Read Runyoro - rutooro 2 Byok 18 Bible Online

2 Byok 18 - Runyoro - rutooro bible

2 Byok 18

¹Omu biro ebi, Yehosafaati akaba atungire muno, kandi naahebwa ekitiinisa; nukwo kuswerrana n'Ahabbu omukama wa isirairi.

²Obu haahingwireho emyaka mike, yabungira Ahabbu omu rubuga Samaliya. Ahabbu akaitirana Yehosafaati, hamu n'abo aba akaba ainabo, entaama n'enimi ebitabarwa, yamutwaliriza kuramagira Ramosi-Giryadi.

³Ahabbu omukama wa Isirairi akagambira Yehosafaati ati, “Toija tukagenda hamu kuramagira Ramosi Giryadi?” Yehosafaati yagarukamu ati: “Obu oraaba oyeteekaniize, na nyowe nyeteekaniize, n'ihe ryange lyeteekaniize. Obulemu nitwija kuburwana hamu na iwe.”

⁴Yehosafaati yagambira omukama wa Isirairi ati, “Banza okaguze ohurre MUKAMA eki araagamba.”

⁵Omukama wa Isirairi nubwo yasoroize abarangi ebikumi bbina yabakaguza ati, “Tugende turwanise Ramosi-Giryadi, rundi nyowe ntagenda?” Baamugarukamu bati, “Irooko ogende; habwokuba Ruhanga naija kugiha omukama agisingule.”

⁶Baitu Yehosafaati yakaguza ati: “Hanu, busaho murangi wa MUKAMA ondi ou tusobora kwekaguzaaho?”

⁷Omukama wa Isirairi yagarukamu Yehosafaati ati, “Hakyaroho omuntu omu, ou tusobora kwekagulizaaho MUKAMA, nuwe Mikaaya mutabani wa Imula; baitu ogu tindukumwenda, habwokuba takandangahoga karungi, butoosa andangaho obubi.” Yehosafaati yagamba ati, “Agutamba, leka kugamba oti”

⁸Omukama wa Isirairi nubwo yayesire omunyoro yamugambira ati, “Rahukya bwango Mikaaya mutabani wa Imula.”

⁹Abakama abo ababiri, bajwaire ebyokujwara byabo eby'obukama, bakasinga ha bitebe byabo eby'obukama, aheeru y'irembo lya Samaliya, kandi abarangi boona, bakaba nibaranga omumaiso gaabo.

¹⁰Zedekiya mutabani wa Kenaana akekorra amahembe g'ebyoma, yagamba ati, “MUKAMA naagamba ati, Amahembe ganu, nugo oraacumisa Abasiiriya, okuhika obu orakabahwerekereza.”

¹¹Abarangi boona nukwo baaranga bati, baagamba bati, “Irooko ogende Ramosi-Giryadi osingule; MUKAMA naija kugita omu ngaro z'omukama.”

¹²Omukwenda ayagenzire kweta Mikaaya akamugambira ati, “Ebigambo by'abarangi nibikirraguza kandi birungi hali omukama; ekigambo kyawe, kisisane nk'ekyomu hali bo, kandi obaze kurungi.”

¹³Baitu Mikaaya yagamba ati: “Ndahiire MUKAMA omwomeezi, Ruhanga wange eki araagamba, nikyo ndaabaza.”

¹⁴Obu yahikireho omukama, omukama yamukaguza ati. “Mikaaya, tugende turwanise Ramosi-Giryadi, rundi nyowe ntagenda?” Mikaaya yagarukamu ati, “Iroko mugende musingule; MUKAMA naija kubaha obusinguzi.”

¹⁵Omukama yamugambira ati, “Ndaakurahiza kaingaha, nukwo oleke kumbiiha naakake, baitu ombalize amazima omu ibara lya MUKAMA!”

¹⁶Mikaaya yagamba ati, “Nkarora Isirairi yoona erarangire hansozi, nk'entaama ezitaina muliisa; kandi MUKAMA naagamba ati, ‘Abantu banu tibaina mukama; buli omu ataahe n'obusinge.’ ”

¹⁷Omukama wa Isirairi yagambira Yehosafaati ati, “Ogu tasobora kundangaho karungi, andangaho obubi?”

¹⁸Mikaaya yayongera yagamba ati: “Hati nu, ohurre ekigambo kya MUKAMA. Nkarora MUKAMA asingire ha kitebe kye eky'obukama, kandi ihe ryona ery'omu iguru, lyemeriire ha mukono gwe ogw'obulyo n'ogw'obumoso;

¹⁹MUKAMA yagamba ati, ‘N'oha ow'alisoonasoona Ahabbu omukama wa Isirairi kugenda akagwa Ramosi-Giryadi?’ Omuntu omu yagamba kinu, ondi yagamba ekindi.

²⁰Nubwo haizire omwoyo gwayemerra omumaiso ga MUKAMA, gwagamba guti, ‘Nyowe ndaamusoonasoona.’ MUKAMA yagukaguza ati, ‘oraamusoonasoonesa ki?’

²¹Gwagarukamu guti, ‘ndaagenda nyefoole mwoyo omubiihi gw'ebisuba, mbalize omu kanwa k'abarangi be boona, MUKAMA yagamba ati, niiwe orakamusoonasoona, kandi noija kusobora; genda okikole.’

²²Hati nu omanye, MUKAMA nuwe ataire omwoyo omubiihi gw'ebisuba gwabaliza omu kanwa k'abarangi banu; nuwe abalizeeho akabi akalikuhikaho.”

²³Zedekiya mutabani wa Kenaana, nubwo yairiire haihi yateera Mikaaya oruhi, yamukaguza ati, “Mwoyo wa MUKAMA, akandugamu ata, kwija kubaza na iwe?”

²⁴Mikaaya yagarukamu ati, “Lero nu, ha kiro kiri, obu olitaaha omu kisiika eky'omunda kwesereka, nubwo olyetegereza.”

²⁵Omukama wa Isirairi nubwo yagambire ati, “Kwata Mikaaya ogu, omugarurre Amoni omulemi omukuru ow'orubuga, na Yowaasi mutabani w'omukama;

²⁶obagambire oti, ‘Omukama aragiire ati, ekisaija eki mukite omu nkomo, mukihege, akagaati katoito n'otwizi, okuhika obu ndigaruka n'obusinge.’ ”

²⁷Mikaaya yagamba ati, “Iwe kugaruka n'obusinge buli MUKAMA atabaliize omuli nyowe.” Yayongera yagamba ati, “Abantu inywena muhurre eki ngambire.”

²⁸Omukama Ahabbu owa Isirairi na Yehosafaati owa Yuda baagenda kuramagira Ramosi-Giryadi.

²⁹Omukama wa Isirairi yagambira Yehosafaati ati, “ninyija kwehindura, nukwo ngende ha bulemu, baitu iwe ojwale ebyokujwara byawe eby'obukama.” Omukama wa Isirairi yayehindura; baagenda ha bulemu.

³⁰Omukama wa Siriya akaba ateereriire engabwa ez'abatembi b'ebigaali bye ati, “Mutarwansia omuntu n'omu, omuto rundi omukuru, murwanise omukama wa Isirairi wenka.”

³¹Abatembi b'ebigaali obu baaboine Yehosafaati, baagira nuwe omukama wa Isirairi. Nukwo kukubutuka bamurwanise; Yehosofaati yayamuza, MUKAMA yamukonyera, yabamujuna;

³²engabwa z'ebigaali obu zaaboine nkooku atali mukama wa Isirairi, baaleka kumwirukya, baagaruka.

³³Baitu omusirikale omu Siriya yamara garasa, omusogi gwateera omukama wa Isirairi hagati y'ebijwaro bye eby'okurwanisa n'ekya ha kifuba; nukwo kugambira omuvugi w'ekigaali ati, “Kubuutuka onyihe omu bulemu, habwokuba mputaire.”

³⁴Kiro eki, obulemu bwasarra, omukama wa Isirairi, yayetengeneka omu kigaali, yaikara aroleriire Abasiriya okuhika orwebagyo muno; izooba obu likaba niritobera, yafa.