Read Runyoro - rutooro 2 Byok 32 Bible Online

2 Byok 32 - Runyoro - rutooro bible

2 Byok 32

¹Ebintu ebi obu byamazire kubaho n'okukora ebikorwa ebi eby'obwesige, haija Senakeribu omukama w'Asiriya, yaseesira Yuda, yagota embuga ezizitiriirwe, naagonza kuzeehambira.

²Hezekiya obu yaboine Senakeribu nkooku aizire, kandi naagonza kurwanisa Yerusaalemu,

³yahanuura n'abanyoro be n'abasaija be ab'amaani, baigale amaziba agakaba gali aheeru y'orubuga; baamukonyera.

⁴Haayesorooza abantu baingi muno, baigara amaziba goona n'obusaaru obw'ageraga niburaba omunsi egi, nibagamba bati. “Titurukwenda abakama b'Asiriya kwija kusanga amaizi maingi.”

⁵Yatandika omulimo n'omutima gwona, yayombeka ekisiika kyona ekikaba kiseesekere, yakitaho eminaara, kandi aheeru y'eki, yayombekayo ekindi; kandi yagumya Miilo ey'omu rubuga rwa Daudi. Kandi yakora ebyokurwanisa, n'engabu ebitabarwa.

⁶Yataho engabwa endwani ez'okulema abantu, yabasorooza yabatwara owe, omuzigati ey'irembo ly'orubuga, yababaliza ebigambo eby'okubagarramu amaani naagamba ati:

⁷“Mube b'amaani kandi mugume. Omukama w'Asiriya n'enkumbutiti y'abantu abo abainabo, baleke kubatiinisa n'okubacwa enkizi; habwokuba anyakuli na itwe, naakira obukuru anyakuli na uwe.

⁸Aina amaani ag'omuntubuntu; baitu itwe, twina MUKAMA Ruhanga waitu, kutukonyera n'okuturwanira amalemu gaitu.” Abantu obu baahuliire ebigambo bya Hezekiya omukama wa Yuda, baaguma.

⁹Eki obu kyahoire, Senakeribu omukama w'Asiriya ow'akaba agosire Lakisi n'amahe ge goona, yatuma abaheereza be Yerusaalemu hali Hezekiya omukama wa Yuda, na hali abantu ba Yuda boona abakaba bali Yerusaalemu, naagamba ati

¹⁰“Senakeribu omukama w'Asiriya naagamba ati, nimwesiga ki kwikiriza kugoterwa Yerusaalemu?”

¹¹Hezekiya, obu arukubagambira ati: “MUKAMA Ruhanga waitu alitujuna omukama w'Asiriya” tarukubabiihabiiha, nukwo abaleke mwitwe enjara n'iroho?

¹²Hezekiya ogu wonyini, tinuwe ayaseesire ebiikaro bye eby'okuramizaamu n'amatambiro, yaragira Yuda na Yerusaalemu ati, “Muramizeege omumaiso g'itambiro linu, kandi niryo mucumiikirirrehoga obubbaani”.

¹³Timumanyire nyowe na baisenkurunyowe ebi twakoliire abantu ab'ensi ezindi? Baaruhanga ab'amahanga ag'ensi ezi, bakasobora kujuna ensi zaabo bakazinyihaho?

¹⁴Omu mbandwa zoona ab'amahanga ago, baisenkurunyowe aga baahwerekeriize, n'oha ayasoboire kujuna abantu be akabanyihaho, na inywe nukwo mukagira ngu Ruhanga wanyu yaakusobora kubajuna akabanyihaho?

¹⁵Lero nu, Hezekiya aleke kubabiihabiiha, n'okubahabisa ati, mutamwikiriza, habwokuba, tihakabahoga ruhanga ow'ihanga na limu, rundi ow'obukama, arasoboire kujuna abantu akabanyihaho, rundi akabaihaho baisenkurunyowe. Ruhanga wanyu nuwe arasobora ata!

¹⁶Abaheereza be, bakabaza ebikizireho hali MUKAMA Ruhanga, na hali Hezekiya omuheereza we.

¹⁷Akahandiika ebbaruha ey'okugayisa MUKAMA Ruhanga owa Isirairi n'okumubazaaho, neegamba eti “Baaruhanga ab'amahanga ag'ensi ezindi nkooku baalemerwe kujuna abantu baabo bakabanyihaho, ruhanga wa Hezekiya na uwe nukwo arukwija kulemwa kujuna abantu be.”

¹⁸Baakibaza nibatoka muno, omu ngambo ey'Abayuda, nibakibaliza abantu ba Yerusaalemu, abakaba bali ha kisiika, kubakanga n'okubatiinisa, nukwo basobole kuhamba orubuga.

¹⁹Kandi bakabazaaho Ruhanga owa Yerusaalemu, nkooku baabalizeeho baaruhanga ab'amahanga ag'ensi, abaakozirwe emikono y'abantu.

²⁰Hezekiya omukama na Isaaya omurangi mutabani w'Amozi nukwo kwesengereza MUKAMA, n'okumuterra omuranga abakonyere.

²¹MUKAMA yatuma malaika, yatematema abaserikale ab'amaani boona, engabwa n'abanyoro abakaba bali omu rukande rw'omukama w'Asiriya. Uwe nukwo kugaruka omunsi ye aina ensoni. Kandi obu yataahire omunju ya ruhanga we, abamu ha baana be nyabwe, aho nuho baamutemwiire n'empirima.

²²MUKAMA nukwo yajunire ati Hezekiya n'abasi ba Yerusaalemu, yabaihaho Senakeribu omukama w'Asiriya, n'abanyanzigwa boona; yabaha obusinge ha mbaju zoona.

²³Abantu baingi baagenda Yerusaalemu baatwarra MUKAMA ebihongwa, kandi baatwarra Hezekiya ebisembo, okuruga obu n'okweyongera omumaiso, amahanga goona gaamutamuga ekitiinisa.

²⁴Omu biro ebi, omukama Hezekiya akarwara yahitwa, yasaba MUKAMA; MUKAMA yamuha eki yamusabire, yamuha n'akarorwaho.

²⁵Baitu Hezekiya atakole ekikorwa ekirungi, okwingana nk'ekirungi eki yakoliirwe, habwokuba omutima gwe, gukaba nigwekuliiriza. Ekyarugiremu MUKAMA nukwo kukwatirwa Yuda na Yerusaalemu ekiniga.

²⁶Baitu Hanyuma, Hezekiya n'abantu ba Yerusaalemu bakeebundaaza, MUKAMA nukwo kutabafubira okuhika Hezekiya obu yakamazire kutuuza.

²⁷Omukama Hezekiya, akatunga muno, kandi yahebwaga ekitiinisa ekitagambwa; yayeyombekera amaahurro ag'efeeza, ag'ezaabbu, ag'amabaale ag'omuhendo, ebintu ebirukuboya, engabu, n'ag'emiringo yoona ey'ebintu eby'omuhendo;

²⁸n'amaahurro ag'okuhunikamu engano ye, ag'okutamu eviini n'amagita; ebihongole eby'okutamu ente eza buli mulingo, n'amasibiko g'entaama.

²⁹Kandi yayetungira embuga, amahyo ag'embuzi n'ag'ente agatabarwa; habwokuba, Ruhanga akaba amuhaire ebintu bingi.

³⁰Hezekiya nuwe omu ogu, ayaigaire ensoro y'eruguru ey'amaizi aga Gihoni, yagyoleka ha rubaju orwa Bugwaizooba obw'orubuga rwa Daudi. Byona ebi yakozire, akabikora kurungi.

³¹Ha kigambo ky'abakwenda b'abanyoro aba Bbabbulooni abakaba batumirwe kukaguliiriza ha kintu ekyabaireho omunsi, Ruhanga akaleka Hezekiya ayemerre wenka, nukwo amulengese, kandi amanye byona ebikaba biri omu mutima gwe.

³²Ebintu ebindi Hezekiya ebi yakozire, n'ebintu ebirungi bikahandiikwa omu kwolekwa kwa Isaaya omurangi mutabani w'Amozi, omu kitabu eky'abakama ba Yuda na Isirairi.

³³Hezekiya akatuuza baamutabaaza hamu na baisenkuru, ha matemba g'amagasani aga batabani ba Daudi; obu yatuulize, ensi Yuda yoona n'abasi ba Yerusaalemu, baamutamu ekitiinisa. Manaase omutabani, yateera engoma.