Read Runyoro - rutooro 2 Byok 33 Bible Online

2 Byok 33 - Runyoro - rutooro bible

2 Byok 33

¹Manaase kuteera engoma, akaba ahikize emyaka ikumi n'ebiri, akalemera emyaka amakumi ataano n'etaano, ali omu rubuga Yerusaalemu.

²Akakora ebibiihiza MUKAMA, ebintu eby'ensoni, amahanga MUKAMA aga yabingire abaana ba Isirairi batakaizire, ebi gaakoraga.

³Habwokuba, akombeka buhyaka ebiikaro eby'abanyamahanga eby'okuramizaamu, Hezekiya ise ebi akaba aseesire, yayombekera Baali amatambiro, yakora ebisisani eby'omucwezi Asera, yaramya ebintu byona eby'omu mwanya, kandi yabiheereza.

⁴Kandi akombeka amatambiro omunju ya MUKAMA, MUKAMA ei akaba agambireho ati, “Ibara lyange, tiriricwekera Yerusaalemu, ebiro n'ebiro. Ekiikaro MUKAMA eki akaba agambireho ati, nikyo araaramizibwamuga, obusinge n'obusinge.”

⁵Ebintu byona eby'omu mwanya, akabyombekera amatambiro, omuzigati ibiri ez'Enju ya MUKAMA.

⁶Akookya batabani be kiri kihongwa, yabookeza omu kihanga kya mutabani wa Hinomu, yaraguzaaga, yaraguraga, yarogaga, kandi yayetahoga abaabandwaga emizimu n'abarogo. Akakora ebintu bingi muno MUKAMA ebi atasiima, yamubiihiza.

⁷Ekisisani ky'omucwezi eki akaba akozire, akakita omunju ya Ruhanga, Ruhanga ei yagambiireho Daudi na mutabani we Solomooni ati, “Omunju enu, n'omu rubuga runu Yerusaalemu oru nkomere omu nganda zoona eza Isirairi, ibara lyange tiriricwekeramu ebiro n'ebiro;

⁸kandi iwe Isirairi, obu olitaho omutima okukwata byona ebi naragiire, Ebiragiro n'ebigambo byona ebi nagambiire Musa, tindyongera kukubinga omunsi enu, ei nahaire baswenkuru.”

⁹Manaase akasoonasoona Yuda n'abasi ba Yerusaalemu, nukwo kukora kubi muno, okukira amahanga MUKAMA aga yahwerekeriize, abantu ba Isirairi batakaizire.

¹⁰MUKAMA akagambira Manaase n'abantu be, baitu batafeeho.

¹¹Na uwe nukwo kubaleetera engabwa z'ihe ery'omukama w'Asiriya, baakwata Manaase baamukwasa amarobo, baamubohesa empinga ez'omulinga, baamutwara Bbabbulooni.

¹²Obwakaba ali omu muhito, akeesengereza MUKAMA Ruhanga we amugirre embabazi, yayebundaaliza muno Ruhanga owa baisenkuru.

¹³Akamwesengereza, yahurra okwesengereza n'okutaaga kwe, yamugarra Yerusaalemu omu bukama bwe. Manaase, nukwo kumanya, MUKAMA nkooku ali Ruhanga.

¹⁴Hanyuma yayombeka ekisiika aheeru yazitirra orubuga rwa Daudi, orukaba ruli Bugwaizooba bwa Gihoni omu kihanga, na ha irembo erirukutaahya omu irembo ery'encu, yayehinguliriza Ofeli, yakiraihya muno; kandi embuga zoona ezigumire ez'omunsi Yuda, yazitamu engabwa.

¹⁵Baaruhanga abanyamahanga n'ekisisani yabiiha omunju ya MUKAMA, oteho n'amatambiro goona aga akaba ayombekere ha rusozi rw'Enju ya MUKAMA, n'omu rubuga Yerusaalemu, yaganaga aheeru y'orubuga.

¹⁶Akagarraho n'itambiro lya MUKAMA, yalihongeraho ebyonzira eby'ebihongwa eby'okusaba obusinge n'eby'okusiima; kandi yaragira Yuda yoona kuheereza MUKAMA Ruhanga wa Isirairi.

¹⁷Abantu noobu baraaba bayongiire kutambira ebyonzira omu biikaro ebitungamire baitu MUKAMA Ruhanga wabo wenka nuwe batambiraga.

¹⁸Ebintu ebindi Manaase ebi yakozire, nkooku yasabire Ruhanga we, ebigambo by'abarangi abaabalize na uwe omu ibara lya MUKAMA Ruhanga owa Isirairi, byona bikahandiikwa omu kitabu eky'obusinge obw'abakama ba Isirairi.

¹⁹Okusaba kwe, Ruhanga nkooku yahuliire okwesengereza kwe, ebibi bye byona ebi yakozire, obutaba na bwesige, ebibanja ebi yayombekereho ebiikaro eby'ekitiinisa atakebundaize yabitamu Asera n'ebisisani, byona bikahandiikwa omu kitabu eky'obusinge obw'abarangi.

²⁰Manaase nukwo yatuulize ati, nka baisenkuru, baamutabaaza omu Kaaruziika ye; omutabani Amoni yateera engoma.

²¹Amoni kuteera engoma, akaba ahikize emyaka amakumi abiri n'ebiri, akalemera emyaka ebiri omu rubuga Yerusaalemu.

²²Akakora MUKAMA ebi atasiima, nka Manaase ise, oku yakozire. Akatambira ebyonzira ebisisani byona eby'abacwezi, Manaase ise ebi akaba akozire, yataho n'okubiramya.

²³Ateebundaalize MUKAMA nka Manaase ise oku yakozire, baitu onu akakora ebibi ebikizireho muno.

²⁴Abaheereza be bakamuliirana, baamwitira omu kaaruziika ye.

²⁵Baitu abantu ab'ensi egi, boona abaaliiraine omukama Amoni, bakabaita; omutabani Yosiya, nuwe baata ha ngoma.