Read Runyoro - rutooro 2 Byok 30 Bible Online

2 Byok 30 - Runyoro - rutooro bible

2 Byok 30

¹Omukama Hezekiya, akatumaho Isirairi na Yuda yoona, kandi yahandiikira Efuraimu na Manaase ebbaruha, naabaragira kugenda Yerusaalemu omunju ya MUKAMA, kusemeza ekiro eky'Okwijuka Okuhingurwaho, kutamu MUKAMA Ruhanga owa Isirairi ekitiinisa.

²Habwokuba omukama n'abanyoro be, n'ekitebe ky'abantu boona aba Yerusaalemu, bakaba bahanwiire kukisemeza omu kwezi kwa kabiri

³bakaba batarukusobora kukisemeza omu kasumi kakyo, habwokuba banyakatagara abarukumara bakaba batakeeyereze, kandi n'abantu bakaba batakasorrokaniire Yerusaalemu.

⁴Entegeka egi, omukama n'ekitebe kyona, baagisiima.

⁵Nubwo baaturukize ekiragiro okurangirra Isirairi yoona, okurugirra Beeri-seba, okugarukira Daani ngu, abantu bagende Yerusaalemu, basemeze ekiro eky'okwijuka Okuhingurwaho, kutamu ekitiinisa MUKAMA Ruhanga owa Isirairi; habwokuba, bakaba batakakisemezaaga bali baingi muno, nkooku kyaragiirwe.

⁶Abakwenda nukwo kurabamu Isirairi na Yuda yoona, baina ebbaruha ezirugire hali omukama n'abanyoro be, omukama nkooku akaba aragiire, nibagamba bati, “Inywe abantu ba Isirairi, mugaruke hali MUKAMA Ruhanga ow'Abburahamu, Isaka, kandi owa Isirairi, na uwe nukwo agaruke hali inywe endagalikwa abaatabukire abakama b'Asiriya.

⁷Mutaba nka Baisenkurwinywe na bagenzi banyu abaarugireho MUKAMA Ruhanga owa baisenkurubo, ekyarugiremu, nkooku murukwerorra, na uwe nukwo kubahwerekereza.

⁸Mutaba ngumangani nka Baisenkurwinywe nkoku bakaba bali, baitu mworobere MUKAMA, mwije omu kiikaro kye ekirukwera, eki yayereze, kiikale nikyera ebiro n'ebiro, kandi muheereze, MUKAMA Ruhanga wanyu nukwo aleke kubabiihirirwa.

⁹Habwokuba obu muragaruka hali MUKAMA, abaanyagire bakazi banyu n'abaana banyu, balibagirra embabazi, babalekere bagaruke omunsi enu. Habwokuba MUKAMA Ruhanga wanyu, munyambabazi kandi muganyizi, obu mulimuhindukira talibaima maiso.”

¹⁰Abakwenda, nukwo kugenda omu buli rubuga, baarabamu ensi yoona ey'Efuraimu na Manaase, okuhikira kimu omunsi eya Zebuluni; baitu abantu bakabasekeereza, baabagaya kandi baabateera obudoma.

¹¹Abantu abake ha bantu Ab'Aseeri, Manaase na Zebuluni, nubo baayebundaize, baagenda Yerusaalemu.

¹²Omunsi ya Yuda, Ruhanga nubo yakizire kukorra, yatamu abantu omwoyo gumu ogw'okuhurra ekiragiro ky'omukama n'abanyoro, MUKAMA nkooku yagambire.

¹³Omu kwezi kwa kabiri, abantu baingi bakeesorooleza Yerusaalemu kusemeza ekiro kikuru eky'emigaati etatumbisiibwe.

¹⁴Baatandika omulimo, amatambiro agakaba gali Yerusaalemu, n'agandi goona agaacumiikirirwahoga obubbaani yagaseesa, baagatwara baaganaga omu kihanga Kedirooni.

¹⁵Ha kiro ekya ikumi na bbina eky'okwezi, kwa kabiri, nubwo baisire akataama ak'okwijuka ekiro eky'okuhingurwaho. Baanyakatagara n'Abaleevi abakaba bateyereze nkooku basemeriire, bakaswara muno, nukwo kweyereza MUKAMA; obu nubwo bakaba nibasobora kuhonga ebihongwa eby'okwokya omunju ya MUKAMA.

¹⁶Baayemerra omu biikaro byabo ebimanyiirwe, Musa omuntu wa Ruhanga nkooku yaragiire; baamiisa esagama ei baahairwe Abaleevi.

¹⁷Omu kitebe, habwokuba hakaba harumu baingi abakaba bateeyereze; Abaleevi nukwo kuheebwa omulimo ogw'okwita omwana gw'entaama, ogw'okwijuka okuhingurwaho habw'abo boona abakaba bataina burukwera obusemeriire kwereza MUKAMA ebyonzira byabo.

¹⁸Habwokuba, orucaca rw'abantu abo, abaingi omuli bo abaarugire omunsi y'Efuraimu, eya Manaase, eya Isakaara na Zebuluuni, bakaba bateeyereze, baitu bakalya obugenyi obw'okwijuka okuhingurwaho, nkooku kitaararagiirwe. Habwokuba, omukama Hezekiya, akaba abasabiire naagamba ati, “Iwe MUKAMA omurungi, oganyire omuntu wena,

¹⁹anyakutaire omutima ha kuserra Ruhanga, MUKAMA Ruhanga owa baisenkuru, noobu araaba atahikiriize biragiro eby'okwezibwa eby'omu kiikaro ekirukwera.”

²⁰MUKAMA, akahurra Hezekiya eki yasabire; abantu yabaganyira, tiyabakora kabi.

²¹Abantu ba Isirairi abakaba bali Yerusaalemu, bakamara ebiro musanju, bali omu bugenyi obwokwijuka emigaati etatumbisiibwe, baina okusemererwa okutagambwa; kandi buli kiro Abaleevi na banyakatagara, baikara nibahaisaniza MUKAMA, nibamuzinira n'amaani gaabo goona.

²²Hezekiya akabaza naayekambisa Abaleevi boona, abaayolekere amagezi amarungi omu kuheereza MUKAMA. Abantu nukwo baliire bati, ebyokulya eby'obugenyi obw'ekiro kikuru, okumara ebiro musanju, nibatamba ebihongwa eby'okusaba obusinge, kandi nibasiima MUKAMA Ruhanga owa baisenkurubo.

²³Hanyuma ekitebe kyona, kyaikiriza obugenyi kubwongera omumaiso; kumara ebiro musanju ebindi; nukwo baakozire, baamara ebiro musanju ebindi, nibasemererwa.

²⁴Habwokuba Hezekiya omukama wa Yuda, akaha ekitebe enimi rukumi, empaya kasanju ez'ebihongwa, abanyoro, na bo baakiha enimi rukumi, n'entaama kakumi. Baanyakatagara baingi muno, baayeyeza.

²⁵Ekitebe eky'abantu ba Yuda kyona, banyakatagara n'Abaleevi, ekitebe kyona ekyarugire omu Isirairi, abanyamahanga abaarugire omunsi ya Isirairi, n'abaikaraga omunsi ya Yuda, baakyanganuka muno.

²⁶Omu rubuga Yerusaalemu, nukwo haabairemu hati omuhimbo ogutagambwa, habwokuba okuruga ha businge bwa Solomooni mutabani wa Daudi omukama wa Isirairi, omu rubuga Yerusaalemu hakaba hatakabamuga kintu nka kinu.

²⁷Hanyuma banyakatagara n'Abaleevi, baimuka baasabira abantu omugisa, iraka lyabo likahulirwa, kandi esaara yabo yahika omwiguru, omu kiikaro kya MUKAMA ekirukwera.