Read Runyoro - rutooro 2 Byok 2 Bible Online

2 Byok 2 - Runyoro - rutooro bible

2 Byok 2

¹Solomooni akamalirra kwombeka Enju MUKAMA ei araaramizibwamuga n'okweyombekera ekikaali ky'obukama.

²Yakoma abasaija emitwaro musanju ab'okwetweka emitumba, yakoma abandi emitwaro munaana ab'okwiha amabaale omunsi ey'ensozi, enkumi isatu n'orukaaga ab'okubarolerra.

³Akatumaho Huuramu omukama wa Taya naagamba ati: “Nkooku wakozire isenyowe Daudi wamutwekera emikogoto ey'okweyombekeseza enju ey'okuraaramu, na nyowe nukwo onkorre.

⁴Ndi haihi kwombeka enju, habw'ibara lya MUKAMA Ruhanga wange, ngimuhongere, bagimucumiikirirremuga obubbaani, ebintu ebirukuboya, ehongerwemuga ekihongwa eky'omugaati ogwa butoosa ogunyakwolekwa, ehongerwemuga ebihongwa eby'okwokya ebya nyenkya na rwebagyo, ha Sabbato, ha mboneko y'ameezi, na ha biro ebikuru ebya MUKAMA Ruhanga waitu ebyatairweho, nkooku byaragiirwe Isirairi ebiro n'ebiro.

⁵Enju ei ndukwija kwombeka, niija kuba y'ekitiinisa, habwokuba Ruhanga waitu, w'ekitiinisa kukira embandwa zoona.

⁶N'oha asobora kumwombekera enju, kandi kunu iguru noobu liraaba liraihire lita, tasobora kulihikamu? Niinyowe oha ow'aramwombekera enju? Eki ndukusobora, nukwo kumwombekera ekiikaro eky'okumucumiikirirramuga obubaani.

⁷Hati nu, ontwekere omusaija ow'amagezi ow'okukora ebintu eby'ezaabbu, eby'efeeza, eby'omulinga, eby'ekyoma, engoye ez'erangi eya kahukya, erukunanata n'eya bbururu, kandi ayatendekerwe n'eby'okusarwa, aikale n'abakozi ab'amagezi abanyina bo, omu Yuda n'omurubuga Yerusaalemu, Daudi isenyowe aba yataireho.

⁸Kandi ontwekere emiti emikogoto n'emisambya, oteho n'embaaho ez'aligumu eza Lebbanoni, habwokuba, mmanyire, abaheereza bawe nkooku bamanyire kusara embaaho eza Lebbanoni. Abaheereza bange, nibaija kukora n'abawe,

⁹nukwo banteekanirize embaaho nyingi muno muno, habwokuba enju ei ndukwija kwombeka, niija kuba nkooto, kandi erukuhuniriza.

¹⁰Abaheereza bawe abatemi kandi abasazi b'embaaho, ninyija kubaha ebigega eby'engano enyakutiirwe, obukumi bubiri, ebigega ebya sairi, emitwaro ebiri, eminaga y'eviini emitwaro ebiri, n'eyamagita emitwaro ebiri.”

¹¹Huraamu omukama wa Taaa, nukwo kugarukamu Solomooni, yamutwekera ebbaruha naagamba ati: “MUKAMA, habwokuba naagonza abantu be, nikyo yakufooliire mukama obaleme.”

¹²Yayongera yagamba ati, “MUKAMA Ruhanga owa Isirairi ayahangire iguru n'ensi, ayahaire omukama Daudi omwana omwojo ow'amagezi, ayahairwe obwegendereza n'obwetegereza, ow'alyombekera MUKAMA enju, akeeyombekera n'ekikaali ky'obukama, ahaisanizibwe.

¹³“Omuntu ow'amagezi kandi omwetegereza, ngugwo mmukutwekiire, ibara lye nuwe Huraamu

¹⁴mutabani w'omukazi ow'omu bahara ba Daani, kandi ise akaba ali nzaarwa ya Taya. Amanyire kurungi kukora ebintu eby'ezaabbu, eby'efeeza, eby'omulinga, eby'ebyoma, eby'amabaale, eby'emiti, n'engoye ez'erangi ya kahuukya, eza bbururu, n'ezirukunanata, n'okukora ebintu byona eby'okusarura, n'okuhikiriza ekisisani kyona eki bamuha, akole n'abantu bawe ab'amagezi, aba mukama wange, Daudi Sso.

¹⁵Hati mukama wange, itwe abaheereza bawe, otutwekere engano, sairi, amagita n'eviini ebi ogambire;

¹⁶nukwo tusale embaaho zoona eza Lebbanooni ezi orukwetaaga, tuzikuleetere, tuzirabye ha nyanja, tuzihikye Yoopa, tuzibohere ebiba, nukwo ozitwale Yerusaalemu.”

¹⁷Solomooni nubwo yabazire abantu boona abanyamahanga abakaba bali omunsi ya Isirairi, Daudi ise nkooku akaba ababazire; hakasangwamu akasiiriira kamu, emitwaro etaano, enkumi isatu n'orukaaga.

¹⁸Emitwaro musanju hali abo, yabaha omulimo ogw'okwetweka ebintu, obukumi munaana, yabaha ogw'okwiha amabaale omunsi ey'ensozi, kandi enkumi isatu n'orukaaga, yabaha ogw'okurolerra abantu abo, nukwo bakole.