Read Runyoro - rutooro 2 Byok 24 Bible Online

2 Byok 24 - Runyoro - rutooro bible

2 Byok 24

¹Yowaasi kuteera engoma, akaba ahikize emyaka musanju, akalemera emyaka amakumi ana, ali omu rubuga Yerusaalemu; ibara lya nyina, nuwe Zibia owa Beeri-seba.

²Omu businge bwona obwa Yehoyaada nyakatagara, akakora ebisemeza Ruhanga.

³Yehoyaada, nukwo kumuswererra abakazi babiri, yazaara abaana aboojo n'abaisiki.

⁴Obu haahingwireho akanya amazire kuteera engoma, yamalirra kusemeza Enju ya MUKAMA.

⁵Akasorooza banyakatagara n'Abaleevi yabagambira ati: “Mugende omu mbuga za Yuda, musorooze sente omu Isirairi yoona, eziraayekonyezibwaga buli mwaka, kusemeza Enju ya Ruhanga wanyu; muteho aganyu goona, ekintu eki mukikole bwango.” Baitu Abaleevi baakikeerereza.

⁶Omukama nukwo kweta Yehoyaada Nyakatagara omukuru, yamukaguza ati, “Habwaki, otarakitaireho amaani, Abaleevi bakasorooza omunsi Yuda na Yerusaalemu, omusoro ogw'okuhangiriza ehema MUKAMA ei aikaramu, Musa omuheereza wa MUKAMA oku yaragiire abantu ba Isirairi?”

⁷Habwokuba, batabani b'Asaliya omukazi omubi oli, bakaba bataahire omunju ya Ruhanga; ebintu byona eby'Enju ya MUKAMA ebikaba bihongerwe, baabyekonyeza kuramya Baali.

⁸Omukama nukwo kuragira, baakora esanduuko, baagita aheeru y'irembo ery'Enju ya MUKAMA.

⁹Kyarangirirwa omunsi ya Yuda yoona na Yerusaalemu, ngu abantu boona baleetere MUKAMA omusoro, Musa omwiru wa MUKAMA ogu yalengiire Abaisirairi boona abakaba bali omwirungu.

¹⁰Abanyoro n'abantu boona, baakyanganuka, baaleeta omusoro gwabo baaguta omu sanduuko, okuhika obu baamazire.

¹¹Abaleevi buli kuleetera abanyoro b'omukama esanduuko egi, obu baaroraga nkooku erumu sente nyingi, omuhandiiki w'omukama ow'eby'ensita, n'omunyoro owa Nyakatagara. Baagendaga bacukumura sente baziiha omu Sanduuko, nukwo bakwata esanduuko bagigarra omu kiikaro kyayo. Buli kiro baakoraga bati, basorooza sente ezitabarwa.

¹²Omukama na Yehoyaada, baiha abo abakaba bali ha mulimo ogw'okurolerra Enju ya MUKAMA, baatunga abombeki n'ababaizi, abaheesi b'ebyoma n'ab'omulinga, ab'okusemeza Enju ya MUKAMA.

¹³Abakaba bali ha mulimo, baakora n'agaabo goona, enju ya Ruhanga baagisemeza, baaginganainganiza nkooku esemeriire kuba, baagigumya.

¹⁴Obu baamazire, sente ezaasigaireho, baazireetera omukama na Yehoyaada; ezi nizo zaayekonyeziibwe, kukora ebintu eby'Enju ya MUKAMA, eby'okuheereza, n'eby'ebihongwa eby'okwokya, Esahaani ez'Okukwatiraho obubbaani, n'ebikwato ebindi eby'ezaabbu n'efeeza. Obusinge bwa Yehoyaada bwona, butoosa ebihongwa eby'okwokya, baabihongeraga omunju ya MUKAMA.

¹⁵Baitu Yehoyaada obu yagurusire, ebiro bye byahika, yafa; Kufa, akaba ahikize emyaka kikumi n'asatu,

¹⁶Baamuziika omu rubuga rwa Daudi, omu bakama hagati, habwokuba akakora ebirungi omu Isirairi, yabikorra Ruhanga n'Enju ye.

¹⁷Yehoyaada obu yamazire kufa, abanyoro aba Yuda, bakaija baaramya omukama; na uwe nukwo kubahurra.

¹⁸Baalekera aho kuramya omunju ya MUKAMA Ruhanga owa baisenkurubo, baatandika kuramya abacwezi, n'ebisisani by'omucwezi Asera. Omusango gwabo habw'ebibi ebi nugwo gwaleeteriize MUKAMA kubiihirirwa Yuda na Yerusaalemu.

¹⁹Noobu araaba yakozire eki, akabatumira abarangi babamugarurre, baitu abarangi obu baabagambiire ebigambo byabo, bataikirize.

²⁰Mwoyo wa Ruhanga, nubwo yatembere Zekaria mutabani wa Yehoyaada nyakatagara; Yayemerra ahatungamire abantu nambere basobora kumurorra yabagambira ati, “Ruhanga naabakaguza ati, Kiki ekirukubacwisa Ebiragiro bya MUKAMA, mukalemwa kutunga omugisa? Nkooku mwarugireho MUKAMA, na uwe hati abarugireho.”

²¹Nubwo baayekobere kumukora akabi, kandi habw'okuragirwa omukama, baamuteeza amabaale, omuzigati y'Enju ya MUKAMA.

²²Omukama Yowaasi, nukwo yayeberwe ati, embabazi Yehoyaada ise Zekaliya ezi yamugiriire, yaita omutabani. Obwakaba atakacwekaine, yagamba ati, “MUKAMA nuwe arole, kandi ahoole enzigu!”

²³Obu haahingwireho omwaka gumu, ihe ly'Abasiriya likaaseesira Yowaasi. Baahika Yuda na Yerusaalemu, baiha omu bantu abanyoro b'abantu boona, baabahwerekereza, omunyago gwabo gwona, baagutwekera omukama wa Damasiko.

²⁴Ihe ry'Abasiriya noobwakubaire likaba lirumu abantu bake, MUKAMA akaliha kusingura ihe erikooto, habwokuba abantu bakarugaho MUKAMA Ruhanga owa baisenkurubo. Nukwo baaleetire Yowaasi bati ekifubiro.

²⁵Obu baamazire kumurugaho, baasiga ahutaire muno, habw'esagama ya mutabani wa Yehoyaada nyakatagara, abaheereza be baayekoba kumukora akabi nukwo kumwitira ha kitabu kye. Nukwo yafiire ati; baamuziika omu rubuga rwa Daudi, baitu batamuziike omu magasani g'abakama.

²⁶Banu nubo abaamuliiraine: Zebadi mutabani wa Omwamonikati, na Yehozabadi mutabani wa Simulisi, Omwamowabbukati.

²⁷Ebyafaayo by'abatabani ba Yowaasi, n'ebindi ebyamugambirweho, n'ebyokwombeka buhyaka Enju ya Ruhanga, bikahandiikwa omu makuru ag'ekitabu ky'Abakama. Omutabani Amaziya yalema omu kiikaro kye.