Read Runyoro - rutooro 2 Byok 20 Bible Online

2 Byok 20 - Runyoro - rutooro bible

2 Byok 20

¹Ebi obu byahoire, Abamowabbu n'Abamooni, hamu n'Abamehuuni abamu, bakaseesira Yehosafaati.

²Abantu abamu, bakaija baagambira Yehosafaati bati, “Haizire ihe ly'abantu abarugire Edomu obuseeri bw'enyanja kukurwanisa; mbanu bahikire ira Hazazoni-tamari,” (niyo Enigedi)

³Yehosafaati nukwo kutiina muno, yayekamba kuserra MUKAMA, yarangirra abantu basiibe omunsi ya Yuda yoona.

⁴Yuda yayesorooza kusaba MUKAMA agikonyere; bakaruga omu mbuga za Yuda zoona, baija kuserra MUKAMA.

⁵Yehosafaati yayemerra omu kitebe kya Yuda na Yerusaalemu, omunju ya MUKAMA, omumaiso g'ezigati empyaka,

⁶yayesengereza naagamba ati, “Ai MUKAMA, Ruhanga owa baisenkuru itwe, tiniiwe Ruhanga ow'omwiguru? Iwe tolema abakama boona ab'amahanga? Niwe ogira obusobozi n'amaani, habweki busaho n'omu asobora kukutanga eki orukwenda.

⁷Ai Ruhanga, niiwe Ruhanga waitu. Abantu bawe Abaisirairi obu baizire omu nsi enu, okabingamu abantu abakaba bagirumu, wagiha baijukuru b'Abburahamu munywani wawe, ebe yabo ebiro n'ebiro.

⁸Bakagiikaramu kandi bakwombekera enju kukutamu ekitiinisa, nibamanya ngu:

⁹‘Obu baraagwerwaga akabi: Obulemu, kagingo rundi enjara, baraijaga beemerre omumaiso g'Enju enu ei oramizibwamu. Bakwesengerezeege omu muhito gwabo, obahurre kandi obajune.’

¹⁰Kandi hati orole, abasaija Abamooni, Abamowabbu n'aba harusozi Seiri, Abaisirairi obu bakaba nibaruga omunsi Misiri, otabaikirize kubaseesira bakabeetantara tibaabahwerekereza.

¹¹Orole, empeera barukutuha, nukwo kwija kutubinga omu bugwetwa obu watugwetiire.

¹²Ai bambi Ruhanga waitu! Obafubire, ihe erikooto eri erituseesiire, titulirisobora. Titumanyire eki turaakora, niwe tuhangire amaiso otukonyere.”

¹³Omu bwire obu, abantu ba Yuda boona, bakaba beemeriire omumaiso ga MUKAMA, bakwasire abaana baabo, bali hamu na bakazi baabo n'abaana abakuru.

¹⁴Mwoyo wa MUKAMA, yatemba Yahazeeri mutabani wa Zekaliya, mwijukuru wa Benaaya, Benaaya owa Yayeli mwijukuru wa Mataniya. Omuleevi owa batabani b'Asafu, ow'akaba ayemeriire omu kitebe hagati.

¹⁵Yagamba ati, “Abantu ba Yuda inywena, inywe abasi ba Yerusaalemu, n'omukama Yehosafaati, muhunde amatu: MUKAMA naagamba ati, mutatiina kandi mutahwa amasiko, habw'empuura y'abantu abo habwokuba, obulemu tiburukurwanwa inywe, niburwanwa Ruhanga.

¹⁶Nyenkya mugende mubaseesire; nibaija kuleetwa ha ntembatembo ya Ziizi; muraabasanga ha nsaro y'ekihanga Burugaizooba bw'irungu lya Yoru eli.

¹⁷Mutarwana, mwemerre kwonka, mutegereze; muraarora MUKAMA naabaha obusinguzi. Inywe abantu ba Yuda na Yerusaalemu, mutatiina kandi mutahwa amasiko ijo mubaramagire, kandi MUKAMA naija kuba na inywe.”

¹⁸Yehosafaati nubwo yainamire yajuumara hansi ha itaka; Yuda yoona n'abasi ba Yerusaalemu baagwa omumaiso ga MUKAMA, baamuramya.

¹⁹Abaleevi, aba Abakohasi n'aba Abakorasi, baimuka baayemerra kuhaisariza MUKAMA Ruhanga owa Isirairi nibahagukira haiguru.

²⁰Bakazinduka nyenkyakara, baataaha irungu lya Tekoa; kandi obu bakaba nibagenda, Yehosafaati akemeerra yabagambira ati, “Inywe abantu ba Yuda na inywe abasi ba Yerusaalemu, mmumpulirize, Mwesige MUKAMA Ruhanga wanyu, nubwo muraaguma; muhurre abarangi be, nubwo muraatunga omugisa.”

²¹Kandi obu yayehanwizeho abantu, yakoma abo abaraaziniraga MUKAMA n'okumuhaisaniza bajwaire ebyokujwara ebirukwera, beebembiire ihe, nibagamba bati: “Musiime MUKAMA, habwokuba engonzi ze ezitayuga, z'ebiro byona.”

²²Obu baatandikire kuzina n'okuhaisaniza MUKAMA, MUKAMA yataho ihe ery'okweserekerra n'okurwanisa Abamooni, Abamowabbu, n'aba ha rusozi Seiri, abakaba baseesiire Yuda, nukwo baasingwire bati.

²³Habwokuba Abamooni n'Abamowabbu, bakaimukiramu abasi aba ha rusozi Seiri, baabahwerekerereza kimu, obu baamazire kubamaraho, boona baatandika kwitangana.

²⁴Abayuda obu baahikire ha munaara ogw'abalinzi ogw'omwirungu, baakubuutuka kurora orucaca rw'abantu; kwija kurora emitumbi yonka niyo egarangataine ha itaka; hatabeho n'omu ayatabukire.

²⁵Yehosafaati n'abantu be obu baizire kunyaga baasanga ente enyingi muno, ebintu, ebyokujwara n'ebintu eby'omuhendo, baayetwarra byabalema n'okubalema. Bakamara ebiro bisatu nibakyatwara eminyago egi, habwokuba ekaba eri nyingi muno.

²⁶Ha kiro ekyakana, baayesorooleza omu kihanga kya Beraaka, habwokuba oku, nuho baahaisaniriize MUKAMA; habw'ebi ebi yabakoliire, ekiikaro eki nukwo kwetwa ekihanga kya Beraaka, okuhika na hati.

²⁷Abantu boona aba Yuda na Yerusaalemu, beebembiirwe Yehosafaati, nubwo baagarukire Yerusaalemu baina omuhimbo habwokuba MUKAMA nuwe yabaleetiire omuhimbo, habw'okusingura abazigu baabo.

²⁸Bakahika Yerusaalemu nibateera endongo, enanga n'amakondere, baataaha omu Nju ya MUKAMA.

²⁹Amahanga goona ag'ensi obu gaahuliire MUKAMA nkooku arwanisize abazigu ba Isirairi, obutiini bwayenda kubaita.

³⁰Obukama bwa Yehosafaati nukwo bwabaire buti bw'obusinge, habwokuba Ruhanga akamuha ekihuumuro ha mbaju zoona.

³¹Yehosofaati nukwo yalemere Yuda ati. Kutandika kulema, akaba ahikize emyaka amakumi asatu n'etaano, akalemera emyaka amakumi abiri n'etaano, ali omu rubuga Yerusaalemu. Ibara lya nyina nuwe Azuuba, muhara wa Siluhi.

³²Akakora ebirukusemeza MUKAMA nk'Asa ise ayamwebembiire.

³³Baitu ebiikaro eby'Abanyamahanga eby'okuramizaamu, bitahwerekerezibwe; abantu bakaba batakamaliire kimu emitima yabo hali Ruhanga owa baisenkurubo.

³⁴Ebindi Yehosafaati ebi yakozire, okuruga ha ky'okubanza okuhika ha ky'okumalirra, bikahandiikwa omu kitabu ky'Obusinge bwa Yehu mutabani wa Hanani, ekyahandiikirwe omu kitabu ky'abakama ba Isirairi.

³⁵Ebi obu byahoire Yehosafaati omukama wa Yuda, akeeteeraniza n'Ahaziya omukama wa Isirairi ayakoraga ebintu ebibi.

³⁶Baayombeka emeeri ez'okugenda Tarusiisi, n'ez'okwikara Eziyoni-geba.

³⁷Eryezeri mutabani wa Dodavahu owa Maleesa, nubwo yarangire hali Yehosofaati naagamba ati, “Habwokuba okeeteeraniza n'Ahaziya, ebi wakozire MUKAMA naija kubihwerekereza.” Meeri zaacweka, tizaasobora kugenda Tarusiisi.