Read Runyoro - rutooro 2 Byok 31 Bible Online

2 Byok 31 - Runyoro - rutooro bible

2 Byok 31

¹Ebi byona obu byahoire, Abaisirairi boona abakaba bali aho, baagenda omu mbuga za Yuda, baacwacwana enyomyo, baatematema ekisisani ky'Asera, baaseesa ebiikaro eby'abanyamahanga eby'okuramizaamu n'amatambiro agakaba gali omunsi eya Yuda yoona eya Benyamiini, ey'Efuraimu n'eya Manaase, okuhika ebi byona obu baabihwerekereriize, kimu. Hanyuma abantu ba Isirairi boona, nubwo baagarukire omu mbuga zaabo, buli muntu omunsi y'owabo.

²Hezekiya, akataho ebihanda bya banyakatagara n'Abaleevi, omu buli kihanda, buli muntu naahebwa omulimo gwe, bahonge ebihongwa eby'okwokya n'eby'okusaba obusinge, baheereze omu malembo g'orukande rwa MUKAMA, basiime kandi bahaisanize.

³Omukama eki yahaireyo naiha ha bintu bye nyabwe, nibyo ebihongwa ebyokwokya: ebya nyenkya n'ebya rwebagyo, ebya ha biro bya Sabbato, ebya ha mboneko y'ameezi, n'ebya ha biro ebikuru ebyatairweho, nkooku kyahandiikirwe omu Biragiro bya MUKAMA.

⁴Kandi akaragira abantu abakaba bali Yerusaalemu, bahe banyakatagara n'Abaleevi, omugabo ogu basemeriire kutunga, nukwo basobole kwemarra ha Biragiro bya MUKAMA.

⁵Ekiragiro kikarumisa kurangirirwa, abantu ba Isirairi baaleeta engano ey'omuganuro, eviini, amagita, obwoki, n'ebintu ebindi byona ebinyakulimwa ebitasobora kubarwa; kandi baaleeta muno muno ekicweka ekya ikumi ekya buli kintu eki bakaba baina.

⁶Abantu ba Isirairi n'aba Yuda abaikaraga omu mbuga za Yuda, nabo bakaleeta ekicweka ekya ikumi, eky'ente n'entaama, n'ebintu ebyahongerwe, ebyayereziibwe MUKAMA Ruhanga wabo, baabituuma emituumo.

⁷Omu kwezi okwa kasatu, nubwo baatandikire kutuuma ebintu ebi, baamara omu kwa musanju.

⁸Hezekiya n'abanyoro be obu baaboine entuumo ezi, baahaisaniza MUKAMA n'abantu be Abaisirairi.

⁹Hezekiya akakaguza hanyakatagara n'Abaleevi ha ntuumo z'ebintu ebi.

¹⁰Azaliya nyakatagara omukuru ow'omu ruganda rwa Zadoki, yamugarukamu ati, “Abantu okuruga obu baatandikire kuleeta ebisembo omunju ya MUKAMA, tutaaha nitulya nitwiguta kandi tusigaizeho bingi muno; habwokuba MUKAMA akaha omugisa abantu be, nikyo tusagisiizeeho ebintu ebingi ebi.”

¹¹Hanyuma, Hezekiya yabaragira kuteekaniza ebisiika omunju ya MUKAMA; baabiteekaniza.

¹²Baataahya n'obwesige ebintu ebyaleesirwe, ebicweka ebya kimu kya ikumi n'ebintu ebikaba bihongerwe. Omunyoro Omukuru ayarolerraga ebintu ebi, nuwe Konaniya Omuleevi, owa kabiri hali uwe, nuwe Simeyi owanyina;

¹³hakakomwa Yehyeri, Azaziya, Nahasi, Asaheeri, Yerimoosi, Yozabadi, Eryeri, Ismakiya, Mahasi na Benaaya, babe baroleerezi, nibategekwa Konaniya na Simeyi owa nyina, Hezekiya omukama n'Azaliya omulemi omukuru ow'Enju ya Ruhanga, nkooku baaragiire.

¹⁴Koore mutabani wa Imuna Omuleevi, omulinzi w'irembo erya Burugaizooba, nuwe yaroleerraga ebihongwa ebyokwegondeza ebyahongerwaga Ruhanga, abaganize ebintu ebyahuliirwe MUKAMA, n'ebihongwa ebirukwerra kimu kukira byona.

¹⁵Edeni, Miniyamini Yesuwa, Semaaya, Amariya na Sekaniya, nubo baamukonyeraga n'obwesige, omu mbuga eza banyakatagara, kugabira bagenzi baabo emigabo, abato n'abakuru nibabainganainganiza, nkooku bakaba bali omu bihanda byabo,

¹⁶ekwihaho abo, abaahandiikirwe obwijukuru bwabo nkooku bukaba nibukuratana, abasaija, okurugirra ha w'emyaka esatu n'okweyongerayo, boona abaataahaga Enju ya MUKAMA, omulimo ogwa buli kiro nkooku gwabaga nigwetaagwa, baheereze, emirimo yabo nkooku ekaba eri nibagendera omu bihanda byabo.

¹⁷Okuhandiikwa kwa banyakatagara kukagendera ha maju ga baisenkurubo nkooku gakaba gali; kandi okw'Abaleevi, okurugirra ha w'emyaka amakumi abiri n'okweyongerayo, kukagenderra ha mirimo yabo, ebihanda byabo nkooku bikaba biri.

¹⁸Baanyakatagara, bakahandikirwa hamu n'abaana baabo abato boona, hamu na bakazi baabo, batabani baabo na bahara baabo, ekitebe kyona; habwokuba nubo bakaba bali beesigwa omu kwerinda bakaikara nibeera.

¹⁹Omu Baanyakatagara batabani b'Arooni, abakaba bali omu misiri ey'itaka erya boona ery'embuga zaabo, omu mbuga ezimu, hakaba harumu abasaija abakaba bakomerwe, baagambwa amabara, bagabirege emigabo abasaija boona ab'omu banyakatagara, na buli musaija ow'omu Baleevi, ow'akaba ahandiikirwe.

²⁰Omunsi ya Yuda yoona, Hezekiya nukwo yakozire ati, akakora ebirungi, ebihikire kandi eby'amazima, hali MUKAMA Ruhanga we.

²¹Buli mulimo gw'obuheereza omunju ya MUKAMA ogu yayetahoga ogw'okuserra MUKAMA, Ebiragiro nkooku bigamba, yagukoraga n'omutima gwe gwona, kandi yagukoraga kurungi.