleevi esanduuko ya Ruhanga, baagihimbira ha mabega, bagitaire ha migamba, Musa nkooku yaragiire, MUKAMA nkooku yagambire.

¹⁶Daudi, kandi akaragira abakuru b'Abaleevi bakome ab'oruganda rwabu babe bazini abasobora kuzinira muno ha bintu ebinyakuteerwa abantu, nibazinira ha ndongo, ha nanga, na ha bitaasa, bazine n'amaraka ag'omuhimbo.

¹⁷Abaleevi nukwo kukoma Hemani mutabani wa Yoweri; kandi omubagenzi be, baakomamu Asafu mutabani wa Bberekiya; kandi omubatabani ba Merali ow'oruganda rwabu baakomamu Esani mutabani wa Kusaya; omu ha beene baabo Abameraali,

¹⁸abo bakaba baina beene baabo abarukubairirra omu kitiinisa, nubo banu: Zekaliya, Yaazyeri, Semiramoosi, Yehiyeli, Uni, Eryabbu, Bbenaaya, Maaseya, Matisiya, Eriferehu, Mikineya kandi abalinzi b'irembo, Obbedomu na Yeyeri.

¹⁹Abazini nubo banu: Hemani, Asafu n'Esaani nubo bakaba bali b'okuteera ebitaasa eby'omulinga;

²⁰Zekariya, Aziyeli, Semiramoosi, Yehyeli, Uni, Eryabu, Maseya na Bbenaaya, abo bakaba bali b'okuteera endongo, nk'Alamosi;

²¹baitu Matisiya, Eliferehu, Mikuneya, Obbededomu, Yeyeri n'Azaziya bakaba bali b'okwebembera nibateera enanga, nka Seminiisi.

²²Kenaniya omwebembezi ayazinisaaga Abaleevi, nuwe akaba aina omulimo ogw'okwebembera ebizina, habwokuba akaba abyetegeriize.

²³Bberekiya n'Erikaana, nubo bakaba bali balinzi b'irembo esanduuko eri hekaba niija kuraba.

²⁴Sebaniya, Yosafaati, Netaneeri, Amasai, Zekaliya, Bbenaaya n'Eryeza banyakatagara, nubo bakaba baina omulimo ogw'okuteera amakondere omumaiso g'esanduuko ya Ruhanga. Obbededomu na Yehiya, nabo, bakaba bali balinzi b'irembo erikaba niriija kurabwamu esanduuko.

²⁵Daudi n'abeebembezi ba Isirairi, n'engabwa ez'abantu enkumi, nukwo baagenzire bati, kuleeta esanduuko y'endagaano ya MUKAMA, kugiiha omunju y'Obbededomu, baijwire omuhimbo.

²⁶Kandi habwokuba Ruhanga akakoonyera Abaleevi abakaba beetwekere esanduuko y'endagaano ya MUKAMA, nukwo kutamba enimi musanju, n'entaama empaya musanju.

²⁷Daudi akajwara ekanzu eya kitaani enungi, n'Abaleevi, Abaleevi boona abakaba bahimbire esanduuko nkooku bakaba bajwaire, hamu n'abazini, na Kenaniya ayayebemberaga ebizina by'abazini, Daudi, kandi akajwara efodi eya kitaani.

²⁸Abaisirairi boona, nukwo baaleesire bati esanduuko ey'endagaano ya MUKAMA, nibatoka, nibateera engwara, amakondere, ebitaasa, kandi baazina muno nibateera endongo n'enanga.

²⁹Esanduuko ey'Endagaano ya MUKAMA obu ekaba neetaaha omurubuga rwa Daudi, Mikaali muhara wa Saulo, yarorra omu idirisa, yabona Daudi naacekeca naayebanda; yamugayisa omutima.