Read Runyoro - rutooro 2 Byok 22 Bible Online

2 Byok 22 - Runyoro - rutooro bible

2 Byok 22

¹Abasi ba Yerusaalemu, Ahaziya macura ga, Yehoraamu nuwe bateire ha ngoma ye; habwokuba, ekitebe ky'abasaija abaizire n'Abaharabu baaseesire orukande, abatabani abakuru boona, bakaba bamazire kubaita.

²Ahaziya mutabani w'omukama Yehoraamu, nukwo kuteera engoma. Ha yateeriire engoma, akaba ahikize omyaka abiri n'ebiri, akalemera omwaka gumu, omu rubuga Yerusaalemu. Ibara lya nyina, nuwe Asaliya, mwijukuru w'Omuli.

³Na uwe akakora nk'enju y'Ahabbu ebi yakozire, habwokuba nyina nuwe yamuhanurraga kukora ebibi.

⁴Akakora ebirukubiihiza MUKAMA, nk'enju y'Ahabbu oku yakozire; habwokuba ise obu yamazire kufa, abo nubo baabaire bahanuuzi be, abaamuhwerekeriize.

⁵Akaikiriza ebi baamuhanuliire, nukwo kugenda hamu na Yehoraamu mutabani w'Ahabbu omukama wa Isirairi kurwanisa Hazayeri omukama wa Siriya ow'akaba ali Ramosi-Giryadi. Abasiriya baahutaaza Yehoraamu.

⁶Yagaruka Yezereeri, atambirwe ebihuta ebi baamuhutaaliize Raama, naarwanisa Hazayeri omukama wa Siriya. Ahaziya mutabani wa Yehoraamu, nukwo kugenda kumurora, habwokuba akaba ali murwaire.

⁷Baitu Ruhanga, nuwe yakitegekere kara, okufa kw'Ahaziya nkooku kulibaho, nikuraba omu kugenda kurora Yehoraamu. Habwokuba, obu yahikireyo, bakagenda hamu na Yehoraamu kwitirana Yehu mutabani wa Nimisi, MUKAMA ou kaba akomere, kuhwerekereza enju y'Ahabbu.

⁸Yehu obwakaba naacwera enju y'Ahabbu omusango, akaitirana abanyoro ba Yuda, na batabani b'abagenzi b'Ahaziya abaamuheerezaaga, yabaita.

⁹Yehu yaserra Ahaziya. Bakamukwata ayeserekere Samaliya, baamumuleetera yaitwa, Baamuziika, habwokuba bakateekereza bati, “Ogu nuwe mwijukuru wa Yehosafaati, ayakozire kyona ekiyasoboire kuheereza MUKAMA n'omutima gwe gwona.” Kandi omunju y'Ahaziya, hakaba hatarumu n'omu arukusobora kulya obukama.

¹⁰Asaliya nyina Ahaziya obu yaboine mutabani we nkooku afiire, yaragira okuhwerekereza orulyo rw'obukama rwona orw'enju ya Yuda.

¹¹Baitu Yehosobyasi muhara w'omukama, akasereka Yowaasi mutabani w'Ahaziya, yamwiha omu batabani b'omukama abakaba bali haihi kwitwa, yamuta omu kisiika eky'okuraaramu, hamu n'omulezi we. Yehosabyasi muhara w'omukama Yehoraamu, kandi muka Yehoyaada nyakatagara, ow'akaba ali munyanya Ahaziya, nukwo ati yamutabwire Asaliya tiyamwita;

¹²akasumi koona Asaliya aka yamazire naalema ensi egi, akaikara nabo okumara emyaka mukaaga.