Read Runyoro - rutooro 2 Byok 35 Bible Online

2 Byok 35 - Runyoro - rutooro bible

2 Byok 35

¹Ekiro eky'Okwijuka Ekiro eky'Okuhingurwaho eky'okutamu MUKAMA ekitiinisa, omukama Yosiya, yakisemerezaaga Yerusaalemu; ha kiro ekya ikumi na bbina eby'okwezi okw'okubanza, baitaga omwana gw'entaama ogw'okwijuka Okuhingurwaho.

²Akakoma banyakatagara yabaha emirimo yabo, ei baraakoraga omunju ya MUKAMA, kandi yabateererra kugikoraga kurungi.

³Kandi akagambira Abaleevi abaayegeseze Isirairi yoona, abakaba bahoongiirwe MUKAMA ati: “Esanduuko ey'Endagaano erukwera mugite omunju, Solomooni mutabani wa Daudi omukama wa Isirairi ei yayombekere; tikikyayetaagwa kwikara nimugyetweka, kugiiha hanu kugitwara hali baitu muheerezeege MUKAMA Ruhanga wanyu, n'abantu be Abaisirairi.

⁴Mweteekanize, nimuhondera ebihanda byanyu, amaju aga Baisenkurwinywe nkooku gali, nimuhondera ebiragiro bya Daudi omukama wa Isirairi, n'ebya Solomooni omutabani.

⁵Mwemerre omu kiikaro ekirukwera, mwebaganiize omu bitebe eby'amaju ga baisenkuru bagenzi banyu abatali banyadiini, kandi buli muntu abe n'ekicweka eky'enju ya isenkuru, ey'Abaleevi.

⁶Mwite omwana gw'entaama ogw'okwijuka Okuhingurwaho, mweyeze, kandi muteekanirize bagenzi banyu, bahonderege ekigambo MUKAMA eki yagambiire Musa.”

⁷Hanyuma, omukama Yosiya, abantu boona abakaba bali aho abatali banyadiini akabaha ebihongwa eby'okwijuka Okuhingurwaho, ebyana by'entaama n'eby'emburabuzi ebirukuhika obukumi busatu, oteho enimi enkumi isatu, ebi akabiiha omu magana ge.

⁸Abanyoro be, na bo baijwire omutima gw'engonzi baabiha abantu, banyakatagara, n'Abaleevi. Hilukiya, Zekaliya na Yehyeri, abanyoro abakuru ab'Enju ya MUKAMA, bakaha banyakatagara ebihongwa eby'Okwijuka Okuhingurwaho, ebyana by'entaama n'eby'emburabuzi enkumi ibiri n'orukaaga, n'enimi ebikumi bisatu.

⁹Konaniya na uwe, Semaaya na Netaneeri abaanyina, Hasabiya, Yeyeri na Zobaadi bakuru b'Abaleevi, bakaha Abaleevi ebihongwa eby'Okwijuka Okuhingurwaho, ebyana by'entaama n'eby'emburabuzi, enkumi itaano, n'enimi ebikumi bitaano.

¹⁰Ebintu byona eby'okwijuka Okuhingurwaho obu byamazire kuteekanizibwa, banyakatagara baayemerra omu kiikaro kyabo, Abaleevi na bo baayemerra bali omu bihanda byabo, omukama nkooku yaragiire.

¹¹Abaleevi baita omwana gw'entaama ogw'okwijuka Okuhingurwaho, banyakatagara baamiisa esagama, Abaleevi ei baabahaire nibakyabaaga ebyonzira.

¹²Baata ha rubaju ebihongwa eby'okwokya, nukwo basobole kubigaba, nibagendera ha bitebe eby'amaju ga baisenkurubo ag'abantu abatali Banyadiini nkooku gakaba gali. Bahongere MUKAMA nkooku kyahandiikirwe omu kitabu kya Musa. Enimi nazo nukwo baazikozire bati.

¹³Baayokya omwana gw'entaama ogw'okwijuka Okuhingurwaho, ekiragiro nkooku kigamba; kandi ebihongwa ebirukwera, baabicumba omu binaga omu safuliya, n'omu bikarango, baabisembereza bwango abantu abandi boona.

¹⁴Hanyuma baayeteekaniriza bonka kandi baateekaniriza na banyakatagara, habwokuba banyakatagara batabani b'Arooni, bakasiiba nibatalibana nibahonga ebihongwa eby'okwokya n'enyama ey'ebisajwa, okuhika obwire kwira; Abaleevi nukwo kweteekaniriza, n'okuteekaniriza banyakatagara batabani b'Arooni.

¹⁵Abazini batabani b'Asafu, bakeemeerra omu kiikaro kyabo, omukama Daudi n'Asafu, Hemani, na Yedusuuni omuraguzi w'omukama, nkooku baaragiire; kandi ha buli irembo, hakaba haroho abalinzi; bakaba batarukwetaaga kuruga ha mulimo gwabo, habwokuba bagenzi baabo Abaleevi bakabateekaniriza.

¹⁶Kiro eki, omulimo gwa MUKAMA gwona, okwijuka ekiro eky'okuhingurwaho n'okuhonga ebihongwa eby'okwokya ha itambiro lya MUKAMA, omukama Yosiya nkooku yaragiire nukwo gwateekaniziibwe guti.

¹⁷Omu kasumi ako, abantu ba Isirairi abakaba baroho nukwo baasemiize ekiro kikuru eky'Okwijuka Okuhingurwaho n'eky'emigaati etatumbisiibwe okumara ebiro musanju.

¹⁸Okuruga omu businge bwa Samwiri omurangi omu Yuda, ekiro eky'Okwijuka Okuhingurwaho, kikaba kitakasemezibwamuga nk'eki; busaho n'omu ha bakama ba Isirairi na Isirairi, abasi ba Yerusaalemu, abakaba bali aho, akaba arasemiize ekiro eky'Okwijuka okuhingurwaho, nka Yosiya oku yakisemiize.

¹⁹Omu mwaka ogwa ikumi na munaana ogw'obusinge bwa Yosiya, ekiro eki eky'okwijuka Okuhingurwaho, nubwo kyasemeziibwe.

²⁰Ebi byona obu byahoire, Yosiya amazire kuteekaniza Enju ya MUKAMA, Neko omukama wa Misiri, akaramaga kurwana omu kiikaro Kakemesi, ekya ha kisaaru Efuraate, Yosiya yagenda kumurwanisa.

²¹Neko yatumira Yosiya abakwenda naagamba ati, “Iwe omukama wa Yuda, nyowe na iwe, nituturangana ki? Kiro kinu, tinseesiire iwe, baitu nseesiire enju ei ndukurwanisa; kandi Ruhanga andagiire kurahuka. Olekere aho kurwanisa Ruhanga anyakuli hamu na nyowe, obu otaleke, naija kukuhwerekereza.”

²²Baitu Yosiya tiyamurugaho, yayehindura aleke kumanyirirwa, nukwo amurwanise. Ebigambo bya Neko ebyagambirwe Ruhanga tiyabihurra, baitu yataaha omu bulemu omu kihanga ekya Megido.

²³Abarasi b'obuta, baamurasa, yagambira abaheereza be ati, “Munyihe hanu muntwale, habwokuba mputaire muno.”

²⁴Abaheereza be, nukwo kumwiha omu kigaali, baamutwarra omu kigaali kye ekindi baamugarra Yerusaalemu yatuuza yatabaazibwa omu magasani[8] ga baisenkuru. Yuda yoona na Yerusaalemu, zaamulirirra.

²⁵Yeremiya omurangi na uwe akacwererra ekizina eky'okuterra Yosiya empamo, okuhika na hati, abasaija n'abakazi boona abazini, obu baba nibamuterra empamo nibakyakizina. Omu Isirairi, eki bakakifoora kiragiro; kikahandiikwa omu mpamo.

²⁶Ebintu ebindi Yosiya ebi yakozire, ebintu bye ebirungi nkooku byahandiikirwe omu Biragiro bya MUKAMA,

²⁷okuraga ha ky'okubanza okuhika ha ky'okumalirra, byona bikahandiikwa omu Kitabu eky'Abakama ba Isirairi na Yuda.