Read Runyoro - rutooro 2 Byok 28 Bible Online

2 Byok 28 - Runyoro - rutooro bible

2 Byok 28

¹Ahazi kuteera engoma, akaba ahikize emyaka makumi abiri, akalemera emyaka ikumi na mukaaga, ali omu rubuga Yerusaalemu. Atakole ebisemeza MUKAMA nka Daudi ise,

²baitu akakora abakama ba Isirairi ebi baakozire. Akakora n'ebisisani bya Baali eby'okuramibwa,

³yacumikirraga obubaani omu kihanga kya mutabani wa Hinomu, yayokyaga abaana be, babe kihongwa naakuraatira ebintu ebibi, amahanga MUKAMA aga yabingire omunsi, abantu ba Isirairi batakaizire, ebi gaakoraga.

⁴Yatambaga kandi yacumikirraga obubbaani omu biikaro eby'abanyamahanga eby'okuramizaamu, hansozi, na hansi y'omuti gwona ogujumbire.

⁵MUKAMA Ruhanga we, nukwo kumulekera omukama wa Asiriya, yamusingura, yahamba abantu be baingi muno, yabatwara Damasiko. Kandi akamulekera n'omukama wa Isirairi yamusingura, kandi yaita abantu baingi muno.

⁶Habwokuba Peka mutabani wa Remaliya, omu kiro kimu omunsi ya Yuda, akaita akasiiriira kamu n'obukumi bubiri, abo boona abasaija emanzi, habwokuba bakaba banagire MUKAMA Ruhanga ow'abaisenkurubo.

⁷Zikuli omusaija ow'amaani ow'Efuraimu, akaita Maaseeya mutabani w'omukama, Azulikaamu engabwa y'ekikaali n'Erikaana katiikiro k'omukama.

⁸Abaisirairi bakahamba bagenzi baabo, obusiiriira bubiri, abakazi, abaana aboojo n'abaisiki; kandi baabanyagaho omunyago mwingi, baagutwara Samaliya.

⁹Baitu hakaba haroho omurangi wa MUKAMA, ibara lye Odedi; akagenda kwitirana ihe eryagenzire Samaliya, yaligambira ati: “MUKAMA Ruhanga owa Baisenkurwinywe, akabiihirirwa Yuda, nukwo kubabalekera, baitu mubaisize ekiniga ekihinguraine.

¹⁰Hati, abantu ba Yuda na Yerusaalemu, abasaija n'abakazi, nimwenda kubasingura, babe bairu banyu. Timumanyire, na inywe nkooku mwasobiize MUKAMA Ruhanga wanyu?

¹¹Hati nu, mutege amatu, abanyagwa aba mwanyagire omu beene banyu, mubagarreyo, habwokuba, MUKAMA Ruhanga ababiihiriirwe muno.”

¹²N'abanyoro abamu ab'omu bantu b'Efuraimu, Azaliya mutabani wa Yohanani, Berekiya mutabani wa Mesilemoosi, Yehizikiya mutabani wa Salumu, n'Amasa mutabani wa Hadulai, baateeza empaka abo abakaba nibaruga ha bulemu,

¹³baabagambira bati, “Mutaleeta hanu abakwatwa, habwokuba nimwenda kutuleetera omusango hali MUKAMA, gwongerwe ha bibi byaitu na ha musango ebi twina hati. Habwokuba omusango gwaitu, mukooto muno guhinguraine, kandi MUKAMA abiihiriirwe muno Isirairi.”

¹⁴Abasaija abakaba bajwaire ebyokurwanisa, nukwo kuleka abakwatwa n'omunyago omumaiso g'abanyoro n'ag'ekitebe kyona.

¹⁵Abasaija abaagambirwe amabara, baimuka baakwata abanyagwa, boona abakaba bataina byokujwara omuli bo, baabajweka ebintu ebi banyagire, baabaha enkaito, baabaha ebyokulya n'ebyokunywa, baabasiiga amagita; boona abakaba bali baceke baabahimbira ha nkaina, baabatwarra beene baabo abakaba bali Yeriko, orubuga orw'emiti emikindo. Hanyuma, baagaruka Samaliya.

¹⁶Omu kasumi ako, omukama Ahazi, akatumaho omukama wa Asiriya naamusaba obukonyezi.

¹⁷Habwokuba, Ab'Edomu bakaba baseesire Yuda obwakabiri, bagisingwiire, kandi banyagire abantu.

¹⁸Kandi Abafirisiti, bakaba baseesiire embuga ez'omu kyeya n'eza Negebbu, bahambire Betisemesi, Aiyarooni, Gederosi, Sooko, n'ebyaro byayo, Timuna n'ebyaro byayo, Gimuzo n'ebyaro byayo; bazeinganizeemu.

¹⁹Habwokuba MUKAMA, habw'Ahazi omukama wa Isirairi, akabundaaza Yuda, omukama ogu, akaba akozire ebitasemeriire omunsi ya Yuda, kandi akaba ataina bwesige hali MUKAMA.

²⁰Tigulaasi-Pereseeri omukama w'Asiriya, nukwo kumuseesira, omu kiikaro ky'okumukonyera, yamubonesa.

²¹Ahazi nukwo kukwata ha kicweka ky'ebintu ebikaba biri omunju ya MUKAMA, omu kaaruziika y'omukama n'omunju y'ababiito abihe omukama w'Asiriya, baitu nabwo atamukonyere.

²²Omukama omu ogu Ahazi omu kubonabona kwe, akeeyongera kukiraho, kubura obwesige hali MUKAMA.

²³Akatambira ebyonzira baaruhanga ba Damasiko ey'ekaba emusingwire. Akateekereza ati, “Baaruhanga Abasiriya bakakonyera abakama ba Asiriya, kakuba mbatambira ebyonzira, nanyowe barankonyera.” Baitu bakamuhwerekereza, kandi baahwerekereza Isirairi yoona.

²⁴Yasorooza ebikwato byona eby'omunju ya Ruhanga yabitematema. Enju yagikinga, yayekorra amatambiro ha mbaju zoona, eza Yerusaalemu.

²⁵Akombeka omu mbuga za Yuda ebiikaro eby'Abanyamahanga eby'okuramizaamu, nambere haraacumikirirwaga baaruhanga abandi obubbaani, nukwo yayeretiire ati ekiniga kya MUKAMA Ruhanga owa baisenkuru.

²⁶Ebintu ebindi ebi yakozire, okuruga ha ky'okubanza, okugarukira ha ky'okumalirra, bikahandiikwa omu Kitabu ky'Abakama ba Yuda n'aba Isirairi.

²⁷Ahazi akatuuza yatabaazibwa hamu na baisenkuru, baamutabaaza omu rubuga Yerusaalemu, habwokuba batamutwale omu magasani ag'abakama ba Isirairi. Hezekiya omutabani yajuumura engoma.