Read Runyoro - rutooro 1 Byok 16 Bible Online

1 Byok 16 - Runyoro - rutooro bible

1 Byok 16

¹Baaleeta Esanduuko ya Ruhanga, baagitahya omuheema, Daudi ei yagiteeriire; baahonga ebihongwa eby'okwokya n'eby'okusaba obusinge, omumaiso ga Ruhanga.

²Daudi obu yamazire kuhonga ebihongwa eby'okwokya n'eby'okusaba obusinge, yasabira abantu omugisa omu ibara lya MUKAMA,

³yagabira Abaisirairi boona, abasaija n'abakazi, buli muntu yamuha omugaati, yamutambura enyama, n'ekitonge ky'emizabbibbu.

⁴Yayongera yakoma Abaleevi abamu, baheerezeege omu maiso g'esanduuko ya MUKAMA, beesengerezeege, basiimege kandi bahaisanizege MUKAMA Ruhanga owa Isirairi.

⁵Asafu nuwe akaba ali mukuru, hakurataho Zekaliya, Yeyeri, Semiramoosi, Yehiyeli, Matisiya, Eryabu, Bbenaaya, Obbededomu na Yeyeri, bateerege endongo n'enanga; Asafu akaba akomiirwe kuteera ebitaasa.

⁶Kandi Bbenaaya na Yahaziyeli banyakatagara bakaba bali b'okwikara nibateera amakondere, omumaiso g'esanduuko y'endagaano ya Ruhanga.

⁷Ha kiro eki, omulimo ogw'okuzina kusiima MUKAMA, Daudi nubwo yabandize kugukomera Asafu n'Abaleevi n'ab'oruganda rwe.

⁸Musiime MUKAMA, mukunge Ibara lye, mumanyise amahanga ebikorwa bye.

⁹Mumuzinire, mumuhaisanize, musubirre ebyamahano ebi akora!

¹⁰Mwenyumirize omu ibara lye erirukwera; emitima y'abo abanyakuserra MUKAMA ekyanganuke!

¹¹Muserre MUKAMA n'amaani ge, muserre amaiso ge obutalekerra!

¹²Inywe baijukuru b'Abburahamu omwiru we, batabani ba Yakobbo ou yakomere.

¹³Mwijuke ebihuniriza ebi yakozire, eby'amahano ebi yakozire, n'emisango ei yacwire.

¹⁴Nuwe MUKAMA Ruhanga waitu; nuwe acwera ensi yoona emisango.

¹⁵Aijuka endagaano ye obusinge bwona, nikyo ekigambo eki yaragiire abantu ab'obusinge rukumi oburukukuratana,

¹⁶endagaano ei yaragaine n'Abburahamu, eki yanihiize Isaaka ataireho n'okurahira,

¹⁷eki yagumize kibe kiragiro hali Yakobbo, ebe endagaano hali Isirairi ey'ebiro n'ebiro

¹⁸naagamba ati “Ndikuha ensi Kanaani, gube mugabo gwawe ogw'obugwetwa.”

¹⁹Obu bakaba bali bake, kandi batarukuhebwa kitiinisa, bagonyi omunsi egi,

²⁰nibenjeera nibaruga omwihanga nibagenda omwihanga erindi, nibaruga omubukama obumu nibagenda omu bundi,

²¹ataikirize muntu n'omu kubabonesa, akahana abakama habwabu

²²naagamba ati, “Mutakwataho abantu bange abaaseesirweho amagita, mutakora akabi abarangi bange!”

²³Zinira MUKAMA iwe ensi yoona! Buli kiro, osubirrege okujuna kwe.

²⁴Mumanyise amahanga ekitiinisa kye, musubirre abantu boona ebyamahano ebi akora!

²⁵Habwokuba MUKAMA w'ekitiinisa w'okuhaisanizibwa muno, kandi w'okutiinwa okukira embandwa zoona.

²⁶Habwokuba, embandwa zoona ez'abantu, bisisani busisani baitu MUKAMA nuwe yahangire iguru.

²⁷Oburungi n'ekitiinisa biri omumaiso ge, obusobozi n'omuhimbo biri omu kiikaro kye ekirukwera.

²⁸Muhe MUKAMA ekitiinisa inywe enganda z'abantu, muhaise ekitiinisa kye n'amaani ge!

²⁹Muhe MUKAMA ekitiinisa ekisemeriire ibara lye; muhonge ekihongwa, kandi mwije omumaiso ge!

³⁰Muramye MUKAMA mujwaire ebyokujwara ebirukwera tukumira omumaiso ge, iwe ensi yoona; ego, ensi yoona egumire, terigaruka kwihururwa.

³¹Iguru lisemererwe, kandi ensi ekyanganuke, bigambire amahanga biti, “MUKAMA naalema.”

³²Enyanja ehirre, na byona ebigirumu, obwerre bukyanganuke, na byona ebiburumu!

³³Emiti ey'omu kibira nubwo ezine omumaiso ga MUKAMA ha bw'omuhimbo, habwokuba naija kucwera ensi yoona omusango!

³⁴Musiime MUKAMA habwokuba murungi; habwokuba engonzi ze ezitagarukirra ziikaraho ebiro n'ebiro!

³⁵Kandi mugambe muti: “Otujune Ai Ruhanga Omujuni waitu, tusorooze otutabule otwihe omumahanga, nukwo tusiime ibara lyawe erirukwera. Kandi twenyumirize omu kuhaisanizibwa kwawe.

³⁶MUKAMA Ruhanga wa Isirairi, ahaisanizibwege ebiro n'ebiro!” Abantu boona nubwo baagambire bati “Nukwo kibe kiti,” kandi baaramya MUKAMA.

³⁷Daudi, nukwo kuleka Asafu na bagenzi be omumaiso g'Esanduuko ey'Endagaano ya MUKAMA, baheerezeege oruteekerro, nkooku kiraabaga nikyetagwa buli kiro,

³⁸oteho Obbededomu na bagenzi be nkaaga na munaana; Obbededomu mutabani wa Yedusuni na Hosa, bakahebwa ogw'okulinda irembo.

³⁹Zadooki nyakatagara n'abagenzi be banyakatagara, yabaleka omumaiso g'eheema ya MUKAMA ey'ekaba eri Gibbyoni omu kiikaro eky'okuramizaamu,

⁴⁰bahongerege MUKAMA obutoosa ebihongwa eby'okwokya, nyenkya na rwebagyo, byona nkooku byahandiikirwe omu Biragiro bya MUKAMA ebi yaragiire Isirairi.

⁴¹Abo bakaba hamu na Hemani, Yedusuni, n'abandi abaakomerwe kandi baagambwa amabara, kusiimaga MUKAMA, habwokuba engonzi ze z'ebiro n'ebiro.

⁴²Ebizina eby'okuhaisaniza obu byabaga nibizinwa, Hemani na Yedusuni, nubo baateeraga amakondere, ebitaasa, n'ebintu ebindi. Batabani ba Yedusuni bakakomwa kulinda irembo.

⁴³Hanyuma, abantu boona nubwo baarugire aho, buli muntu yakwata ogw'owabu, Daudi na uwe yataaha, kusabira eka ye omugisa.