Read Runyoro - rutooro 1 Byok 21 Bible Online

1 Byok 21 - Runyoro - rutooro bible

1 Byok 21

¹Sitaani akaimuka kurwanisa Abaisirairi, nukwo kusindika Daudi kubabara.

²Daudi nubwo yangambiire Yowabbu n'engabwa z'amahe ati, “Irooko mugende mubale Abaisirairi, okuruga Bbeeri-sebba okugarukira Daani, mungarurre amakuru, nukwo mmanye omuhendo gwabu.”

³Baitu Yowabbu yagarukamu ati, “MUKAMA ayongereho abantu be emirundi kikumi, okukira nkooku bali hati! Mukama wange omukama, boona tibali bairu bawe? Mukama wange, eki nokyetaagira ki? Nooyendera ki kuleetera Abaisirairi omusango?”

⁴Baitu omukama yahambiriza Yowabbu akole eki yamuragiire. Yowabbu nukwo kugenda yarabamu Abaisirairi boona, yagaruka Yerusaalemu.

⁵Yagambira Daudi omuhendo gw'abantu aba yabazire. Omu Isirairi yoona, hakaba harumu abasaija abaarwanisaaga empirima, akakaikuru kamu emitwaro ikumi; kandi omu Yuda, hakaba harumu emitwaro makumi ana na musanju.

⁶Baitu omukubara oku, Abaleevi n'Ababbenyamiini atabatemu, habwokuba, omukama eki yamuragiire atakigonze.

⁷Baitu ekintu eki kikabiihiza Ruhanga, nukwo kuteera Abaisirairi.

⁸Daudi akagambira Ruhanga ati, “Nsiisire muno okukora ekintu kinu. Baitu hati nkwesengeriize, onganyire nyowe omwiru wawe; eki nkikozesiibwe obudoma”

⁹MUKAMA nubwo yagambiire Gaadi omurangi wa Daudi ati:

¹⁰“Genda ogambire Daudi oti, MUKAMA naagamba ati, Nkuteeriireho ebintu bisatu; hali byo okomeho kimu, eki oraakomaho nikyo ndaakukorra.”

¹¹Gaadi nukwo kuhikaho Daudi yamugambira ati, “MUKAMA naagamba ati: ‘Hali binu, oyekomereho eki orukwenda: rundi

¹²emyaka esatu eya kiihe; rundi kumara ameezi asatu noohwerekerezibwa abazigu baawe, empirima zaabo zikuroho; rundi ebiro bisatu eby'empirima ya MUKAMA, kagingo kugwera ensi enu, na malaika wa MUKAMA kurabamu ensi ya Isirairi yoona, akagihwerekereza.’ Hati cwamu, eki ndaagarukamu oli ayantumire.”

¹³Daudi nubwo yagambiire Gaadi ati, “Nsobiirwe; ka nyete omu mikono ya MUKAMA, habwokuba w'embabazi ezitagambwa; baitu tinyete omu mikono y'abantu.”

¹⁴MUKAMA nukwo kusindikira Isirairi kagingo; haafa Abaisirairi obukumi musanju.

¹⁵Hanyuma yatweka malaika Yerusaalemu, aruhwerekereze, obwakaba ali haihi kuruhwerekereza, MUKAMA yarora, yaganyira ekibi eki; nukwo kugamba malaika ayahwerekerezaaga ati, “Lekera aho, garra omukono gwawe.” Malaika wa MUKAMA ogu, akaba ayemeriire haihi n'orubuga oruhulirwaho orw'Orunaani Omuyebbusi.

¹⁶Daudi obu yaimukize amaiso, yarora malaika wa MUKAMA ayemeriire hagati y'iguru n'ensi, akwasire empirima agigoroliire eruguru ya Yerusaalemu. Daudi n'abakuru, nubwo bajwaire eguniya, baajuumara ha nsi.

¹⁷Daudi yagamba Ruhanga ati, “Tininyowe naragiire kubara abantu? Ninyowe nasiisire nakora kubi baitu bambi, abantu banu bakakora ki? MUKAMA Ruhanga wange, nkwesengeriize omukono gwawe guhikeho nyowe n'enju ya isenyowe; baitu otaikiriza kagingo kuhikaho abantu banu.”

¹⁸Malaika wa MUKAMA nubwo yaragiire Gaadi agambire Daudi, agende ayombekere MUKAMA itambiro haihi n'orubuga oruhulirwaho orw'Orunaani Omuyebbusi.

¹⁹Daudi nukwo kugenda, Gaadi nkooku yamugambiire omu ibara lya MUKAMA.

²⁰Omu kasumi ako, Orunaani akaba naahuura engano; obu yahindukire, yarora malaika, batabani be abbana abakaba bali hamu na uwe, baayesereka.

²¹Daudi obu yahikireho Orunaani, Orunaani yaimukya amaiso, yarora Daudi, nukwo kuruga ha rubuga oruhulirwaho, yamutamu ekitiinisa, naajuumara hansi.

²²Daudi yagambira Orunaani ati: “Ekibanja kinu eky'orubuga oruhulirwaho, kimpe nyombekereho MUKAMA itambiro, okinguze ha muhendo gwakyo ogukisemeriire abantu nukwo baihweho kagingo enu.”

²³Orunaani yagambira Daudi ati: “MUKAMA wange, ekibanja kitwale, okole kyona eki orukwenda; dara, ka nkuhe n'ente ez'ebihongwa eby'okwokya, n'emiigo enyakuhuura, nizo zibe nku, n'engano, ey'ekihongwa eky'ebyokulya. Ebi byona mbikuhaire.”

²⁴Baitu omukama Daudi yagambira Orunaani ati, “Nangwa, ninyija kukigura omuhendo oguhikire; tindukwija kutwarra MUKAMA ekintu kyawe, kandi tindukwija kuhonga ebihongwa eby'okwokya ebitantwaireho kantu.”

²⁵Daudi nukwo kusasura Orunaani siringi za zaabbu rukaaga, yagura ekibanja.

²⁶Omukiikaro eki, Daudi yayombekeraho MUKAMA itambiro, yahonga ebihongwa eby'okwokya n'eby'okusaba obusinge, yayesengereza MUKAMA, MUKAMA yamuha eki yasabire naikiriza omurro guruge omwiguru, gugwe ha itambiro eriroho ekihongwa eky'okwokya.

²⁷Hanyuma MUKAMA nubwo yaragire Malaika, yagarra empirima omu kiraaro kyayo.

²⁸Omukasumi ako, Daudi obu yaboine eki yasabire MUKAMA nkooku akimuheeriire ha rubuga rw'Orunaani Omuyebbusi oruhulirwaho yatambirayo ebyonzira.

²⁹Habwokuba, omu kasumi ako, eheema ya MUKAMA Musa ei akaba akoliire omu irungu, n'itambiro ery'ebihongwa eby'okwokya, bikaba biri Gibbyoni omukiikaro eky'okuramizaamu;

³⁰baitu Daudi akaba atarukusobora kugenda omu maiso gaayo kwekaguzaaho MUKAMA, habwokuba akaba naatiina empirima ya malaika wa MUKAMA.