Read Runyoro - rutooro 2 Byok 13 Bible Online

2 Byok 13 - Runyoro - rutooro bible

2 Byok 13

¹Omu mwaka ogwa ikumi na munaana ogw'engoma ya Yerobbbowamu, Abiya nubwo yatandikire kulema Yuda

²Akalemera omu rubuga Yerusaalemu, okumara emyaka esatu. Ibara lya nyina nuwe Mikaya muhara wa Ulyeri, owa Gibbeya. Hakacweka obulemu, Abiya yarwanisa Yerobbbowamu.

³Abiya akaramaga azinisize ihe ery'abasaija emanzi abamanyire obulemu, abasaija abatongoirwe omu bandi, obusiiriira bbuna, Yerobbbowamu yamwemerra omu maiso amurwanise, aina abaserikale emanzi abatongoirwe obusiiriira munaana.

⁴Abiya nubwo yayemeriire ha rusozi Zemaraimu orunyakuli omunsi ey'ensozi ey'Efuraimu, yagamba ati: “Iwe Yerobbbowamu n'Abaisirairi inywena, mumpulirize!

⁵Timumanyire, MUKAMA Ruhanga owa Isirairi omu ndagaano ey'ekisura, nkooku yahaire Daudi n'oruzaaro rwe kulemaga Isirairi ebiro byona?

⁶Baitu Yerobbbowamu mutabani wa Nebati omuheereza wa Solomooni mutabani wa Daudi, akaimuka yayemera mukama we;

⁷omu kasumi ako, Rehobbowamu mutabani wa Solomooni obwakaba ali muto, naatiina, kandi atarukusobora kubahakaniza, hakaimuka abantu abamu, ababi abataina mugaso, baayetaba na Yerobbbowamu, baamuteeza empaka.

⁸“Hati habwokuba muli baingi muno, kandi mwina enyana ez'ezaabbu, Yerobbbowamu ezi yabakoliire, ngu nubo baaruhanga banyu nimwenda kutanga obukama bwa MUKAMA obwahairwe batabani ba Daudi.

⁹Baanyakatagara ba MUKAMA batabani b'Arooni n'Abaleevi mukababinga, mwayeteeraho banyakatagara abaanyu, nk'abantu ab'ensi ezindi oku bakora. Wena anyakwija kweyeza, aina enimi ento rundi empaya z'entaama musanju, afooka nyakatagara w'ebi ebitali ruhanga naakake.

¹⁰Baitu itwe, MUKAMA nuwe Ruhanga waitu, kandi titukamurugahoga. Twina banyakatagara abanyakumuheereza, nubo batabani b'Arooni n'Abaleevi, ogu nugwo mulimo gwabo.

¹¹Nyenkya na rwebagyo bahongera MUKAMA ebihongwa eby'okwokya, obubbaani obw'ebintu ebirukuboya, bata omugaati ogw'okwolekwa ha meeza ey'ezaabbu enungi, kandi barolerra ekikondo ky'etaara eky'ezaabbu, etaara zakyo nukwo zaakege buli rwebagyo; habwokuba itwe tukwata ekiragiro kya MUKAMA Ruhanga waitu, baitu inywe, mukamufuruka.

¹²Murole, Ruhanga ali na itwe, nuwe atwebembiire hamu na banyakatagara be, bakwasire amakondere gaabo ag'obulemu, bagateere, beete ab'okwija kubarwanisa. Inywe batabani ba Isirairi, mutarwanisa MUKAMA, Ruhanga wa Baisenkurwinywe; habwokuba timusobora kumusingura.”

¹³Yerobbbowamu akaba atumire abantu babeehingulirize, babaseesiire nibabaruga enyuma; amahe ge nukwo kuba omumaiso ga Yuda, kandi abakaba babeeserekeriire baba enyuma yabo.

¹⁴Yuda obu yanagire eriiso, yarora obulemu bubali omumaiso n'enyuma; nukwo kuterra MUKAMA omuranga; banyakatagara baateera amakondere.

¹⁵Abantu ba Yuda nubwo baatokere, obu baatokere, Ruhanga yasingura Yerobbbowamu n'Abaisirairi boona, abakaba bali omumaiso g'Abiya na Yuda.

¹⁶Yuda yabinga Abaisirairi; Ruhanga yabamuta omu ngaro.

¹⁷Abiya n'abantu be, baita Abaisirairi baingi muno; omu Isirairi hakafaamu abasaija emanzi, obusiiriira butaano.

¹⁸Omukasumi ako, abantu ba Isirairi nukwo baasingwirwe bati, abasaija ba Yuda, baabasingura habwokuba bakeesiga MUKAMA Ruhanga owa baisenkurubo.

¹⁹Abiya yahondera Yerobbbowamu yamunyagaho embuga: Beseeri n'ebyaro byarwo, Yesana n'ebyaro byarwo, Efurooni n'ebyaro byarwo.

²⁰Omu businge bw'Abiya, Rehobbowamu atasobole kwegarurra obusobozi bwe; kandi hanyuma ya byona, MUKAMA akamuteera, yafa.

²¹Baitu Abiya, akeeyongera amaani. Akaswera abakazi amakumi abiri na bbana, yazaara abaana aboojo amakumi abiri na babiri, abaisiki ikumi na mukaaga.

²²Ebintu ebindi Abiya ebi yakozire, engeso ze n'ebigambo bye, bikahandiikwa omu kitabu ky'omurangi Ido.