Read Runyoro - rutooro 2 Byok 3 Bible Online

2 Byok 3 - Runyoro - rutooro bible

2 Byok 3

¹Solomooni nukwo kutandika kwombeka Enju ya MUKAMA, Yerusaalemu. Ha rusozi Moliya, MUKAMA nambere yabonekeriire Daudi ise, omu kiikaro Daudi eki akaba akomere, ha rubuga orwaahulirwahoga orw'Orunaani Omuyebusi.

²Omukwezi okwa kabiri okw'omwaka ogwa kana ogw'engoma ye, nubwo yatandikire kwombeka,

³Enju Solomooni ei yayombekiire Ruhanga, akagirenga ati: Oburaiha obw'orulengo orw'okubanza obw'orulengo orukuru zikaba ziri mita nkaaga, kandi obugazi mita makumi abiri.

⁴Ekisasi ky'omulyango ekikaba kiri omumaiso g'ekicweka ekya hagati eky'enju, oburaiha zikaba ziri mita makumi abiri, nikingana n'obugazi; kandi obwemi bwakyo, mita kikumi mu abiri. Omunda akagisiiga ezaabbu enungi.

⁵Ekicweka ekya hagati, akakyaliira n'emisambya, yakisiiga ezaabbu, yakisaruraho emikindo n'emikuufu.

⁶Yagikunisa n'amabaale ag'omuhendo. Ezaabbu egi, niyo eyarugaga Paruvaimu.

⁷Enju, nukwo kugisiiga ezaabbu, emirabba yayo, ebiti by'emiryango, ebisiika n'enyigi; ha bisiika, yasaruraho ebisisani bya bakerubbi.

⁸Hanyuma, yayombeka ekiikaro ekirukwerra kimu kukira byona; oburaiha bwakyo nibwingana obugazi bw'enju mita mwenda n'obugazi mwenda, yakisiiga ezaabbu enungi erukuhika tani rukaaga.

⁹Emisumaali ekakorwa ezaabbu erukuhika guraamu bitaano n'ensanju, ebisiika eby'omu kainaabiri, nabyo akabisiiga ezaabbu.

¹⁰Akakora bakerubbi babiri, ab'ebiti, yabasiiga ezaabbu, yabata omukiikaro eki ekirukukirra kimu byona kwera.

¹¹Amapapa ga bakerubbi boombi, gakaba nigahika mita mwenda;[1] ipapa erimu ery'omukerubbi omu, erirukuhika mita ibiri n'akacweka lyakwata ha kisiika ky'enju, ipapa erindi, na lyo erya mita ibiri n'akacweka likahika ha ipapa erya kerubbi ondi.,

¹²Kandi ipapa erimu ery'omukerubbi ogu, erirukuhika mita ibiri n'ekicweka lyahika ha kisiika ky'enju, ipapa erindi nalyo erya mita ibiri n'ekicweka lyateerana n'ipapa ery'omukerubbi ow'okubanza.

¹³Obugazi bw'amapapa g'Abakerubbi abo, gakahikya mita mwenda; bakaba beemeriire baroleriire omwanya ogwa hagati.

¹⁴Yakora orukingyo orw'engoye ey'erangi ya bbururu, eya kahuukya, erukananata, n'eya kitaani enungi, yaruteeraho ebisisani by'abakerubbi.

¹⁵Omumaiso g'enju, yayombekayo enyomyo ibiri, ez'oburaiha bwa mita ikumi na itaano n'ekicweka, buli emu yagitaho omutwe, oburaiha bwa buli emu, mita ibiri n'ekicweka.

¹⁶Yakora emikuufu erukusisana ekikondere yagita ha nyomyo eruguru, kandi ha mikuufu egi, yainaraho amakomahanga kikumi.

¹⁷Enyomyo ezi, yazibyara omumaiso g'enju, emu ha bukiizi ogw'obulyo, endi ha bukiizi obw'emoso; eya ha bukiizi obw'obulyo yagiruka ibara Yakiini, kandi eya ha bukiizi obw'emoso, yagyeta Boazi.