Read Runyoro - rutooro 1 Byok 23 Bible Online

1 Byok 23 - Runyoro - rutooro bible

1 Byok 23

¹Daudi obu yagurusire yamara ebiro bingi muno, omutabani Solomooni nuwe yata ha ngoma aleme Isirairi.

²Yasorooza abeebembezi ba Isirairi boona, Abaleevi na banyakatagara.

³Abaleevi abahikize emyaka amakumi asatu n'okukiraho, bakabarwa, baahika emitwaro esatu omu kanaana.

⁴Yagamba ati: “Emitwaro ebiri n'enkumi ina hali abo, barolerre omulimo ogurukukorwa omunju ya MUKAMA, ha kakaaga, habeho abanyoro n'abacwi b'emisango,

⁵enkumi ina babe balinzi b'amalembo, kandi enkumi ina, ezindi bahaisanizeege MUKAMA, nibateera ebintu eby'okuhaisaniza ebi nakozire.”

⁶Yabategeka omu bitongole, naarorra ha batabani ba Leevi: Geresomu, Kohasi na Merali.

⁷Banu nubo batabani ba Geresomu: Ladani na Simeyi

⁸Batabani ba Ladani: Omukuru ni Yehyeri, hakurataho Zesamu na Yoweri, boona hamu basatu.

⁹Banu nubo batabani ba Simeyi: Selomoosi, Hazyeri, na Harani, boona hamu basatu. Abo nubo bakaba bali bakuru b'amaju ga baisenkuru Ladani.

¹⁰Kandi banu nubo batabani ba Simeyi: Yahasi, Ziina, Yeyusi na Bberiya. Abbana abo, nubo bakaba bali batabani ba Simeyi:

¹¹Yahasi nuwe akaba ali mukuru, hakurataho Ziina; baitu Yeyusi na Bberiya, batazaale baana aboojo baingi, nukwo kwetwa b'ekitabu kimu kandi b'enju emu.

¹²Banu nubo batabani ba Kohasi: Amuraamu, Izihaara, Hebburooni na Uziyeli, boona hamu bbana.

¹³Banu nubo batabani b'Amuraamu: Arooni na Musa. Arooni akasoroorwa ayezeege ebintu ebirukukirra kimu kwera, uwe na batabani be ebiro byona nukwo bacumikirrege MUKAMA obubbaani, bamuheerezeege, kandi basabirege abantu omugisa omu Ibara lye.

¹⁴Baitu batabani ba Musa omusaija wa MUKAMA, bakabalirwa omu ruganda rwa Leevi.

¹⁵Banu nubo batabani ba Musa: Geresomu n'Eliyezeere.

¹⁶Omu batabani ba Geresooni: Sebweri nuwe akaba ali mwebembezi.

¹⁷Batabani b'Eliyezeere: Rehabbiya nuwe akaba ali mukuru; Eliyezeere atazaale baana aboojo abandi, baitu Rehabbiya, uwe akazaara baingi muno.

¹⁸Banu nubo batabani ba Izihaara: Selomoosi nuwe omukuru.

¹⁹Banu nubo batabani ba Hebburooni: Yeriya nuwe omukuru, hakurataho Amariya, hataho Yahaziyeri, nukwo haija Yekameyamu.

²⁰Banu nubo batabani ba Uziyeri: Miika nuwe omukuru, akuratwa Isiya.

²¹Banu nubo batabani ba Meraali: Mahali na Muusi. Banu nubo batabani ba Mahali: Eryeza na Kiisi.

²²Eryeza akafa atazaire baana aboojo, akazaara abaisiki bonka; ab'oruganda rwabu batabani ba Kiisi, nubo baabaswire.

²³Banu nubo batabani ba Muusi: Mahali, Ederi na Yeremoosi, bona hamu basatu.

²⁴Banu nubo batabani ba Leevi, ebitabu byabo nkooku bikaba biri, abakuru b'ebitabu ebi, kandi abo boona abaahandiikirwe amabara, wena ow'akaba ahikize emyaka amakumi abiri n'okukiraho, akaba aina omulimo ogu yakoraga omunju ya MUKAMA.

²⁵Habwokuba Daudi akagamba ati “MUKAMA Ruhanga owa Isirairi, ahaire abantu be obusinge; kandi ebiro byona, naikara Yerusaalemu.

²⁶Habweki, Abaleevi tibakyayetagwa kwetweka eheema rundi ebintu ebindi ebinyakwekonyezibwa ha mulimo ogunyakukorwamu.”

²⁷Daudi nkooku yagambire ha kumalirra, Abaleevi abaahandiikirwe, nubo abo abakaba bahikize emyaka amakumi abiri n'okukiraho.

²⁸Baitu omulimo gwabu, gubege kukonyera batabani b'Arooni, ha mulimo ogw'omunju ya MUKAMA, okurolerra ezigati, ebisiika, n'okusemeza ebintu byona ebirukwera, buli mulimo gwona ogunyakukorwa omunju ya Ruhanga;

²⁹kandi n'okukonyera haby'omugaati ogw'okwolekwa ha nsaano ey'ekihongwa eky'ebyokulya, ha bicweka by'emigaati etatumbisiibwe, ha kihongwa eky'okujuumika, ha kihongwa ekitabwiremu amagita, na ha ndengo ez'ebintu ebibarwa n'ebitabarwa.

³⁰Buli nyenkya, beemerrrege basiime kandi bahaisanizeege MUKAMA, n'orwebagyo nukwo bati,

³¹kandi buli Sabbato, buli kuboneka kw'okwezi okuhyaka, na ha biro ebikuru ebyatairweho, buli kasumi ebihongwa ebihongerwa MUKAMA obu birabaga nibyokebwa, obutoosa beemerrege omu maiso ga MUKAMA.

³²Nukwo balindege bati eheema ey'okutangatanganiramu, n'ekiikaro ekirukwera kandi nukwo baheerezeege batabani b'Arooni ab'oruganda rwabu, ha mulimo ogw'Enju ya MUKAMA.