Read Runyoro - rutooro 2 Byok 19 Bible Online

2 Byok 19 - Runyoro - rutooro bible

2 Byok 19

¹Yehosafaati omukama wa Yuda, akagaruka n'obusinge Yerusaalemu omu kikaali kye.

²Yehu mutabani wa Hanani omurangi, yagenda kumwitirana yamukaguza ati “Kikuhikiriire kukonyera ababi n'okugonza abantu abanyakunoba MUKAMA? Eki, MUKAMA nikyo yakubiihiririirwe.

³Baitu noobu araaba yakubiihiriirwe, omuli iwe harumu ebirungi, habwokuba, okafuuhya ebisisani by'omucwezi Asera wabimara omunsi, omutima gwawe waguta ha kuserra Ruhanga.”

⁴Yehosafaati akaikara Yerusaalemu; yaikaraga naarabamu abantu, okuruga Beeri-seba okuhika omunsi y'ensozi ey'Efuraimu, abagarre hali MUKAMA, Ruhanga owa baisenkurubo.

⁵Omu mbuga za Yuda zoona ezizitiriirwe, omu buli rubuga, yatamu abacwi b'emisango,

⁶yabagambira ati, “Muteekereze eki murukukora, habwokuba timurukucwa emisango habw'omuntu, baitu nimugicwa habwa MUKAMA; obu muba nimucwa emisango, aba na inywe.

⁷Habweki nu, mutiine MUKAMA; Eki murukukora, mukiteho omutima, habwokuba MUKAMA Ruhanga waitu, taburanganiza bwinganiza, tasoroora kandi talya nguzi.”

⁸Kandi ekindi, akakoma Abaleevi abamu, banyakatagara, n'abakuru b'ebitabu bya Isirairi, yabata Yerusaalemu, bacwege emisango habwa MUKAMA, kandi bamalege empaka.

⁹Yabaragira ati, “Ebi mubikole nimutiina MUKAMA, mwina obwesige, kandi n'omutima gwanyu gwona:

¹⁰Bagenzi banyu abanyakwikara omu mbuga zaabo, obu baraabaleeteraga omusango ogurukukwata ha bwisi na ha kucwa ebiragiro mubateererrege, baleke kucwa omusango hali MUKAMA nukwo aleke kubiihirirwa inywe na bo. Mukolege muti, timulicwa musango.

¹¹Amariya, nyakatagara omukuru, nuwe araabarolerraga omu bigambo bya MUKAMA; kandi Zebadiya, mutabani wa Isimairi, nuwe araabaga mulemi omukuru ow'enju ya Yuda, omu mirimo yoona ey'omukama; kandi Abaleevi babaheerezeege, nibakora emirimo ey'abanyoro. Mukole n'amaani, kandi MUKAMA ayemehoga abarungi!”