Read Runyoro - rutooro 2 Byok 26 Bible Online

2 Byok 26 - Runyoro - rutooro bible

2 Byok 26

¹Abantu ba Yuda boona, bakakwata Uziya ow'emyaka ikumi na mukaaga, nuwe baata ha ngoma y'Amaziya, ise.

²Omukama Amaziya obu yamazire kufa, Uziya nuwe yayombekere buhyaka orubuga Elosi, yarugarurra Yuda.

³Uziya kuteera engoma, akaba ahikize emyaka ikumi na mukaaga, akalemera emyaka amakumi ataano n'ebiri omu rubuga Yerusaalemu. Ibara lya nyina nuwe Yekoliya, owa Yerusaalemu.

⁴Akakora ebirukusemeza MUKAMA, byona Amaziya ise, ebi yakozire.

⁵Omu businge bwa Zekaliya ayamwegeseze kutiina Ruhanga, akaheereza Ruhanga; n'obwesige, akasumi koona aka yaherererizeemu MUKAMA, MUKAMA Ruhanga akamuha omugisa.

⁶Akaramaga yarwanisa Abafirisiti, yaseesa ebisiika by'embuga: Gaasi, Yabune n'Asidodi; yayombeka embuga omunsi y'Asidodi na handi, hagati y'Abafirisiti.

⁷Ruhanga akamukonyera kurwanisa Abafirisiti, n'Abaharabu abaikaraga Gurubaali, n'Abamehuuni.

⁸Abamooni baaha Uziya omusoro, kandi yaranganwa okuhikira kimu ha mutaano gwa Misiri, habwokuba akaba ali w'amaani muno.

⁹Kandi ekindi, omu rubuga Yerusaalemu, ha Irembo erya ha Keekubo n'erya ha Kihanga, na ha Bukiizi, akombekayo eminaara yagizitirra n'amabaale.

¹⁰Kandi akombeka eminaara omwirungu, yalima amaziba maingi, habwokuba, akaba aina amahyo maingi omu bihanga n'omu byeya; kandi akaba aina abalimi n'abanogorozi b'emizabbibbu, omu nsozi n'omunsi ez'orwezo, habwokuba yagonzaaga ebyobulimi.

¹¹Ekindi, Uziya akaba aina ihe ery'abaserikale abarukusobora kurwana obulemu, babaganiziibwemu ekihanda, okurorra ha muhendo Yeyeri omuhandiiki, na Maaseya omunyoro ogu baabazire, nibeebemberwa Hananiya, omu ha ngabwa z'omukama.

¹²Omuhendo gwona ogw'abakuru b'amaju aga baisenkurubo, ogw'abasaija ab'amaani emanzi, bakaba bali enkumi ibiri omu rukaaga.

¹³Bakaba nibalema ihe ery'abantu obusiiriira busatu mu kasanju n'ebitaano, abakaba nibasobora kurwana obucwekaihembe bakonyere omukama wabo kurwanisa abanyanzigwa be.

¹⁴Uziya, ihe lyona akaliha: yabaha engabu, amacumu, enkufiira, ebizibaho eby'ebyoma, obuta, n'amabaale ag'okuhunguza emyesuuso.

¹⁵Omu rubuga Yerusaalemu, yakoramu ebyoma ebyazoirwe abantu abanyamagezi, bibege omu minaara na ha bwekubo, birasege emisogi, kandi bihungulege amabaale amakooto. Yaranganwa muno habwokuba, akakoonyerwa muno Ruhanga okuhika obu yabaire w'amaani.

¹⁶Baitu obu yamazire kufooka w'amaani yataahwamu emyekuliirizo eki nikyo kyamurugiiremu okuhwerekerra. Habwokuba akagaya MUKAMA, Ruhanga we yataaha omunju ya MUKAMA yacumikira obubbaani ha itambiro.

¹⁷Baitu Azaliya nyakatagara, akamukuraatira, ali hamu na banyakatagara ba MUKAMA kinaana, abasaija emanzi;

¹⁸baamutanga nibamugambira bati, “Uziya, kucumiikirirra MUKAMA obubbaani, tiguli mulimo gwawe, mulimo gwabanyakatagara; batabani b'Arooni, nubo baayereziibwe kukora omulimo ogu. Ruga omu kiikaro ekirukwera; habwokuba okozire kubi, kandi eki, MUKAMA Ruhanga tarukwija kukikuheera kitiinisa.”

¹⁹Uziya nukwo kubiihirwa. Omu kasumi ako, akaba akwasire ekiswa eky'okucumiikiriirramu obubbaani, obu yabiihiirirwe banyakatagara, ha buso bwe, hatyeerukaho ebigenge, abanyakatagara nibarora bati, bali omunju ya MUKAMA, haihi n'itambiro ericumiikiriirwaho obubbaani.

²⁰Azaliya nyakatagara omukuru, na banyakatagara abandi boona, baamusimba eriiso, kumwetegereza, ebigenge bimutyerukire ha buso! Baamuturukya aheeru bwango, na uwe wenka yarahuka bwango aturuke, habwokuba MUKAMA nuwe akaba amutiire.

²¹Omukama Uziya akaikara ali mugenge okuhiha okufa kwe, habwokuba mugenge, yaraaraga omunju eyesunguswiire habwokuba, akaba naatangwa kutaaha omunju ya MUKAMA. Mutabani we Yosamu, yarolerra kaaruziika y'omukama, yalema n'abantu ab'ensi egi.

²²Ebintu ebindi Uziya ebi yakozire, okurugirra ha ky'okubanza okugarukira ha ky'okumalirra, Isaaya omurangi mutabani w'Amozi, nuwe yabihandiikire.

²³Uziya akatuuza yatabaazibwa hamu na baisenkuru omu itaka eryatabaazibwamuga abakama, baitu habwokuba mugenge, atatabaazibwe omu magasani g'abakama. Mutabani we Yosamu, yalema omu kiikaro kye.