Read Runyoro - rutooro 2 Byok 1 Bible Online

2 Byok 1 - Runyoro - rutooro bible

2 Byok 1

¹Solomooni mutabani wa Daudi, yayegumya ha bukama bwe, MUKAMA Ruhanga we akaba ali hamu na uwe, kandi yamufoora w'akitiinisa kingi mali.

²Solomooni akabaliza Isirairi yoona, engabwa ez'amahe ezaalemaga abantu enkumi n'ezaalemaga ebikumi, abacwi b'emisango n'abeebembezi omu Isirairi yoona, abakuru omu maju ga baisenkurubo.

³Yagenda hamu n'ekitebe kyona, omu kiikaro eky'ekitiinisa ekikaba kiri Gibbyoni; habwokuba, eheema ya Ruhanga ey'okutangatanganiramu eyakozirwe Musa omuheereza wa MUKAMA, omwirungu, nuho ekaba eri.

⁴(Baitu Esanduuko ey'Endagaano ya Ruhanga, Daudi akaba agiihire Kiryasi-Yalimu, agitwaire omukiikaro eki yagiteekaniriize, habwokuba akaba agiteeriire eheema Yerusaalemu.)

⁵Kandi ekindi, itambiro ery'omulinga, Bbezaleeri mutabani wa Uli, mwijukuru wa Huuli eri akaba akozire, nuho likaba liri, omumaiso g'eheema ya MUKAMA. Omukama Solomooni n'abantu boona, ha itambiro eri, nuho baaraamizaaga MUKAMA.

⁶Solomooni yalitemba, yalihongeraho ebihongwa eby'okwokya rukumi.

⁷Ha kiro eki omubwire bw'ekiro, Ruhanga akabonekera Solomooni yamugambira ati, “Saba eki orukwenda nkikuhe”.

⁸Solomooni yagarukamu ati, “Okooleka isenyowe Daudi, engonzi ezitagambwa, kandi ezitayuga, nukwo kunfoora mukama omukiikaro kye.

⁹Ai MUKAMA Ruhanga, eki waraganiize isenyowe Daudi, hati kihikiriire, habwokuba, onfoire mukama, ndeme abantu bawe abaingi muno abatarukubarwa, nk'ecuucu y'itaka.

¹⁰Habweki, ompe amagezi n'okumanya ebi ndukwetaaga, nukwo mbaleme. Obu otampe ebi, abantu bawe abaingi banu, nsobora nta kubalema?”

¹¹Ruhanga akagarukamu Solomooni ati, “Habwokuba eki nikyo orukugonza, tosabire itungo, obuguuda, ekitiinisa, rundi obwomeezi bw'abo abarukukunoba, kandi tosabire noobwakubaire kuhangaara, baitu oyesabiire amagezi n'okumanya, nukwo oleme abantu bange abankufooliire mukama obaleme,

¹²amagezi n'okumanya mbikuhaire. Kandi, ninyija kukuha obuguuda, itungo n'ekitiinisa, ebitakatungwahoga mukama n'omu ha bakama abaakubandize, kandi ebitalitungwa n'omu, hali abo abalikukurata.”

¹³Solomooni nukwo kuruga omukiikaro eky'okuramizaamu ekya Gibbyoni, omumaiso g'eheema ey'okutangatanganiramu, yagaruka Yerusaalemu, yalema Isirairi.

¹⁴Solomooni akasorooza ebigaali n'abatembi b'embaraasi; akahikya ebigaali orukumi rumu omubikumi bbina, abatembi b'embaraasi orukumi rumu n'ebikumi bibiri, yabata Yerusaalemu omumbuga ezaikarwamuga ebigaali n'omukama.

¹⁵Omurubuga Yerusaalemu, efeeza n'ezaabbu, omukama akabifoora kintu kya butoosa nk'amabaale, kandi emikogoto, akagikanyisa nk'emisikamooli ey'omu byeya.

¹⁶Embaraasi Solomooni ezi yatungaga, zaarugaga Misiri na Kuwa abasuubuzi b'omukama nuho baiguraga.

¹⁷Kwiha ekigaali Misiri, baakiheeraga sente z'efeeza rukaaga, kandi embaraasi, sekeeri rukaaga n'ataano; n'abakama abandi boona Abahiiti n'Abasiriya, nukwo baabiguraga bati.