Read Runyoro - rutooro 1 Byok 19 Bible Online

1 Byok 19 - Runyoro - rutooro bible

1 Byok 19

¹Ebi obu byahoire, Nahasi omukama w'Abamooni yafa, omutabani Hanuni yajuumura engoma.

²Daudi yagamba ati, “Ndikorra Hanuni mutabani wa Nahasi eby'embabazi, nka ise oku yankoliire eby'embabazi.” Nukwo kumutumaho abakwenda naamumanyisa nkooku asaaliirwe kuhurra nkooku afeerirwe ise.

³Baitu abanyoro Abamooni baakaguza Hanuni bati: “Daudi noobu araaba atumire abantu ab'okukwirukirra, nootekereza naatamu sso ekitiinisa? Nangwa tikiri eki, ekireesire abaheereza be hali iwe, nukwo kutata, okujuumika, n'okwetegereza ensi enu.”

⁴Hanuni nukwo kukwata abaheereza ba Daudi, yabamwa omuleju, ebijwaro byabo yabisarra hagati nahagati nk'omu nyugunyu, yababinga; baagenda.

⁵Daudi obu baamugambiire ekigweriire abantu be, yatuma babaitirane, habwokuba, ensoni zikaba ziri z'okubaita. Omukama yabagambira ati: “Mwikalege Yeriko, okuhika emireju yanyu obu erikamera, nubwo mugaruke.”

⁶Abamooni obu baaboine nkooku beenobeseze Daudi, Hanuni n'Abaamooni baatweka ebisembo by'efeeza rukumi, bapangisa ebigaali n'abatembi b'embaraasi baruge Mesopotamiya, Aramu-Maaka na Zobba.

⁷Bakapangisa ebigaali emitwaro esatu, n'enkumi ibiri, n'omukama wa Maaka n'ihe rye, baija baateera orukande omu maiso ga Medebba. Abamooni bakasoroozibwa baruga omumbuga zaabo, baagenda ha bulemu.

⁸Daudi obu yakihuliire yatweka Yowabbu, n'ihe ryona rirumu abasaija ab'amaani.

⁹Abamooni baaturuka, baasimba enkarra ez'obulemu ha irembo ly'orubuga, kandi abakama abakaba baizire kukonyera, baayemerra bonka omu bwerre.

¹⁰Yowabbu obu yaboine obulemu nkooku bumuturukire omumaiso n'enyuma, nukwo kukoma abamu omu basaija Abaisirairi abarukukirra kimu oburungi, yabeemereza omu maiso g'Abasiriya;

¹¹abaasigaireho, ha basaija be, yabakwasa owanyina Abisayi, yabasimbisa enkarra omumaiso g'Abamooni.

¹²Yagamba ati, “Abasiriya obu kakuba barampingurana bakankiza amaani, nubwo murankonyera; kandi Abamooni obu baraabakiza amaani nyowe mbakonyere.

¹³Mugume, turwanirre abantu baitu masaija, kandi turwanirre embuga za Ruhanga waitu; MUKAMA akole eki arukugonza.”

¹⁴Yowabbu n'abantu aba akaba ainabo, nukwo kwirirra Abasiriya bakwatangane; Abasiriya baamwiruka.

¹⁵Abamooni obu baaboine Abasiriya nkooku bairukire, nabo nukwo kwiruka Abisayi owanyina Yowabbu, baataaha omurubuga. Hanyuma Yowabbu yagaruka Yerusaalemu.

¹⁶Abasiriya obu baaboine Abaisirairi nkooku babasingwire, nukwo kutuma Abakwenda, baihayo Abasiriya, abakaba bali obuseeri bw'ekisaaru Efurati, beebembirwe Sofaki engabwa y'ihe rya Hadadezeeri.

¹⁷Eki Daudi obu yakihuliire, yasorooza Abaisirairi boona, yayambuka Yorudaani, yabahikaho yayemereza amahe ge omumaiso gaabo. Daudi obu yasimbire enkarra arwanise Abasiriya, baarwana na uwe.

¹⁸Abaisirairi baabinga Abasiriya; Daudi yaita Abasiriya abasaija kasanju abaarwaniraga ha bigaali, abaserikale ab'ebigere emitwaro ena, Sofaki engabwa y'ihe ryabu, na uwe atatabuke.

¹⁹Abaheereza ba Hadadezeeri obu baaboine Abaisirairi nkooku babasingwire, baasaba Daudi obusinge, baafoka batungwa be. Abasiriya nukwo kwangira kimu, kugaruka kukoonyera Abamooni.