Read Runyoro - rutooro 1 Byok 28 Bible Online

1 Byok 28 - Runyoro - rutooro bible

1 Byok 28

¹Abalemi ba Isirairi boona, abalemi b'enganda, abakuru b'ebihanda ebyaheerezaaga omukama, engabwa ez'alemaga abantu enkumi, ezaalemaga ebikumi, abalinzi abaalindaga ebintu by'omukama byona enkoroogi z'omukama na batabani be, hamu n'abalemi ab'ekikaali, abasaija ab'amaani n'abaserikale boona abamanyire omulimo, Daudi akabasorooleza Yerusaalemu.

²Nubwo yayemeriire yagamba ati: “Inywe bene baitu kandi abantu bange, muhunde amatu. Nkatunga ekiteekerezo kwombeka Enju ey'okuhumulizaamu Esanduuko ey'Endagaano ya MUKAMA, kandi ey'okutamu akatebe ak'ebigere ebya Ruhanga waitu, nateekaniza ebyokwombekesa.

³Baitu Ruhanga akangambira ati, ‘Torukwikirizibwa kwombekera ibara lyange Enju, habwokuba oli muserikale, kandi okaseesa esagama.’

⁴Baitu nabwo MUKAMA Ruhanga wa Isirairi, ninyowe yakomere yanyiha omunju ya isenyowe yoona mbe mukama wa Isirairi ebiro byona; habwokuba akakoma Yuda abe mwebembezi, yamukoma omunju ya Yuda eya ise nyowe, kandi omu baana ba ise nyowe, ninyowe yasiimire kufoora mukama ow'okulema Isirairi.

⁵Kandi omubaana bange boona (habwokuba MUKAMA akampa abaana baingi) mutabani wange Solomooni nuwe yakomere kwikarra ha kitebe ky'obukama bwa MUKAMA, aleme Isirairi.

⁶Akangambira ati, ‘Mutabani waawe Solomooni, nuwe alyombeka Enju yange, kandi nuwe alyombeka ebikaali byange, habwokuba nkamukoma abe mwana wange na nyowe mbe ise.

⁷Obu alyongera kukwatira kimu ebiragiro n'ebigambo byange nkooku arukukora hati, ebiro byona ndigumya obukama bwe.’

⁸Hati nu bantu bange, nimbaragira omumaiso ga Ruhanga waitu, n'ag'ekitebe kinu ekya Isirairi yoona, nimbaragira kukwatira kimu n'omutima gwona byona MUKAMA Ruhanga waitu ebi yaturagiire nukwo mwongere kwikara omunsi enu enungi, kandi mugirekere abantu ab'obusinge obuliija, ebe yabu ebiro byona.”

⁹“Iwe Solomooni mwana wange, omanyege Ruhanga owa sso, kandi omuheerezeege n'omutima gwona, n'omwoyo ogw'engonzi; habwokuba MUKAMA nuwe ayekebiija emitima yoona, kandi nuwe ayetegereza entegeka n'ebiteekerezo byona. Kakuba omuserra olimuzoora; baitu obu olimurugaho, alikumiisa hara, oku nuho oikale obusinge bwona.

¹⁰Oteho omutima habwokuba MUKAMA akakukoma kwombeka Enju niyo ebe kiikaro kye ekirukwera. Ogume kandi okole.”

¹¹Daudi nubwo yahaire Solomooni omutabani ekisisani ky'ekisasi ky'Enju ya Ruhanga, n'eky'amaju gaayo agandi, amaahurro gaayo, ebisiika byayo ebya kainaabiri n'ebya ha nsi, eky'ekisiika eky'okutamu ekitebe eky'okuganyirraho;

¹²yamuha ekisisani eky'ebintu byona ebi akaba naateekereza ha bikaali by'enju ya MUKAMA, ebisiika byona ebiherraine, amaahurro ag'Enju ya Ruhanga, n'amaahurro ag'okwahuramu ebisembo ebihongerwe;

¹³entegeka ey'ebihanda ebya banyakatagara n'Abaleevi, n'omulimo gwona ogunyakukorwa omunju ya MUKAMA; ey'ebikwato byona eby'omulimo, ogunyakukorwa omunju ya MUKAMA,

¹⁴obwingi obw'ezaabbu ey'ebikwato byona eby'ezaabbu ebya buli mulimo, obwingi obw'ebikwato eby'efeeza ebya buli mulimo,

¹⁵obwingi obw'ebikondo eby'etaara n'etaara zabyo, ezaabbu eya buli kikondo eky'etaara n'etaara zakyo, efeeza ey'ekikondo ky'etaara n'etaara zakyo, ebikondo by'etaara nkooku byayekonyezibwaga ha mulimo,

¹⁶obwingi bw'ezaabbu eya buli meeza ey'okutaho omugaati oguhongiirwe MUKAMA, n'efeeza ey'emeeza ez'efeeza,

¹⁷n'ezaabbu enungi mali ey'okukoramu ehuuma, ebbeseni, (n'ebikompe) ebbakuli ez'ezaabbu n'obwingi obwa buli kintu; n'ey'ebbakuli ez'efeeza n'obwingi obwa buli kintu;

¹⁸n'obwingi obw'ezaabbu enungi mali erukwetaagwa okukora itambiro ery'okucumiikirirraho obubbaani, yamuha n'ekisisani kye eki araarorraho kukora ebigaali eby'ezaabbu ebya bakerubbi, abanjurwire amapapa gaabo, baswekeriire Esanduuko, ey'Endagaano ya MUKAMA.

¹⁹Ebi byona, akabikora kurungi, naahondera ekihandiiko MUKAMA wenka eki yamukwasize ekyayolekaga omulimo gwona nkooku gusemeriire kukorwa.

²⁰Hanyuma Daudi yagambira Solomooni mutabani we ati, “Ogume kandi otaterebuka, okole omulimo ogu. Otatiina, kandi oteekanga; habwokuba MUKAMA Ruhanga, kandi Ruhanga wange ali na iwe. Talikuleka kandi talikurugaho, omulimo gwona ogurukwetagwa kukorwa ha Nju ya MUKAMA gutakahoire.

²¹Ebihanda bya banyakatagara n'Abaleevi ab'okukora omulimo gwona ogw'Enju ya MUKAMA mbibyo; omumulimo gwona; abanyoro nabo n'abantu boona, nibaija kukukonyera n'okukoraga kyona eki oraabaragiraga.”