Read Runyoro - rutooro 2 Byok 14 Bible Online

2 Byok 14 - Runyoro - rutooro bible

2 Byok 14

¹Omukama Abiya akagwijagira, yatabaazibwa hamu na baisenkuru omu rubuga rwa Daudi, omutabani Asa, yajuumura engoma. Omu businge bwe, ensi ekagwagwana okumara emyaka ikumi.

²Asa akakora ebirungi kandi ebihikire ebirukusiimwa MUKAMA Ruhanga we.

³Akaihaho amatambiro ag'abanyamahanga, n'ebiikaro ebi baaramizaamuga, yahenda enyomyo, yatematema ekisisani ky'Asera,

⁴yaragira Yuda kukora MUKAMA Ruhanga owa baisenkurubo ebyagonza n'okukwata Ebiragiro n'Ebigambo bye.

⁵Habwokuba akahwerekereza ebiikaro by'abakafiiri eby'okuramizaamu n'amatambiro ag'okucumiikiirraho obubbaani, yabimara omu mbuga za Yuda zoona, ha bulemi bwe obukama bukatunga obusinge.

⁶Akombeka embuga ezigumire omunsi ya Yuda, habwokuba ensi ekaba eteekaine. Omu myaka egi, busaho ayamurwanisize, habwokuba MUKAMA akamuha obusinge.

⁷Akagambira Yuda ati, “Twombeke embuga zinu, tuzizitiirre ebisiika, twitemu eminaara amalembo n'ebihongozo; ensi ekyali yaitu, habwokuba tukakora MUKAMA Ruhanga waitu ekyarukugonza, tukakora ekyarukugonza, na uwe nukwo kutuha obusinge ha mbaju zoona.” Nubwo bayombeka, baatunga obusinge.

⁸Omukama Asa akaba aina ihe eryarugire omu Baayuda, ery'abantu obusiiriira busatu, abaajwaraga engabu entoito, bakwasire n'amacumu, kandi abaarugire omu Baabenyamiini, obusiiriira bubiri, n'obukumi munaana, abaarwanisaaga engabu n'obuta; abo boona bakaba bali basaija b'amaani, kandi manzi.

⁹Zeera Omunyesopiya, akabaseesira azinisize ihe ery'abantu akakaikuru kamu, n'ebigaali ebikumi bisatu, baahikira kimu Maleesa.

¹⁰Asa yagenda kumurumba, boombi baasimba enkarra bakwatangane omu kihanga ekya Zefasa, haihi na Maleesa.

¹¹Asa yaterra MUKAMA Ruhanga we omuranga naagamba ati, “Ai MUKAMA, busaho n'omu, okwihaho iwe wenka, niiwe osobora kurwanirra ataina busobozi, kurwanisa ow'obusobozi. Ai MUKAMA Ruhanga waitu, otukonyere, habwokuba tukwesiga, kandi abantu abaingi abarukwingana hanu, twizire kubarwanisa omu ibara lyawe. Ai MUKAMA, niwe Ruhanga waitu, otaikiriza omuntu n'omu kukusingura.”

¹²MUKAMA nukwo yasingwiire Abanyesopiya ati, Asa na Yuda nibarora, Abanyesopiya bairuka.

¹³Asa n'abantu aba akaba ainabo, baabairukya baabahikya Geera, Abanyesopiya baafa, okuhika boona obu baahweriireho kimu; habwokuba bakasasangurwa MUKAMA n'ihe rye. Abantu ba Yuda banyaga ebintu bingi muno.

¹⁴Baateera embuga zoona ezikaba ziherraine Geera, habwokuba abantu ab'omu mbuga ezi, MUKAMA akaba abatiinisize. Baanyaga embuga ezi zoona, habwokuba zikaba zirumu eminyago nyingi.

¹⁵Kandi baaseesira ensiisira z'abahuma abamu, banyaga entaama n'engamiya ebitabarwa. Hanyuma nubwo baagarukire Yerusaalemu.