Read Runyoro - rutooro 1 Byok 29 Bible Online

1 Byok 29 - Runyoro - rutooro bible

1 Byok 29

¹Daudi omukama nubwo yagambiire ekitebe kyona ati, “Mutabani wange Solomooni, Ruhanga wenka ou akomere, muto kandi taina eki amanyire, kandi omulimo mukooto; habwokuba ekikaali tikiri ky'omuntu, baitu kya MUKAMA Ruhanga.

²Nkakora kyona eki nasoboire, natunga ebintu eby'Enju ya Ruhanga wange, ezaabbu ey'okukoramu ebintu eby'ezaabbu, efeeza ey'okukoramu ebintu eby'efeeza, omulinga ogw'okukoramu ebintu eby'omulinga, ekyoma eky'okukoramu ebintu eby'ekyoma, n'emiti ey'okukoramu ebintu eby'emiti, oteho enkuyanja ey'amabaale ag'omuhendo, n'amabaale ag'okuhunda, ebyoma, amabaale ag'erangi, amabaale ag'omuhendo aga buli mulingo, n'amabaale ag'okwombekesa.

³Ekindi, okwongera hali ebintu ebi byona, ebinaleesire habw'Enju egi erukwera, ngira ezaabbu n'efeza ebyange nyabwange, habw'okugonza muno Enju ya Ruhanga wange, egi nayo ngihaireyo:

⁴etalanta enkumi isatu ez'ezaabbu eyarugire Offiri, n'etalanta kasanju e'zefeeza enungi ey'okusiiga ebisiika by'Enju,

⁵kandi ey'okukoza emirimo ey'abafundi abanyakukora eby'engaro, ezaabbu ey'ebintu eby'ezaabbu, efeeza ey'ebintu eby'efeeza. Hati n'oha ondi ow'araaha habw'okwegondeza, akeehongera MUKAMA?”

⁶Bakuru b'amaju ga baisenkurubo, nubwo baahaireyo ebihongwa byabo eby'okwegondeza, abeebembezi b'enganda, engabwa ez'abantu enkumi n'ez'ebikumi, n'abanyoro abarolerraga emirimo y'omukama oku baakozire,

⁷Habw'omulimo gw'Enju ya Ruhanga, etalanta enkumi itaano ez'ezaabbu, n'etalanta omutwaro gumu, omutwaro gumu naka sanju ez'efeeza, ezirukukira ha bisatu ez'omulinga, n'etalanta emitwaro ikumi ez'ebyoma.

⁸Wena ow'akaba aina amabaale g'omuhendo, akagata omu lyahurro ely'Enju ya MUKAMA eryaroleererwaga Yehiyeri Omugeresooni.

⁹Abantu nukwo kusemererwa muno, habwokuba abo bakaha n'engonzi, habwokuba bakaba bahongiire MUKAMA, n'omutima gwona; Daudi omukama na uwe nukwo kusemererwa muno.

¹⁰Daudi nukwo kuhaisaniza MUKAMA omu maiso g'ekitebe kyona naagamba ati: “Ohaisanizibwe ebiro n'ebiro iwe MUKAMA Ruhanga wa isiitwe Isirairi.

¹¹Ai MUKAMA, obukuru, obusobozi, okunyumizibwa, obusinguzi n'ekitiinisa, byawe; habwokuba byona ebinyakuli omwiguru n'omunsi byawe; Ai MUKAMA, obukama bwawe, niiwe anyakunyumizibwa, kandi omukuru ow'ebi byona.

¹²Obuguuda n'ekitiinisa, biruga hali iwe, kandi byona niiwe obirema. Omumukono gwawe, nuho hali obusobozi n'amaani; niwe osobora kukuza n'okuha byona amaani.

¹³Hati nu Ruhanga waitu, nitukusiima, kandi nituhaisaniza ibara lyawe ery'ekitiinisa.

¹⁴“Baitu nyowe, ninyowe oha, kandi abantu bange, nubo baha nukwo tusobole kukuha tuti, n'omutima ogw'engonzi? Ngira ebintu byona biruga hali iwe, kandi ebyawe byonyini, nibyo tukuhaire.

¹⁵Habwokuba omumaiso gawe, tuli banyamahanga, kandi tuli bagoonyi, baisenkuruitwe boona nkooku bakaba bali; omunsi ebiro byaitu, bisisana nk'ekiituuru, tibiikaraho.

¹⁶Ai MUKAMA Ruhanga waitu, enkumbutiti y'ebintu binu byona ebituleesire kukwombekera enju habw'ibara lyawe erirukwera, bikaruga omu ngaro zaawe, kandi byona byawe nyabwawe.

¹⁷Ruhanga wange, mmanyire nkooku oyekebiija emitima kandi nkooku ogonza amananu, abintu binu byona mbireesire ntahambiriziibwe nyina omutima ogw'amananu, kandi hati, mboine abantu bawe abanyakuli hanu hati, abarukukuhongera beegondiize kandi baijwire omuhimbo.

¹⁸Ai MUKAMA Ruhanga wa baisenkuruitwe Abburahamu, Isaaka na Yakobbo, encwamu n'ebiteekerezo nk'ebi, obiikaze omu mitima y'abantu bawe obusinge bwona, kandi otereekereze emitima yabu, eyemarre hali iwe.

¹⁹Ohe mutabani wange Solomooni kukwata ebiragiro byawe, ebigambo n'amateeka gawe n'omutima gwona, ahikirize ebi byona, kandi ayombeke ekikaali eki nteekaniriize ebintu binu.”

²⁰Daudi nubwo yagambiire ekitebe kyona ati “Muhaisanize MUKAMA Ruhanga wanyu.” Ekitebe kyona kyahaisaniiza MUKAMA Ruhanga wa baisenkurubo, bainama baamuramya, kandi baaramya Omukama.

²¹Baahongera MUKAMA ebyonzira, kandi ha kiro ekyakurasireho, baamuhongera ebihongwa eby'okwokya, ente enimi rukumi, empaya z'entaama rukumi, ebyana by'entaama rukumi, hamu n'ebihongwa eby'ebyokunywa, n'ebyonzira ebitabarwa ebyahongerwe habwa Isirairi yoona;

²²ha kiro eki, baalya kandi banywa omumaiso ga MUKAMA, baina omuhimbo ogutagambwa. Solomooni mutabani wa Daudi, baamugarra ha ngoma obwakabiri, baamuseesaho amagita abe mulemi omu Ibara lya MUKAMA, baagaseesaho na Zadooki abe nyakatagara.

²³Solomooni nukwo kwikarra ha kitebe ky'obukama ekya MUKAMA, yaba mukama omu kiikaro kya Daudi ise; akatunga omugisa, kandi Isirairi yoona yamuhurra.

²⁴Abeebembezi boona n'abasaija ab'amaani, n'abatabani b'omukama Daudi boona, baayebuga nkooku baraahurraga omukama Solomooni.

²⁵MUKAMA yaha Solomooni kuranganwa muno omu Isirairi yoona, kandi yamuha ekitiinisa ky'obukama kukira, hali abo abaamwebembiire.

²⁶Daudi mutabani wa Yese, nukwo yalemere Isirairi yoona ati.

²⁷Isirairi akagiremera emyaka amakumi ana; akalema emyaka musanju ali Hebburooni, kandi emyaka asatu n'esatu ali Yerusaalemu.

²⁸Hanyuma yatuuza akuzire muno, ahangaire, atungire, kandi naahebwa ekitiinisa; Solomooni mutabani we, yateera engoma omukiikaro kye.

²⁹Ebintu omukama Daudi ebi yakozire okuruga ha ky'okubanza okuhika ha ky'okumalirra, bikahandiikwa omu kitabu eky'Obusinge bwa Samwiri omurangi, n'omu ky'Obusinge bwa Nasani omurangi, n'omu ky'Obusinge bwa Gaadi omurangi,

³⁰na byona ebirukubaza ha ndema, ha maani ge, na ha byona ebyamuhikireho, ebyahikireho Isirairi, kandi ebyahikireho obukama bwona obw'ensi obumuherraine.