Read Runyoro - rutooro 1 Byok 20 Bible Online

1 Byok 20 - Runyoro - rutooro bible

1 Byok 20

¹Omu kasumi aka Kasambura, omwaka obu gukaba nigutandika, akasumi abakama aka baagenderahoga ha bulemu, Yowabbu akaturukya ihe, yahwerekereza ensi y'Abamooni, yagenda yagota orubuga Rabba. Baitu Daudi yaikara Yerusaalemu. Yowabbu yateera orubuga Rabba yaruhwerekereza.

²Daudi yaiha mukama wabu ekondo ha mutwe; yagirenga, yahikya etalenta y'ezaabbu emu, kandi ekaba erumu ibaale ery'omuhendo; ekondo egi, niyo yajwekerwe Daudi Yanyaga omu rubuga ebintu bingi muno.

³Abantu abakaba barurumu, yabaturukya, yabata ha mulimo ogw'okukozesa emisumeeni, esuuruuru, n'endemu; embuga zoona ez'Abamooni, Daudi nukwo yazikozire ati. Hanyuma, yagaruka Yerusaalemu, n'abantu boona.

⁴Ebi obu byahoire, hakacweka obulemu obw'okurwanisa Abafirisiti omu rubuga Gezere; omubulemu obu, Sibbekai Omuhuusi, nubwo yaitiiremu Sipai, omu ha baijukuru b'abasaija abo; Abafirisiti nukwo kusingurwa.

⁵Hakagaruka haacweka obulemu obundi obw'okurwanisa Abafirisiti; Erihanani mutabani wa Yairi, nubwo yaitiiremu Lahumi owanyina Goliasi, (Omugaasi) ow'akaba aina icumu eriina orubango orurukwingana omugamba gw'omuruki w'engoye.

⁶Hakongera haacweka obulemu obundi omu kiikaro Gaasi, nambere hakaba hali omusaija ekitikibisi, ha buli mukono akaba ainaho ebyara mukaaga, na ha buli kigere, ainaho ebyara mukaaga, byona hamu, abiri na bbina; ogu na uwe akaba ali mwijukuru w'abasaija abo.

⁷Obwakaba naasoisoimya Abaisirairi, Yonasaani mutabani wa Simeyi owanyina Daudi, yamwita.

⁸Abo na bo bakaba bali baijukuru b'abasaija abo aba Gaasi; bakaitwa Daudi n'abaheereza be.