Read Runyoro - rutooro 2 Byok 36 Bible Online

2 Byok 36 - Runyoro - rutooro bible

2 Byok 36

¹Abantu b'ensi egi, bakakwata Yehoyahazi mutabani wa Yosiya, nuwe baafoora mukama omu kiikaro kya ise omu rubuga Yerusaalemu.

²Yehoyahazi kulema, akaba ahikize emyaka amakumi abiri n'esatu, akalemera ameezi asatu, ali omu rubuga Yerusaalemu.

³Hanyuma omukama Neko owa Misiri nubwo, yamwihire ha bukama, yamutwara ali munyankomo, ensi egi Yuda yagicwera omusoro ogw'okusasuraga kiloguraamu enkumi isatu n'ebbina ez'efeeza, n'ez'ezaabbu asatu na ina.

⁴Owanyina Eliakimu, nuwe yafoora mukama wa Yuda na Yerusaalemu, ibara lye yalihindura yamweta Yehoyakimu; Neko akakwata Yehoyahazi owanyina yamutwara Misiri.

⁵Yehoyakimu kuteera engoma, akaba ahikize emyaka amakumi abiri n'etaano, kandi akalemera emyaka ikumi na gumu, ali omu rubuga Yerusaalemu. Akakora MUKAMA Ruhanga we ebi atasiima.

⁶Nebbukadaneeza omukama wa Bbabbulooni nukwo kumuseesira yamutamu empingo, yamutwara Bbabbulooni.

⁷Nebbukadaneeza atagarukire hali eki kyonka, akakwata n'ekicweka eky'ebikwato eby'Enju ya MUKAMA, yakitwara Bbabbulooni, yabita omu kikaali kye Bbabbulooni.

⁸Ebintu ebindi Yehoyakimu ebi yakozire, ebintu eby'ensoni ebi yakozire n'ebyamuzoirweho ebyamwitiire ekitiinisa, bikahandiikwa omu Kitabu eky'Abakama ba Isirairi n'aba Yuda; Yehoyakini omutabani, yateera engoma.

⁹Yehoyakini kuteera engoma, akaba ahikize emyaka munaana, akalemera ameezi asatu n'ebiro ikumi, ali omu rubuga Yerusaalemu. Akakora MUKAMA ebi atasiima,

¹⁰Omwaka obu gukaba nigutandika, omukama Nebbukadaneeza, yatuma abantu, baamukwata baamutwaara Bbabbulooni, hamu n'ebikwato eby'omuhendo eby'Enju ya MUKAMA. Zedekiya, isento nuwe yafoora mukama wa Yuda na Yerusaalemu.

¹¹Zedekiya kuteera engoma, akaba ahikize emyaka amakumi abiri na gumu, akalemera emyaka ikumi na gumu, ali omu rubuga Yerusaalemu.

¹²Akakora MUKAMA Ruhanga we ebi atasiima. Ateebundaalize Yeremiya omurangi, ayabalize ebyagambirwe MUKAMA.

¹³Akataho n'okwemera omukama Nebbukadaneeza ayamurahiize Ruhanga; yagumangana yakadadaza omutima, yayanga kugaruka hali MUKAMA Ruhanga owa Isirairi.

¹⁴Baanyakatagara abakuru boona, oteho n'abantu, bakabulirwa kimu obwesige, baayetaho ebintu eby'ensoni byona ebyakorwaga amahanga, kandi baasiisa Enju ya MUKAMA ei akaba ayeyeriize Yerusaalemu.

¹⁵MUKAMA Ruhanga owa baisenkurubo, akabatumira abakwenda be obutalekerra, habwokuba, akaba naaganyira abantu b'Enju ye;

¹⁶baitu bo, baikara nibasekereza abakwenda ba Ruhanga, nibagaya ebigambo bye, kandi nibagaaniiza[9] abarangi be, okuhika MUKAMA obu yakabiihirwe muno, haabura omubazi ogw'okufukyafukya ekiniga eki.

¹⁷Nukwo kuleeta omukama w'Abakaludaaya abaseesire, abasigazi baabo, yabaisa empirima, yabaitira omu kiikaro ekirukwera, ataganyire muntu n'omu, omusigazi rundi omwisiki, omusaija omukuru rundi omugurusi; boona akabamulekera.

¹⁸Ebikwato eby'Enju ya MUKAMA byona, ebikooto n'ebitoito, ebintu eby'Enju ya Ruhanga, ebya kaaruziika y'omukama n'eby'abanyoro be, ebi byona yabitwara Bbabbulooni.

¹⁹Kandi baayokya Enju ya Ruhanga, baaseesa ekisiika ky'orubuga Yerusaalemu, ebikaali byayo byona baabyokya n'omurro, kandi ebikwato byayo byona ebyomuhendo, baabihwerekereza.

²⁰Abo abaatabukire empirima, akabazaahisiza Bbabbulooni, baafooka bairu be, kandi b'abaana be, okuhika obu haakabaireho obukama bwa Perisi,

²¹okuhikiriza MUKAMA eki yagambisize Yeremiya ati: “Ensi enu, eriikara eri itongo okumara emyaka nsanju, nukwo kusasuza ekihuumuro ekya ha Sabbato, ekitarafiirweho.”

²²Omu mwaka ogw'okubanza ogw'omukama Kuuro, ekigambo MUKAMA eki yagambisize Yeremiya nukwo kihikirre, akatamu Sirasi omukama wa Paasa omwoyo, yaturukya ekirangirro omu bukama bwe bwona, kandi yakita n'omu buhandiiki naagamba ati:

²³“Kuuro omukama wa Paasa naagamba ati, ‘MUKAMA Ruhanga ow'iguru, ampaire obukama bwona obw'ensi kandi andagiire kumwombekera Enju omu kiikaro Yerusaalemu, ekinyakuli omunsi ya Yuda. Wena anyakuli omuli inywe ha bantu be boona, Mukama Ruhanga we aikale na uwe.’ ”