Read Runyoro - rutooro 2 Byok 25 Bible Online

2 Byok 25 - Runyoro - rutooro bible

2 Byok 25

¹Amaziya kuteera engoma, akaba ahikize emyaka amakumi abiri n'etaano, akalemera emyaka amakumi abiri na mwenda, ali omu rubuga Yerusaalemu. Ibara lya nyina, nuwe Yehoadaani owa Yerusaalemu.

²Akakora ebirukusemeza MUKAMA, baitu aina omutima ogutabuzirwemu kamogo.

³Akarumisa kuguma ha ngoma ye, yaita abaheereza be, abakaba baisire omukama ise.

⁴Baitu abaana baabo atabaite, ekyahandiikirwe omu Biragiro omu kitabu kya Musa nkooku kirukugamba, MUKAMA nambere yaragiriire ati: “Baisebaana bataliitwa habw'emisango ey'abaana baabo, abaana nabo bataliitwa habw'emisango eya baisebo, buli muntu aitirwege omusango ogu ayecweriire wenka.”

⁵Hanyuma, Amaziya yasorooza abantu ba Yuda, yabateekaniza amaju ga baisenkurubo nkooku gali, nibalemwa engabwa ez'abantu enkumi, n'ez'ebikumi, babe ba Yuda yoona na Benyamiini. Akasorooza abo abahikize emyaka amakumi abiri n'okweyongerayo, akaija kurora, bahikire obusiiriira busatu, abasoroirwe omu bandi, abahikire kurwana obulemu, abarukusobora kurwanisa amacumu n'engabu.

⁶Kandi yapangisa omu Isirairi, abaserikale ab'amaani, emanzi, akasiiriira kamu, yasasura kiloguraamu ez'efeeza enkumi isatu n'ebbina.

⁷Baitu omuntu wa Ruhanga akamuhikaho yamugambira ati, “Mwebingwa otaikiriza kugenda n'ihe erya Isirairi, habwokuba MUKAMA tali hamu na Isirairi, tali hamu n'Ab'Efuraimu abo boona.

⁸Baitu obu oraaba nooteekereza ngu, eki nikyo kiraakufoora w'amaani osingule obulemu, Ruhanga naija kukukenya hansi, omumaiso g'abanyanzigwa; habwokuba Ruhanga, nuwe agaba kusingura, rundi kusingurwa.”

⁹Amaziya yakaguza omuntu wa Ruhanga ati, “Oburooro bwa sente ezi mpaire ihe rya Isirairi, ife ki?” Omuntu wa Ruhanga yagarukamu ati, “MUKAMA naasobora kukuha, ezirukukira muno ezi.”

¹⁰Amaziya, nukwo kuraga ihe eryarugire hali Efuraimu, ligaruke litaahe. Baabiihirirwa muno Yuda, baagaruka omuka, ekiniga kiraaliire kubaita.

¹¹Baitu Amaziya yaguma, yaramaga hamu n'abantu be, yagenda ha kihanga eky'ekisura, yaita abantu ba Seiri, akakumi kamu.

¹²Abantu aba Yuda, baahamba kakumi akandi, bali boomeezi, baabatembya ha mwandara eruguru baabasindika hansi; boona baaberenguka.

¹³Baitu ihe liri, Amaziya eri yagarwiire enyuma tiyaliikiriza kuramaga na uwe, lyaseesira embuga za Yuda, okuruga Samaria okugarukira Besi-horoni, lyaita abantu obukumi busatu aba lyasangiremu, lyanyaga omunyago mwingi.

¹⁴Amaziya obu yarugire kwita Ab'Edomu, abantu ba Seiri, akabaihaho baaruhanga baabo, yabeeforra baaruhanga be, yabaramya yabahongera ebihongwa eby'okwokya.

¹⁵MUKAMA nukwo kumubiihiirirwa yamutumira omurangi, yamukaguza ati, “Kiki ekyakwebingisize baaruhanga ab'abantu abatarasoboire kujuna abantu baabo bonyini, bakabakwihaho?”

¹⁶Obwakaba naakyabaza, Amaziya yamucwamu naagamba ati, “Niwe twakomere obege muhi w'amagezi w'omukama? Culeera! Obu otaaculeere, ninkwita!” Omurangi nukwo kuculeera baitu yagamba ati, “Hati, namanya Ruhanga nkooku amaliriire kukuhwerekereza, nikyo okoliire kinu, kandi wayanga kwikiriza amagezi nkuhaire.”

¹⁷Amaziya omukama wa Yuda, nubwo yayehanwize, yatumaho Yowaasi mutabani wa Yehoyahazi mutabani wa Yehu, omukama wa Isirairi naagamba ati, “Oije, turorangane, amaiso n'amaiso.”

¹⁸Yowaasi omukama wa Isirairi, yagarukamu Amaziya omukama wa Yuda, naagamba ati, “Omutojo ogwa Lebbanoni, gukatumaho omukogoto nagwo gwa Lebbanoni, nigugamba guti, ‘Ohe mutabani wange omuhara wawe amuswere’; hakarabaho enyamaiswa ey'omwirungu eya Lebbanoni, yarubaatirra omutojo ogu.

¹⁹Noogamba oti, ‘Orole nkooku ntiire Edomu,’ nooyenyumiza. Baitu hati, oikale omuka. Habwaki nooyeyetera akabi akaraakuhwerekereza, kandi akaraahwerekereza Yuda?”

²⁰Baitu Amaziya atahurre; habwokuba eki, kikakorwa Ruhanga, akakigenderra kubanagira abanyanzigwa baabo habwokuba bakeebinga baaruhanga ab'Edomu.

²¹Yowaasi omukama wa Isirairi nukwo kugenda; bakwatangana n'Amaziya omukama wa Yuda, omu rubuga Besi-semesi orwa Yuda.

²²Isirairi yasingura Yuda, buli muntu yairuka naagaruka omuka ye.

²³Yowaasi omukama wa Isirairi, yahamba Amaziya omukama wa Yuda, mutabani wa Yowaasi, mwijukuru w'Ahaziya, yamuhambira Besi-semesi, yamutwara Yerusaalemu, yaseesa ekisiika ky'orubuga, okuruga ha irembo ery'Efuraimu okugarukira ha irembo erya ha keekubo, omwanya ogwa mita nk'ebikumi bibiri.

²⁴Yanyaga ezaabbu n'efeeza yoona, n'ebikwato byona ebyasangirwe omunju ya Ruhanga, yataho n'Obededomu; atamarre aho, yanyaga n'ebintu eby'omu kaaruziika y'omukama, n'abantu abakaba bakwasirwe babe musimbo, yagaruka Samaliya.

²⁵Yowaasi mutabani wa Yehoyahazi omukama wa Isirairi obu yamazire kufa, Amaziya mutabani wa Yowaasi omukama wa Yuda, akoomeera emyaka ikumi n'etaano.

²⁶Ebintu ebindi Amaziya ebi yakozire, okuruga ha ky'okubanza okuhika ha ky'okumalirra, byona bikahandiikwa omu Kitabu eky'Abakama aba Yuda n'aba Isirairi.

²⁷Okuruga obu yayecwireho MUKAMA, abantu aba Yerusaalemu, baamuliirana, nukwo kwirukira Lakisi. Lakisi baamukurasaayo abantu, nuho baamunagire.

²⁸Bakamuleetera ha mbaraasi; yatabaazibwa[5] omu rubuga rwa Daudi, hamu na baisenkuru.