Read Runyoro - rutooro 1 Byok 26 Bible Online

1 Byok 26 - Runyoro - rutooro bible

1 Byok 26

¹Ebihanda eby'abalinzi b'irembo, bikaba biri biti: ha Bakoora, Meselamiya mutabani wa Koora, ow'abatabani b'Asafu.

²Meselamiya, akazaara abaana aboojo: Omuzigaijo, nuwe Zekaliya, omusubiro Yedyeri, owa kasatu Zebbadiya, owa kana, Yasiniyeri,

³owa kataano Eramu, owa mukaaga Yehohanani, owa musanju Elyeho-henai.

⁴Kandi Obbededomu, na uwe akazaara abaana aboojo, nubo banu: Omuzigaijo nuwe Semaaya, omusubiro Yehozabbadi, owa kasatu Yowa, owa kana Sakara, owa kataano Nesaneeri,

⁵owa mukaaga Amyeri, owa musanju Isakaara, owa munaana Peyulesayi; habwokuba Ruhanga akamuha omugisa.

⁶Mutabani we Semaaya, na uwe akazaara abaana aboojo, nubo bakaba bali balemi omu maju ga baisenkurubo habwokuba bakaba bali bantu b'amagezi mali.

⁷Banu nubo batabani ba Semaaya: Isuni, Refayeri, Ebbedi, Elizabbadi; ow'akaba aina abaanyina Elihu na Semakiya, abantu ab'amagezi.

⁸Abo boona bakaba bali batabani b'Obedadomu, hamu na batabani baabo n'abanyinabo, abantu ab'amagezi, abatendekerwe kurungi kukora omulimo ogu; ab'Obbededomu boona hamu, bakaba bali nkaaga na babiri.

⁹Meseremiya akaba aina abaana aboojo, n'abanyina, abantu ab'amagezi, abarukuhika ikumi na munaana.

¹⁰Hoosa owa batabani ba Merali, akaba aina abaana aboojo, ganu nugo amabara gaabo: Simuli, nuwe omukuru habwokuba, (noobwakubaire akaba atali muzigaijo, ise nuwe yafoire mukuru)

¹¹Hirikiya nuwe omusubiro, owa kasatu Tebbaliya kandi owa kana Zekaliya; batabani ba Hoosa n'abanyina, boona hamu bakaba nibahika ikumi na basatu.

¹²Ebihanda by'abalinzi b'irembo ebi, ebirukwinganaingana abakuru baabyo, bikaba biina emirimo nka bagenzi baabo abaheerezaaga omunju ya MUKAMA nkooku bakaba bainayo nibaheereza.

¹³Bakateera itomo, amaju ga baisenkurubo nkooku gakaba nigaingana, amatoito n'amakooto, nukwo bamanye amalembo gaabo.

¹⁴Itomo ery'okulinda Burugaizooba likakwata Seremiya. Kandi baliteera na mutabani we Zekaliya, omuhi w'amagezi nyakabara, lyamukwata kulinda omu Matemba.

¹⁵Obbededomu, lyamukwata kulinda omu Masirimuka, kandi batabani be, baaheebwa eryahurro.

¹⁶Supimu na Hoosa, baakwatwa ery'okulinda Bugwaizooba, ha irembo erya Salekesi, ha ruguudo orurukutemba. Abalinzi baikaraga nibaihangana, niharugaho onu nihaija ondi.

¹⁷Buli kiro ha rubaju rwa Burugaizooba, haabayoga mukaaga, omu Matemba bbana, omu Masirimuka bbana, kandi ha lyahurro bbana, buli rubaju babiri babiri.

¹⁸Kandi Parabba ha bukiizi bwa Bugwaizooba, ha ruguudo hakaba haroho bbana, kandi ha Parabba babiri.

¹⁹Ebi nibyo ebihanda eby'abalinzi b'amalembo. Abakoora na batabani ba Merali.

²⁰Ha Baleevi, Ahiya nuwe yakwasiibwe kurolerra amaahurro ag'Enju ya Ruhanga, n'amahurro ag'ebisembo ebihongerwe.

²¹Oteho batabani ba Ladani, batabani b'Abageresooni aba Ladani abakuru b'amaju ga baisenkurubo aba Ladani, Omugeresooni: Yehiyeri.

²²Batabani ba Yehiyeri Zesamu na Yoweri owanyina, nubo baarolerraga amaahurro ag'Enju ya MUKAMA.

²³Binu nibyo ebirukukwataho Abaamuraamu, Abaizuhaara, Abahebburooni, n'Abahuziyeri.

²⁴Sabbuweli mutabani wa Geresomu, Geresomu mutabani wa Musa, nuwe akaba ali munyoro ayarolerraga amaahurro.

²⁵Banu nubo beene baabo abarugire omuli Eliyezeere: Rehabiya mutabani w'Eliyezeere, Eliyezeere mutabani wa Yesaaya, Yesaaya mutabani wa Yoramu, Yoramu mutabani wa Zikuli, Zikuli mutabani wa Seromoosi.

²⁶Seremoosi ogu na beene baabo, nubo baalindaga amaahurro goona ag'ebisembo ebihongerwe, omukama Daudi n'abakuru ab'amaju aga baisenkurubo, abanyoro abaalemaga abantu enkumi n'ebikumi, n'engabwa z'amahe ebi bakaba bahongere.

²⁷Ha munyago ogu baanyagire ha bulemu, nuho baihire ebintu ebimu baabihonga habw'okugumya Enju ya MUKAMA.

²⁸Oteho byona Samwiri omurangi, Saulo mutabani wa Kiisi, Abbuneeri mutabani wa Neeri, na Yowabbu mutabani wa Zerwiya byona bakaba bahongere, byona byaroleerwaga Seromoosi na beene baabo.

²⁹Ha Baizuhaara, Kenaniya na batabani be, nubo baakomerwe kukorra Isirairi emirimo ey'aheeru, nk'emirimo ey'abanyoro n'abacwi b'emisango.

³⁰Ha Bahebburooni, Hasabbiya na batabani be, abantu ab'amagezi orukumi rumu n'orusanju nubo baarolererraga Isirairi emirimo yoona eyakolerwaga MUKAMA n'okuheereza Omukama, Bugwaizooba bwa Yorudaani.

³¹Ha Bahebburooni, Yeriya nuwe akaba ali mukuru wabu, obuzaale bwona obw'amaju ga baisenkurubo nkooku bukaba nibukuratana. Omumwaka ogw'amakumi ana ogw'engoma ya Daudi, nubwo baaserwiire abantu ab'amagezi mali omuli bo, bakazooka Yazeri omu rubuga Giryadi.

³²Omukama Daudi yamukoma hamu na beene baabo enkumi ibiri n'orusanju, abasaija ab'amagezi, abakuru b'amaju ga baisenkurubo, barolerrege Abarubbeni, Abagaadi, n'ekicweka ky'oruganda rwa Manaase, okukora buli kintu kyona ekirukukwata hali Ruhanga, na ha mirimo y'omukama.