Read Runyoro - rutooro 2 Byok 11 Bible Online

2 Byok 11 - Runyoro - rutooro bible

2 Byok 11

¹Rehobbowamu obu yahikire Yerusaalemu, akasorooza enju ya Yuda n'eya Benyamiini, abaserikale abarwani abatongoirwe omu bandi, abarukuhika akasiiriira kamu, n'obukumi munaana, arwanise Isirairi, ayegarurre obukama.

²Baitu MUKAMA akagambira Semaaya omusaija wa Ruhanga ati:

³“Ogambire Rehobbowamu mutabani wa Solomooni omukama wa Yuda, n'Abaisirairi boona abanyakuli omunsi ya Yuda n'eya Banyamiini oti,

⁴‘MUKAMA naagamba ati, Mutaseesira kandi mutarwanisa bagenzi banyu mugarukeyo, buli omu ataahe omuka ye, habwokuba ekintu eki niinyowe nkigondeze’” Nukwo kuhurra ekigambo kya MUKAMA, baagarukayo, tibagenda kurwanisa Yerobbowamu.

⁵Rehobbowamu, nukwo kwikara Yerusaalemu, yayombeka omunsi ya Yuda embuga ez'okwerinda.

⁶Akombeka Beterehemu, Etamu, Tekoa,

⁷Besizuuli, Soko, Aduraamu,

⁸Gaasi, Maleesa, Ziifu

⁹Adoraimu, Lakisi, Azeka,

¹⁰Zoora, Aiyarooni na Hebburooni, embuga ezigumire, eziri omunsi ya Yuda n'eya Benyamiini.

¹¹Ebigo akabigumya yabitamu n'engabwa, yatamu amaahurro g'ebyokulya amagita, n'eviini.

¹²Omu mbuga zoona, yatamu engabu n'amacumu, yazifoora z'amaani mali, nukwo yalemere ati, Yuda na Benyamiini.

¹³Baanyakatagara n'Abaleevi abakaba bali omu Isirairi yoona, bakaruga omu biikaro byona ebi baikaramuga, baija kwikara na Rehobbowamu.

¹⁴Habwokuba Abaleevi bakaleka amaliisizo gaabo n'ensi yabo endi, baagenda Yuda na Yerusaalemu, habwokuba Yerobbbowamu omukama wa Isirairi n'abagwetwa be, bakaba batarukubaikiriza kukora omulimo ogw'obwanyakatagara bwa MUKAMA,

¹⁵yayeteeraho abe wenka, baheerezeege omu biikaro abakaafiiri ebi baaramizaamuga, kandi baramye emizimu n'ebisisani ebirukusisana enimi, enyana, ebi akaba akozire.

¹⁶Abo abakaba bataire emitima yabo ha kuserra MUKAMA Ruhanga owa Isirairi, bakaruga omu nganda zoona eza Isirairi baabakuraatira, baagenda Yerusaalemu batambire ebyonzira MUKAMA Ruhanga owa baisenkurubo.

¹⁷Abo nubo baagumize obukama bwa Yuda, nubo baasagikire Rehobbowamu mutabani wa Solomooni okumara emyaka esatu, habwokuba omu myaka egi esatu, akahondera eky'okurorraho ekya Daudi na Solomooni.

¹⁸Rehobbowamu akaswera omukazi ibara lye Mahalaasi, ise nuwe Yerimoosi mutabani wa Daudi, kandi nyina, nuwe Abihairi muhara w'Eliabu mutabani wa Yese;

¹⁹yamuzarra abaana aboojo Yehusi, Semaliya na Zahaamu.

²⁰Obuhahingwireho akasumi ogu, yamwongeraho omukazi ondi ibara lye Maaka muhara w'Abusalomu, ogu yamuzarra Abiya, Atai, Ziiza na Selomiisi.

²¹Rehobbowamu, akagonza muno Maaka muhara w'Abusalomu, okukira bakazi be boona n'abaranga[4] (akaswera abakazi ikumi na munaana, n'abaranga nkaaga, yazaara abaana aboojo amakumi abiri na munaana, abaisiki nkaaga;)

²²Abiya mutabani wa Maaka, nuwe yakomere abe mulemi mukuru wa bagenzi be, habwokuba akaba aina ekiteekerezo eky'okumufoora mukama.

²³Kandi akakora eky'amagezi, abamu ha batabani be, akabagabira ebicweka eby'ensi zoona eza Yuda n'eza Benyamiini, omu mbuga zoona ezigumire; yabaha ebintu bingi muno, kandi yabaswererra n'abakazi.